NUMELO 4 - Ko te Tohi Tapu i te fakauvea

Gaue o te u foha o Levi

¹ Nee palalau leva te Eteleno kia Moisese mo Alone, o ui:

² Kolua tohi te u tagata Levi fuli ae e omai maia Keati, o mulimuli ki onatou famili, o mulimuli ki te u fale o anatou tamai,

³ mai te tau tolugofulu o kaku ki te tau nimagofulu, natou fuli ae kua aoga ki te fai o he gaue i te falela tapu.

⁴ Koeni te u gaue a te u foha o Keati, i te falela tapu: e natou tokaga anai ki te u mea tapu.

⁵ I te mavae mai o te nofoaga, e hau anai ia Alone mo ona foha o vete te lito pupunu o te sagatualio, pea e natou puloui aki anai te aleka o te fakamooni;

⁶ pea e natou hili anai i oluga te la kilii tutuu, pea e natou folahi anai i oluga he foi kie uui katoa, pea e natou fakapipiki anai ki ai te u akau amo o te aleka tapu.

⁷ E natou folahi anai he kie uui i oluga o te laupapa o te u pane tapu, pea e natou hili anai ki oluga te u pa, mo te u ipu lalahi, mo te u ipu maluoluo, pea mo te u kalise ki te u lipasio; e tuku tuumau anai te u pane i ai.

⁸ E natou folahi anai i oluga o te u mea fuli aia he kie fului ovi kula, pea e natou uufi anai te u mea fuli aki he kie kilii tutuu; pea e natou fakapipiki anai te u akau amo o te laupapa tapu.

⁹ E natou kofu anai te tuuaga malama aki he kie uui, pea mo ona mea gaue fuli, mo ona malama, mo ona pipi tuusi vavae, mo ona tanakiaga lefulefu, pea mo ona hina lolo fuli,

¹⁰ pea e natou tuku anai te u mea fuli aia ki he tahi kie kilii tutuu, pea e natou hili anai te kofukofuga katoa ki oluga o te fata.

¹¹ E natou fofola anai he tahi kie uui ki oluga o te aletale aulo, pea e natou kofu anai ia aki he tahi kie kilii tutuu; pea e natou fakapipiki anai ona akau amo.

¹² E natou tanaki anai te u mea gaue fuli o te sagatualio, pea e natou kofu anai natou aki he kie uui, pea e natou uufi anai te u mea fuli aia aki he kie kilii tutuu; pea e natou hili anai te u mea aia ki te fata.

¹³ E natou too anai te lefulefu o te aletale o te u failaulau, pea e natou fofola anai i oluga he kie kula fakapouli.

¹⁴ E natou tanaki anai i oluga ona mea gaue fuli, te u ipu tukuaga afi, mo te u huki lalahi, mo te u huo, mo te u kalise, pea e natou fofola i oluga he tahi ake kie kilii tutuu; pea e natou fakapipiki anai te u akau amo o te aletale.

¹⁵ Ka osi anai te kofu e Alone mo ona foha te u mea tapu mo te u mea gaue fuli o te falela tapu, e olo anai te u foha o Keati, i mua o te fagona, o natou amo natou; kae e mole tonu ke natou lave ki he mea tapu, koteuhi naa natou mamate ai. Koena te gaue a te u foha o Keati i te falela tapu.

¹⁶ Ko Eleasale, foha o te tagata faisakilifisio ko Alone, e tokaga ia ki te lolo o te tuuaga malama, mo te kaloni fakamagoni, mo te molaga meakai o te aho taki tahi, pea mo te lolo tapu; ko ia ae e leoleo anai ki te falela tapu mo te u mea fuli ae i loto, tatau aipe ki te u mea tapu mo te u mea gaue tapu.

¹⁷ Nee palalau leva te Eteleno kia Moisese mo Alone, o ui:

¹⁸ Aua naa ke tuku te famili o Keati ke puli noa i te lotolotoga o te kau Levi.

¹⁹ Kotou fai te mea aeni kia natou, o tupu ke natou mauuli pea ke aua naa natou mamate, moka natou fakaoviovi ki he mea tapu: e hau leva Alone mo ona foha o fakatuu te tagata taki toko tahi ki tana gaue mo tana kavega.

²⁰ E mole natou ulu anai o sisio ki te kofu o te u mea tapu, koteuhi naa natou mamate ai.

²¹ Nee palalau leva te Eteleno kia Moisese, o ui:

²² Ke ke tohi foki te u foha o Kelesoni, o mulimuli ki te u fale o anatou tamai, o mulimuli ki onatou famili;

²³ e ke tohi leva natou, mai te tau tolugofulu o fai ki oluga ki te tau nimagofulu, natou fuli ae kua aoga ki te fai o he gaue i te falela tapu.

²⁴ Koeni te gaue o te u faahiga o Kelesoni mo anatou gaue mo anatou kavega.

