NUMELO 3 - Ko te Tohi Tapu i te fakauvea

Fakatuutuu ki te u famili i te nofoaga

¹ Koeni te famili o Alone mo Moisese, i te temi ae nee palalau ai te Eteleno kia Moisese i te mouga o Sinai.

² Koeni te u higoa o te u foha o Alone: ko te uluaki ko Natape, mo Apiu, mo Eleasale, pea mo Itamale.

³ Ko te u higoa aia o te u foha o Alone ae nee fakanofo ke faisakilifisio, pea nee ulu leva ki te gaue a te tagata faisakilifisio.

⁴ Nee mamate leva Natape mo Apiu ia mua o te Eteleno, o tupu nee na ave he afi kehe kia mua o te Eteleno i te toafa o Sinai; nee na hala foha. Pea nee fai leva e Eleasale mo Itamale te gaue a te tagata faisakilifisio ia mua o tana tamai ko Alone.

⁵ Nee palalau leva te Eteleno kia Moisese, o ui:

⁶ Ke ke fakaoviovi mai te faahiga o Levi, pea e ke tuku leva natou ke fakalogo ki te tagata faisakilifisio ko Alone, pea ke natou faifekau kia ia.

⁷ E natou fai anai tanatou gaue ia mua o te falela tapu o faifekau kia Alone mo te hahai katoa o Iselaele, pea e natou fai leva te u gaue fuli ki te falela tapu.

⁸ E natou tokaga anai ki te u mea gaue o te falela tapu pea e natou fai leva ki te hahai o Iselaele te u gaue fuli ae e aoga ki te falela tapu.

⁹ E ke fakaha anai ke fakalogo te kau Levi kia Alone mo ona foha, ki te tauhi o te sagatualio, pea ke natou fakafofoga leva te u fanau a Iselaele.

¹⁰ E ke fakanofo anai Alone mo ona foha ke natou fai te gaue a te tagata faisakilifisio lahi. Pea kapau e fakaoviovi he tagata kehe ki ai, pea e tautea anai ia ki te mate.

¹¹ Pea nee toe palalau leva te Eteleno kia Moisese:

¹² Ko au totonu ae kua au filifili te kau Levi i te u fanau ake fuli ae o Iselaele. E natou tauhi anai kia au o fetogi te u uluaki fuli o te u fanau a Iselaele.

¹³ Koteuhi i te aho ae nee au matehi ai te u uluaki o te kau Esipito, nee au fakatapui kia au te u foha uluaki fuli o te u fanau a Iselaele mo te u uluaki fuli o anatou faga manu: a aku leva natou, ko au ko te Eteleno.

¹⁴ Nee palalau leva te Eteleno kia Moisese i te toafa o Sinai, o ui:

¹⁵ Ke ke tohi te u foha o Levi o mulimuli ki onatou famili, pea mo onatou faahiga; ke ke tohi te u tagata fuli mai te mahina tahi o fai ki oluga.

¹⁶ Nee tohi leva natou e Moisese i te fakatotonu a te Eteleno, o mulimuli ki te fakatotonu ae nee tuku age kia ia.

¹⁷ Ko te u higoa o te u foha o Levi: ko Kelesoni, mo Keati, mo Melali.

¹⁸ Koeni te u higoa o te u foha o Kelesoni, o mulimuli ki onatou famili: ko Lipeni mo Simei.

¹⁹ Koeni te u foha o Keati, o mulimuli ki onatou famili: ko Amilame, mo Isea, mo Hepelone, mo Usiele;

²⁰ pea mo te u foha o Melali, o mulimuli ki onatou famili: ko Mali mo Musi. Ko te u famili aia o Levi, o mulimuli ki te u fale o anatou tamai.

²¹ Nee hau maia Kelesoni te famili o Lipeni mo te famili o Simei, ko te u famili aia o te kau Kelesoni.

²² Ko natou ae nee tohi, o lau mai te mahina tahi o fai ki oluga ko te toko fitu afe nimageau tagata (7 500).

²³ Nee nofo leva te faahiga o Kelesoni i muli o te falela tapu, i te potu uesite.

²⁴ Ko te pule o te kau Kelesoni ko Eliasafe, foha o Laele.

²⁵ Nee tokaga leva te kau Kelesoni ki te u koga aeni o te falela tapu: ki te falela taputapu, mo te falela tapu, mo te la fakamalumalu o te falela tapu i te u tafaaki, mo te lito tapunu o te uluaga o te falela tapu,

²⁶ mo te u puipui o te lotoa ae e ina takatakai te falela tapu mo te aletale, pea mo te u maea o te falela tapu. E natou tokaga leva ki te tauhi o te u mea fuli aia.

²⁷ Nee hau maia Keati te famili o te kau Amilame, mo te famili o te kau Isea, mo te famili o te kau Hepelone, mo te famili o te kau Usiele, ae ko te u famili o te kau Keati.

