LUA HAU 2 - Ko te Tohi Tapu i te fakauvea

Too o Elia e te Atua i he saliote afi

¹ I te temi ae nee too ake ai leva ia Elia ke ave ki te lagi e te Eteleno i he ahiohio, nee mavae ia Elia mai Kilikale mo Eliseo.

² Nee ui leva e Elia kia Eliseo: E au kole atu kia koe, ke ke nofo i heni, koteuhi kua fekaui au e te Eteleno ki Petele. Pea nee tali leva e Eliseo: E mauli te Eteleno pea e mauli tou laumalie! E mole au mavae anai ia koe! Pea nee na hihifo leva ki Petele.

³ Nee omai leva kia Eliseo te u foha o te kau polofeta ae nee nonofo i Petele, o ui kia ia: Pe e ke iloi e too anai e te Eteleno tou pule mai tou foi ulu i te aho nei? Pea nee tali leva e Eliseo: E au iloi; kotou fakalologo.

⁴ Nee ui leva e Elia kia ia: Eliseo, nofo i heni koteuhi kua fekaui au e te Eteleno ki Seliko. Nee tali leva e Eliseo: E mauli te Eteleno pea e mauli tou laumalie! E mole au mavae anai ia koe. Pea nee na kaku leva ki Seliko.

⁵ Nee fakaoviovi ake leva kia Eliseo te u foha o te kau polofeta ae nee nonofo i Seliko, o ui kia ia: Pe e ke iloi e too anai e te Eteleno tou pule mai tou foi ulu i te aho nei? Pea nee ui leva e Eliseo: E au iloi foki; kotou fakalologo.

⁶ Nee ui leva e Elia kia Eliseo: E au kole atu kia koe, ke ke nofo i heni, koteuhi kua fekaui au e te Eteleno ki te Solotane. Nee tali leva e Eliseo: E mauli te Eteleno pea e mauli tou laumalie! E mole au mavae anai ia koe. Pea nee hoko atu tona fagona.

⁷ Nee fekaui ake leva he kau tagata e toko nimagofulu i te u foha o te kau polofeta, pea nee natou tutuu leva mai mamao o sisio kia naua, kae nee tutuu leva ia Elia mo Eliseo i te laugutu o te Solotane.

⁸ Pea nee too leva e Elia tona pulupulu o takatakai mo taai ki te vai o te Solotane, ae nee mavae lua leva, pea nee na fakalaka leva i te takele moamoa.

⁹ I tana osi fakalaka, nee ui leva e Elia kia Eliseo: Kole mai te mea ae e ke loto ke au fai kia koe, ia mua o taku mavae maia koe. Nee ui leva e Eliseo: E au kole atu kia koe ke hifo mai kia au he koga o tou laumalie fakakikite o liuga lua!

¹⁰ Nee ui leva e Elia: E ke kole he mea faigataa. Kae kapau e ke sio anai kia au i te temi ae e too ai au maia koe, pea e hoko anai te mea aena kia koe; pea kapau e mole ke sio anai ki toku ave, pea e mole hoko anai te mea aena.

¹¹ Nee na hoko atu leva tana haele, o faipalalau, pea fokifa leva kua vaei naua e he saliote afi mo ni hosi afi, pea nee hake leva ia Elia ki lagi i he ahiohio.

Gaue a Eliseo; ana uluaki milakulo

¹² Nee sio ia Eliseo mo tagi: Taku tamai! Taku tamai! Saliote a Iselaele mo tana kau tagata heka hosi! Pea nee mole toe sio leva ia ia kia Elia. Nee ina too leva ona teu o haei lua,

¹³ pea nee ina too leva te pulupulu ae nee fakato e Elia. Pea nee toe liliu leva ia ia, pea nee tuu leva ia ia i te laugutu o te Solotane;

¹⁴ nee ina too leva te pulupulu ae nee fakato e Elia, pea nee ina taai leva ki te vai, o ui: Kofea te Eteleno, te Atua o Elia? Pea nee ina toe taai foki te vai o te vaitafe, pea nee mavae lua leva te vai, pea nee fakalaka leva ia ia.

¹⁵ I te sisio leva a te u foha o te kau polofeta, ae nee nonofo i Seliko pea nee tutuu mai mamao, ki te mea ae nee fai e Eliseo, nee natou ui leva: Kua hifo te laumalie o Elia kia Eliseo! Pea nee natou omai leva o fakafelavei kia Eliseo, o punou onatou ulu ki te kele i ona mua.

¹⁶ Pea nee natou ui leva kia Eliseo: Koeni, e mau i au tagata faifekau ni tagata malolohi e toko nimagofulu, pe e ke loto ke natou olo o kumi tou pule? Naa mea age nee ave ia e te Laumalie o te Aliki o tuku i he mouga pee ko he vaevaeliua. Nee tali leva e Eliseo: Aua naa kotou fekaui natou.

¹⁷ Kae nee natou faiga fakamalohi leva kia ia, pea nee ui leva e Eliseo: Kotou fekaui natou. Nee fekau leva e te kau polofeta te kau tagata e toko nimagofulu, o natou kumi leva ia Elia ia aho e tolu, kae nee mole natou mau leva ia.

¹⁸ I tanatou toe liliu mai kia Eliseo, ae nee nofo i Seliko, nee ui leva e Eliseo kia natou: Pe nee mole au ui atu kia koutou ke aua naa kotou olo?

Te ipu foou mo te masima

¹⁹ Nee ui leva e te hahai o te kolo kia Eliseo: Koeni, e lelei te nofo i te kolo, o hage ko te sio ki ai a toku aliki; kae e kovi te vai, pea e kele kaka.

²⁰ Nee ui leva e Eliseo: Aumai kia au he pa foou, pea kotou liligi ki ai he masima. Pea nee natou ave leva te u mea aena kia Eliseo.

²¹ Nee alu leva ia Eliseo ki te matapuna o te vai, pea nee ina laku leva ki ai te masima, o ui: Koeni te folafola a te Eteleno: E au fakamauli te vai aeni, pea e mole toe mau anai mai ai te mate mo te paa.

²² Pea nee mauli leva te vai o kaku mai ki te aho nei, o mulimuli ki te palalau ae nee fakaha e Eliseo.

Tautea o te kau nukinuki

²³ Nee hake leva ia Eliseo mai Seliko ki Petele; kae i tana hake i te ala, nee feulufi mai leva ni toe mai te kolo, o nukinuki kia ia. Nee natou ui kia ia: Hake, foi ulu tela! Hake, foi ulu tela!

²⁴ Nee maliu leva ki muli ia Eliseo, o sio ki te u toe, pea nee ina fakamalaia leva natou i te huafa o te Eteleno. Pea nee omai leva ni uluso e lua mai te vao, o kai te u toe e toko fagofulu ma lua.

²⁵ Nee alu leva ia Eliseo mai te kogamea aena ki te mouga o Kalemelo, pea nee toe liliu leva ia ia i ai ki Samalia.