NUMELO 2 - Ko te Tohi Tapu i te fakauvea

Fakatuutuu o famili i te nofoaga

¹ Nee palalau leva te Eteleno kia Moisese mo Alone, o ui:

² E tahi nonofo anai te u fanau a Iselaele ia tafa o te fuka o tona kau solia. E fakatuu anai te nofoaga i te takafoli o te falela tapu, o fakamamao mai ai.

³ I te potu esite, e tuu ai anai te nofoaga o Suta, mo tana fuka, mo tana fua tau. I hena e nofo ai anai te pule o te u foha o Suta ko Nasoni, foha o Aminatape,

⁴ mo tana fua tau ko te toko fitugofulu ma fa afe onogeau tagata (74 600).

⁵ E nofo anai i ona tafa te faahiga o Isakale, mo te pule o te faahiga o Isakale ko Netaneele, foha o Sua,

⁶ pea mo tana fua tau ko te toko nimagofulu ma fa afe fageau tagata (54 400).

⁷ Pea hoko atu ki ai te faahiga o Sapulone mo te pule o te u foha o Sapulone ko Eliape, foha o Elone,

⁸ mo tana fua tau, ko te toko nimagofulu ma fitu afe fageau tagata (57 400).

⁹ Ko te kaugamalie o te hahai tagata o te fua tau a Suta ko te toko teau valugofulu ma ono afe fageau tagata (186 400). E natou olo anai i mua.

¹⁰ I te potu saute, e tuu ai anai te nofoaga o Lupeni mo tana fuka, pea mo tana fua tau. E nofo anai i ai te pule o te u foha o Lupeni ko Elisule, foha o Seteule,

¹¹ mo tana fua tau ko te toko fagofulu ma ono afe nimageau tagata (46 500).

¹² E nofo leva i ona tafa te faahiga o Simeone, mo te pule o te u foha o Simeone ko Selumiele, foha o Sulisatai,

¹³ mo tana fua tau ko te toko nimagofulu ma hiva afe tolugeau tagata (59 300).

¹⁴ Pea hoko atu ki ai te faahiga o Kate, mo te pule o te u foha o Kate ko Eliasafe, foha o Leuele,

¹⁵ mo tana fua tau ko te toko fagofulu ma nima afe onogeau nimagofulu tagata (45 650).

¹⁶ Ko te kaugamalie o te fua tau a Lupeni ko tagata e teau nimagofulu ma tahi afe fageau nimagofulu tagata (151 450). E natou muli anai ia Suta.

¹⁷ Pea osi ia, pea e alu leva te falela tapu, o fakatahi mo te nofoaga o te kau Levi. E natou haele anai i te lotomalie o te u fua tau e lua ki mua pea mo te u fua tau e lua ki muli. E natou olo anai o mulimuli ki te nofo i te nofoaga, o tahi muli te tagata i te fuka o tona faahiga.

¹⁸ I te potu uesite, e tuu ai anai te fuka o te nofoaga o Efalaimi mo ana fua tau. Ko te pule o te u foha o Efalaimi ko Elisama, foha o Amiute.

¹⁹ Ko tana fua tau ko te toko fagofulu afe nimageau tagata (40 500).

²⁰ E nofo anai i ona tafa te faahiga o Manase. Ko te pule o te u foha o Manase ko Kameliele, foha o Petasuli.

²¹ Ko tana fua tau ko te toko tolugofulu ma lua afe luageau tagata (32 200).

²² Pea e hoko atu ki ai te faahiga o Pesamino. Ko te pule o te u foha o Pesamino, ko Apitane, foha o Kiteoni.

²³ Ko tana fua tau e toko tolugofulu ma nima afe fageau tagata (35 400).

²⁴ Ko te fakatahi o te u tagata o te fua tau o te nofoaga o Efalaimi ko tagata e toko teau ma valu afe teau tagata (108 100). E natou muli anai i te kau Levi.

²⁵ I te potu noleto, e tuu ai anai te fuka o te nofoaga o Tane, pea mo ana fua tau. Ko te pule o te u foha o Tane ko Aiesele, foha o Amisatai.

²⁶ Ko tana fua tau ko te toko onogofulu ma lua afe fitugeau tagata (62 700).

²⁷ E nofo anai i ona tafa te faahiga o Asele. Ko te pule o te u foha o Asele ko Pakiele, foha o Okalane.

²⁸ Ko tana fua tau ko te toko fagofulu ma tahi afe nimageau tagata (41 500).

²⁹ Pea hoko atu leva ki ai te faahiga o Nefetali. Ko te pule o te u foha o Nefetali ko Aila, foha o Enani.

³⁰ Ko tana fua tau ko te toko nimagofulu ma tolu afe fageau tagata (53 400).

³¹ Ko te katoa o te u tagata o te nofoaga o Tane ko te toko teau nimagofulu ma fitu afe onogeau tagata (157 600). E natou muli anai i tonatou fuka.

³² Ko te kaugamalie o te kau Iselaele ae nee tohi mai te faahiga, mo te fua tau, ko te toko onogeau ma tolu afe nimageau nimagofulu tagata (603 550).

³³ Nee mole tohi te u foha o Levi o fakatahi mo te u fanau ake ae o Iselaele, o mulimuli ki te fakatotonu ae nee tuku e te Eteleno kia Moisese.

³⁴ Nee fai katoa e te u fanau a Iselaele o mulimuli ki te mea ae nee fakatotonu e te Eteleno kia Moisese: nee natou nonofo ia tafa o anatou fuka, pea nee natou olo o mulimuli ki te fakatuutuu ae nee tuku e te Eteleno ki te u faahiga mo te u famili.