²⁵ E natou amo anai te u la puipui o te tapenakulo mo te falela tapu, pea mo te la kilii ovi tagata, pea mo te la kilii tutuu ae e hili i oluga, pea mo te lito ae e tau i te uluaga o te falela tapu;

²⁶ pea mo te kie puipui o te lotoa, pea mo te kie pupunu o te uluaga o te lotoa takai o te falela tapu, pea mo te aletale o te u failaulau, pea mo te u maea o te a takatakai, pea mo te u mea gaue fuli ae nee kau ki ai. Pea e natou fai anai te tauhi fuli ki ai.

²⁷ I anatou gaue, e fakalogo anai te u foha o Kelesoni kia Alone mo ona foha, o uhiga mo te u mea fuli ae ka natou amo, pea mo te tauhi fuli ae ka natou fai. E kolua fakaha kia natou te u mea fuli ae e tonu ke natou amo.

²⁸ Koena te u gaue o te u famili o te u foha o Kelesoni i te falela tapu. Ko Itamale, foha o te tagata faisakilifisio ko Alone, e ina leoleo tanatou gaue.

²⁹ E ke fai anai te tohi o te u foha o Melali, o mulimuli ki onatou famili, o mulimuli ki te u fale o anatou tamai;

³⁰ e ke tohi anai, mai te tau tolugofulu o fai ki oluga ki te tau nimagofulu, te tagata fuli ae kua aoga ke ulu o gaue i te falela tapu.

³¹ Koeni te mea ae e tonu ke natou tokaga ki ai, mo te mea ae e tonu ke natou amo i te tauhi o te falela tapu: e natou tokaga anai ki te u papa o te falela tapu, mo ona akau fakamau, mo ona pou, mo ona tuuaga pou,

³² mo te u pou takai o te lotoa, mo ona tuuaga pou, mo ona pike, mo ona maea, mo te u mea gaue fuli ae e aoga ki ai. E kolua lau higoa anai te u mea ae e tonu ke natou tokaga ki ai, mo ae ka natou amo.

³³ Koena te u gaue a te famili o Melali, onatou tuulaga fuli i te falela tapu, i te takitaki a Itamale foha o te tagata faisakilifisio ko Alone.

³⁴ Nee tohi leva e Moisese, mo Alone, pea mo te u pule o te u fanau a Iselaele, te u foha o Keati o mulimuli ki onatou famili, o mulimuli ki te u fale o anatou tamai.

³⁵ Natou fuli ae nee tohi mai te tau tolugofulu o fai ki oluga ki te tau nimagofulu, nee kua aoga ke ulu o gaue i te falela tapu.

³⁶ Ko natou ae nee tohi, o mulimuli ki onatou famili, ko te toko lua afe fitugeau nimagofulu tagata (2750).

³⁷ Koena ia natou o te u famili o Keati ae nee tohi kua aoga ke gaue i te falela tapu. Nee tohi natou e Moisese mo Alone, o mulimuli ki tona fakatotonu age e te Eteleno kia Moisese.

³⁸ Ko te u foha o Kelesoni ae nee tohi, o mulimuli ki onatou famili, o mulimuli ki te u fale o anatou tamai,

³⁹ mai te tau tolugofulu o fai ki oluga ki te tau nimagofulu, ia natou fuli ae kua aoga ke ulu o gaue i te falela tapu,

⁴⁰ ko natou ae nee tohi o mulimuli ki onatou famili, o mulimuli ki te u fale o anatou tamai, ko te toko lua afe onogeau tolugofulu tagata (2630).

⁴¹ Koena te u famili o te u foha o Kelesoni. Nee tohi fuli natou ae nee gaue i te falela tapu; nee tohi fuli natou e Moisese mo Alone o mulimuli ki te fakatotonu a te Eteleno.

⁴² Koeni te u famili o te u foha o Melali ae nee tohi, o mulimuli ki onatou famili, o mulimuli ki te u fale o anatou tamai,

⁴³ mai te tau tolugofulu o fai ki oluga ki te tau nimagofulu, natou fuli ae kua aoga ke ulu o too te u gaue mo te u kavega i te falela tapu,

⁴⁴ ko natou ae nee tohi, o mulimuli ki onatou famili, ko te toko tolu afe luageau tagata (3200).

⁴⁵ Ko te u famili aia o te u foha o Melali, ae nee tohi, e Moisese mo Alone, o mulimuli ki te fakatotonu a te Eteleno kia Moisese.

⁴⁶ Koena te u higoa o te kau Levi fuli ae nee tohi e Moisese, mo Alone, pea mo te u pule o Iselaele, o mulimuli ki onatou famili, o mulimuli ki te u fale o anatou tamai,

⁴⁷ mai te tau tolugofulu o fai ki oluga, ki te tau nimagofulu, natou fuli ae kua aoga ke ulu o too te u gaue mo te u kavega i te falela tapu,

⁴⁸ natou fuli ae nee tohi ko te toko valu afe nimageau valugofulu tagata (8580).

⁴⁹ Nee tohi natou o mulimuli ki te fakatotonu a te Eteleno kia Moisese, o fakaha ki te tagata taki toko tahi tana gaue mo tana kavega; nee tohi natou o mulimuli, ki te fakatotonu ae nee tuku e te Eteleno kia Moisese.