LUA KOLONIKO 2 - Ko te Tohi Tapu i te fakauvea

Teuteu ki te laga o te fale tapu

¹ Nee fakatotonu leva e Salomone ke laga he fale ki te huafa o te Eteleno, pea mo he fale hau kia ia.

² Nee lau leva e Salomone ni tagata e fitugofulu afe ke natou amo te u kavega, mo ni tagata e valugofulu afe ke natou ta te u maka i te mouga, pea mo ni tagata e tolu afe onogeau ke natou leoleo kia natou.

³ Nee fekau leva e Salomone ke ui kia Ilame, te hau o Tile: Ke ke fai mai kia au o hage ko tau fai kia Tavite, taku tamai, ae nee ke aumai kia ia ni sete* ke fau aki ai tona fale nofo.

⁴ Koeni, e au laga he fale ki te huafa o te Eteleno, toku Atua, ke fakatapui kia ia, ke tutu ai te kaloni fakamagoni i ona mua, ke tuku tuumau ai te u pane tapu, pea ke momoli ai te u failaulau o te uhu, mo te afiafi, mo te u sapato, mo te u mahina foou, pea mo te u aho lalahi o te Eteleno, tomatou Atua, o mulimuli ki he lao heegata ki Iselaele.

⁵ Ko te fale ae e au fakatuu e tonu ke lahi, koteuhi e lahi age tomatou Atua i te u atua fuli.

⁶ Ka ko ai ae e feala ke ina laga he fale kia ia? Koteuhi koeni e mole feala ke hao ia ia i te laulahi katoa o te atu lagi. Pea ko ai au ke au lagai he fale kia ia? E au laga pe he fale ke tutu ai ni mea fakamagoni i ona mua.

⁷ Koia ke ke fekaui mai kia au he tagata ae e poto i te u gaue fuli o te aulo, mo te siliva, mo te sila, mo te ukamea, mo te u kie kula malama, mo te u kie kula fakapouli, mo te u kie uui, pea e toe poto foki i te togi o te u mea fakateuteu, o tupu ke gaue fakatahi ia ia mo te kau tagata popoto ae e nonofo mo au i heni, i Suta mo Selusalemi, natou ae nee filifili e Tavite, taku tamai.

⁸ Ke ke toe aumai foki kia au mai Lipane ni sete, mo ni sipele*, pea mo ni ahi; koteuhi e au iloi e popoto au tagata faifekau i te tuusi o te u akau o Lipane. Koeni, e gaue fakatahi anai aku tagata faifekau mo au tagata faifekau.

⁹ Ke ke tokonaki mai kia au he akau ke lahi osi, koteuhi e lahi anai pea e matalelei anai te fale ae ka au haga o fakatuu.

¹⁰ E au foaki anai ki au tagata faifekau ae e natou tuusi anai te akau ni fua fulumeto e uafulu afe, mo ni fua fulumeto olese* e uafulu afe, mo ni fua vino e uafulu afe, mo ni fua lolo e uafulu afe.

¹¹ Nee tali leva e Ilame, hau o Tile, kia Salomone i he tohi ae nee ina fakamomoli kia ia: Kua fakanofo ia koe e te Eteleno ke hau ki tana hahai, o tupu ko tona ofa kia natou.

¹² Nee toe ui foki e Ilame: Ke fakafetai ki te Eteleno, te Atua o Iselaele, ae nee ina fakatupu te atu lagi mo te kele, i tana foaki ki te hau ko Tavite he foha poto, mo fakapotopoto, pea mo atamai, ae ka ina fakatuu anai he fale ki te Eteleno pea mo he fale hau kia ia!

¹³ Koia e au fekaui atu anai kia koe he tagata poto mo fakakaukau,

¹⁴ ko Ulame-Api, ae e fae ki he fafine mai te kau taahine o Tane, pea e tamai ki he tagata mai Tile. E poto ia ia i te u faahiga gauei fuli o te aulo, mo te siliva, mo te sila, mo te ukamea, mo te maka, mo te akau, mo te u kie lanu hualotuma, mo te u lanu uui, mo te u kie hina pea mo te u gaueaga fakateuteu kehekehe fuli. E gaue anai ia ia mo te u tagata popoto o toku aliki ko Tavite, tau tamai.

¹⁵ I te lakaga nei, ke aumai e toku aliki ki ana tagata faifekau te fulumeto mo te olese, mo te lolo, pea mo te vino, ae nee palalau ia ia ki ai.

¹⁶ Pea ko matou, e matou tuusi anai te u akau mai Lipane, te akau fuli ae e aoga kia koe; e matou haihai anai te akau o fakamaanu atu ia ia i te tai o kaku ki Safo, pea e ke fakakaku anai ia ki Selusalemi.

¹⁷ Nee tae leva e Salomone te u tagata matapule fuli ae nee nonofo i te fenua o Iselaele, pea nee kau i te lau o Iselaele e Tavite, tana tamai. Nee mau leva ko te toko teau nimagofulu ma tolu afe onogeau.

¹⁸ Pea nee ina vahei leva te toko fitugofulu afe ki te amo, pea mo te toko valugofulu afe ki te ta o te u maka i te u mouga, pea mo te toko tolu afe onogeau ki te leo mo te lagiaki o te gaue a te hahai.