MALAKIA 3 - Ko te Tohi Tapu i te fakauvea

Ko ae e haele ia mua o te Mesia

¹ Koeni, e au fekaui leva taku tagata avelogo; E ina teuteui anai te ala i oku mua. Pea fokifa pe e ulu leva ki tona fale tapu te Aliki ae e kotou kumi; pea ko te tagata avelogo o te hai ae e koutou holi ki ai, koeni, e hau ia ia, E ui e te Eteleno o te atu fua tau.

² Ko ai e feala anai ke tuu i te aho o tana haele mai? Ko ai e tuu anai i oluga moka ha mai anai ia ia? Koteuhi e hage anai ia ia ko te afi a te tagata haka ukamea, Pee ko te topa a te tagata faifo.

³ E lala anai ia ia ki lalo, e ina haka anai, pea e ina fakamaa anai te siliva; E ina fakamaa anai te u foha o Levi, E ina fakamaa anai natou o hage ko te fakamaa o te aulo mo te siliva, Pea e natou fai anai ki te Eteleno ni molaga i te faitotonu.

⁴ Pea e lelei anai te molaga a Suta mo Selusalemi ki te Eteleno, O hage ko te u aho afea, o hage ko te u tau o te temi afea.

⁵ E au fakaovi anai kia koutou ki te fakamaau, Pea e au fakavilivili anai o fakamooni ki te kau kikite loi mo te kau tono fafine, Kia natou ae e fakapapau loi, Kia natou ae e natou taofi te totogi o te tagata gaue, Natou ae e natou fakamamahii te fafine hala ohoana mo te toe hala matua, Mo natou ae e agakokovi ki te matapule, pea mo natou ae e mole matataku kia au, E ui e te Eteleno o te atu fua tau.

⁶ Koteuhi ko au ko te Eteleno, e mole au fetogi. Pea ko koutou, fanau a Sakopo, nee mole kotou fetogi foki.

Molaga mo tapuakina

⁷ Talu mai te temi o akoutou tamai, nee koutou mavae i aku fakatotonu, Nee mole koutou tauhi natou. Koutou toe liliu mai kia au, pea e au toe liliu mai anai kia koutou, E ui e te Eteleno o te atu fua tau. Kae e koutou ui: Kotea te mea ae e tonu ke matou toe liliu mai ai?

⁸ Pe e kakaai e he tagata te Atua? Koteuhi e koutou kakaai au, Pea e koutou ui: Kotea te mea ae nee matou kakaai ai koe? I te u vaega hogofulu mo te u molaga.

⁹ Kua taai koutou e te malaia, Kae e kotou kakaai au, Te puleaga katoa!

¹⁰ Koutou aumai ki te fale tanaki koloa te u vaega hogofulu fuli, O tupu ke i ai he meakai i toku fale; Koutou ahiahii au i te mea aia, E ui e te Eteleno o te atu fua tau. Pea e koutou sio anai pe e mole au avahi anai Kia koutou te u matapa o te atu lagi, Pe e mole au liligi anai kia koutou te tapuakina o lahi osi.

¹¹ Kia koutou e au valoki anai ae e kai, Pea e mole ina maumaui anai te u fua o te kele, Pea e mole paa anai te vite i okotou ulu fenua, E ui e te Eteleno o te atu fua tau.

¹² E ui anai e te atu puleaga fuli kia koutou, manuia, Koteuhi e koutou liliu anai ko he fenua o te u mea lelei, E ui e te Eteleno o te atu fua tau.

Te kehekehe o te tagata agatonu mo te tagata agatuu i te aho o te Eteleno

¹³ E fiamealahi akoutou palalau kia au, e ui e te Eteleno, Pea e koutou ui: Kotea nee matou lau kia koe?

¹⁴ Nee koutou ui: E mole aoga te tauhi ki te Atua; Kotea nee tou mau i te tauhi o ana pelesepeto, Pea mo te haele i te mamahi, O uhi ko te Eteleno o te atu fua tau?

¹⁵ I te temi nei e matou ui: E manuia age ia natou ae e fiamaoluga; Io, e mau koloa age natou ae e agakovi. Io, e natou ahiahii te Atua, pea e natou haohaoa!

¹⁶ Pea nee palalau leva natou ae e matataku ki te Eteleno ia natou; Nee tokaga leva te Eteleno, pea nee fakalogo leva ia ia. Pea nee tohi leva he tohi fakamanatu i ona mua Kia natou ae e matataku ki te Eteleno Pea e fakaapaapa ki tona huafa.

¹⁷ E natou liliu anai ko taku hahai, e ui e te Eteleno o te atu fua tau, E natou liliu anai ko toku koloa mauhiga, I te aho ae e au teuteui. E au ofa anai kia natou, O hage ko he tagata e ofa ki tona foha ae e tauhi kia ia.

¹⁸ Pea e koutou toe sio anai ki te kehekehe O te tagata agatonu mo te tagata agakovi, O ae e tauhi ki te Atua Pea mo ae e mole tauhi kia ia.