²⁸ Ko tonatou kaugamalie ko te toko valu afe onogeau tagata (8 600), mai te mahina tahi o fai ki oluga. Nee tuku kia natou te tauhi o te u mea tapu.

²⁹ Nee nofo leva te u famili o te u foha o Keati i te potu saute o te falela tapu.

³⁰ Ko tonatou pule ko Elisafani, foha o Usiele.

³¹ Nee tokaga leva te kau Keati ki te aleka tapu, mo te laupapa tapu, mo te tuuaga malama, mo te u aletale, mo te u mea gaue o te sagatualio, pea mo te lito tapunu o te potu taputapu. Nee natou tokaga leva ki te tauhi o te u mea fuli aia.

³² Ko te pule lahi o te kau Levi ko Eleasale, foha o te tagata faisakilifisio ko Alone; ko ia ae nee leoleo ki te u tagata ae nee gaue ki te sagatualio.

³³ Nee hau maia Melali te famili o te kau Mali mo te famili o te kau Musi.

³⁴ Ko tonatou kaugamalie i te tohi ko te toko ono afe luageau tagata (6 200), mai te mahina tahi o fai ki oluga.

³⁵ Ko tonatou pule ko Tuliele, foha o Apihaile. Nee natou nofo i te potu noleto o te falela tapu.

³⁶ Nee tokaga leva te kau Melali ki te u papa o te falela tapu, mo ona akau fakamaumau, mo ona pou, mo ona tuuaga pou, mo ona ipu fuli, pea mo ona mea gaue fuli.

³⁷ Pea nee natou toe tokaga foki ki te u pou o te lotoa, mo te u tuuaga pou, mo te u pike, mo te u maea.

³⁸ Nee nofo leva Moisese, mo Alone pea mo ona foha ia mua o te uluaga o te falela tapu, i te potu esite. Nee natou tokaga ki te taupau mo te tauhi o te sagatualio, i te higoa o te u fanau a Iselaele; pea e tautea anai ki te mate te tagata kehe fuli ae e fakaoviovi anai ki ai.

³⁹ Ko te kaugamalie o te kau Levi ko te toko uafulu ma lua afe tagata (22 000), mai te mahina tahi o fai ki oluga. Nee fai leva te tohi aia e Moisese mo Alone, o mulimuli ki te fakatotonu a te Eteleno, ke tohi te u tagata fuli o mulimuli ki te famili.

Totogi o te u tama uluaki tupu

⁴⁰ Nee palalau leva te Eteleno kia Moisese: Ke ke tohi te u higoa taki tahi o te u tagata uluaki fuli o te u fanau a Iselaele, mai te mahina tahi o fai ki oluga.

⁴¹ Pea ke vaehi kehe mai leva te kau Levi kia au, ko te Eteleno, o fetogi ai te u tagata uluaki fuli o te u fanau a Iselaele, pea ko te faga manu a te kau Levi ke fetogi ai te u manu uluaki fuli o te u fanau a Iselaele.

⁴² Nee tohi leva e Moisese te u tagata uluaki fuli o te u fanau a Iselaele o mulimuli ki te fakatotonu ae nee tuku e te Eteleno kia ia.

⁴³ Ko te u tagata fuli ae nee tohi, o lau mai te mahina tahi o fai ki oluga ko te toko uafulu ma lua afe luageau fitugofulu ma tolu tagata (22 273).

⁴⁴ Nee palalau leva te Eteleno kia Moisese, o ui:

⁴⁵ Ke ke vahei kehe mai kia au te kau Levi ke natou fetogi te u tagata uluaki fuli o te u fanau a Iselaele, pea mo te faga manu a te kau Levi ke fetogi ai anatou manu uluaki. Pea e fakalogo mai leva te kau Levi kia au. Ko au ko te Eteleno.

⁴⁶ Pea nee toe leva ke toe totogi te toko luageau fitugofulu ma tolu tagata uluaki (273) o te u fanau a Iselaele, ae nee fakalaka ake i te kau Levi.

⁴⁷ E ke tuku anai te totogi o te tagata ko te u foi piesi paaga e nima, i te paaga o te sagatualio, ae e kalame nima te mamafa o te foi piesi e tahi.

⁴⁸ Pea e tuku anai te paaga aia kia Alone mo ona foha; koena te mea ae e fai anai ki te toe totogi o te u tagata uluaki ae nee fakalaka ake i te kau Levi.

⁴⁹ Nee tanaki leva e Moisese te paaga ki te toe totogi o natou ae nee mole fetogi e te kau Levi.

⁵⁰ Pea nee ina mau leva mai te u foha uluaki o te u fanau o Iselaele te afe tolugeau onogofulu ma nima foi piesi paaga (1 365).

⁵¹ Pea nee ina tuku leva te paaga aia kia Alone mo ona foha, o mulimuli ki te fakatotonu ae kua tuku e te Eteleno.