LEVITIKO 2 - Ko te Tohi Tapu i te fakauvea

Molaga falaoa

¹ Kapau leva e fai e he tagata hana molaga meakai ki te Eteleno, e ina fai anai tana molaga aki te falaoa hihina; pea e ina liligi anai he lolo ki oluga pea e ina toe tuku anai ki ai he iseso.

² E ina ave anai te molaga ki te kau faisakilifisio, foha o Alone; pea e ina too anai aki tona nima he kii lukuga i te falaoa aia ae kua palapalai aki te lolo, mo te iseso katoa, pea e tutu anai e te tagata faisakilifisio te u mea fuli aia i oluga o te aletale o hage ko he fakamanatu. Ko he molaga tutu ia e te afi, pea ko he mea magoni lelei ia ki te Eteleno.

³ E tuku anai te koga ae nee toe i te molaga kia Alone mo ona foha; ko he vaega maonioni lahi ia i te u sakilifisio ae kua tutu e te afi ia mua o te Eteleno.

⁴ Kapau e ke fai he molaga aki he mea ae kua fakamoho i te gutuumu, pea e ke fakaaoga pe te falaoa hihina, pea e ke fai ni keke ae kua natu aki he lolo e hala fakatupu, pea mo ni pane maninifi hala fakatupu pea kua vali aki te lolo.

⁵ Pea kapau ko tau molaga, ko he mea ae kua fakamoho i te fakapaku, pea e ke fai anai ia aki he falaoa hihina ae kua natu aki he lolo pea hala fakatupu.

⁶ E ke tofi anai ia, pea e ke liligi anai i oluga he lolo: ko he molaga meakai ia.

⁷ Pea kapau ko tau molaga ko he mea ae kua tunu i te ukamea vagavaga, e ke fai anai aki te falaoa hihina ae kua natu aki te lolo.

⁸ E ke ave anai te molaga ae kua fai aki te u mea aena ki te Eteleno; e ke tuku anai ia ki te tagata faisakilifisio, ae e ina ave anai ki te aletale.

⁹ E too anai e te tagata faisakilifisio i ai te mea ae e tonu ke momoli ki te fakamanatu, pee e ina tutu anai ia i oluga o te aletale. Ko he molaga ia kua tutu e te afi, pea ko he mea magoni lelei ia ki te Eteleno.

¹⁰ E tuku anai te mea ae e toe i te molaga kia Alone mo ona foha; ko he vaega taputapu ia i te u sakilifisio ae kua tutu e te afi ia mua o te Eteleno.

¹¹ Aua naa kotou fai anai ki te Eteleno he molaga mo he fakatupu; aua naa kotou tutu anai i he aho te mea ae e mau ai he fakatupu pee ko he meli i te u molaga ae kua tutu e te afi ia mua o te Eteleno.

¹² E feala anai ke kotou fai he molaga ae e mau ai he fakatupu mo he meli i te aho ae e kotou momoli ai te u uluaki fua, kae aua naa ke momoli anai ia i te aletale o hage ko he molaga ae e magoni lelei ki te Eteleno.

¹³ E ke huai anai he masima ki au molaga meakai fuli; e mole ke tuku anai tau molaga ke hala masima, koteuhi ko te masima ko te fakailoga ia o te hai ae kua fai e te Atua mo koutou. Koia e tonu ai ke ke tuku he masima i oluga o au molaga fuli.

Molaga o uluaki fua

¹⁴ Kapau e kotou fai anai ki te Eteleno he molaga aki te u uluaki fua o te kele, pea e kotou momoli anai ni fuhiga fulumeto foou, ae kua tunu i te afi pea kua tuki ke malu, ko he molaga aia o te u fua foou.

¹⁵ E ke huhua anai he lolo i oluga, pea e ke toe hili anai ki oluga he iseso. Ko he molaga meakai ia.

¹⁶ E tutu anai e te tagata faisakilifisio he koga o te u fuhiga fulumeto ae kua tuki fakamalu, mo te lolo, pea mo te iseso katoa. Ko he molaga ia kua tutu e te afi ia mua o te Eteleno.