HAPAKUKE 3 - Ko te Tohi Tapu i te fakauvea

Katiko a Hapakuke

¹ Ko te kole a te polofeta ko Hapakuke, ae nee faufau o hage ko he hiva mate.

² Eteleno, nee au logo ki te mea ae nee ke fakaha, pea kua au fonu i te mataku. Oi Eteleno, fakahoko tau gaueaga lolotoga te u tau ka hoko mai! Io, fakaha ia ia i te u tau ka hoko mai! Kae i tou hauhau, manatui ou manavaofa!

³ E hau te Atua mai Temane, E hau te Sagato mai te mouga o Palani… E fakafonu e tana afio te atu lagi, Pea e fakafonu e tona kololia te kele.

— Mamanava.

— Mamanava.

⁴ E hage ko te gigila o te malama; E mavae ni kave gigila i tona nima, I hena e nofo ai tona malohi.

⁵ I ona mua e haele ai te taimahaki, Pea e muli ia ia te taimahaki.

⁶ E tuu ia ia, pea e ina fuafua te kele aki ona mata; E sio ia ia, pea e ina fakatete te atu puleaga. E mafahifahi te u mouga lalahi afea, E holo te u mouga liliki afea, E avaava te u ala afea i ona mua.

⁷ E au sio kua nonofo i te mamahi te u falela o Etiopia, Pea kua nonofo i te mataku te u falela o te fenua o Matiane.

⁸ Pe e ita te Eteleno ki te u vaitafe? Pe e mu tou ita ki te u vaitafe? Pe ko te tai ae e ke liligi ki ai tou hauhau, Ke ke heka ai ki au hosi, Pea mo tau saliote o te malo?

⁹ Kua telefua tau nahau, Ko te u malaia ko te u nahau o au folafola… E ke fahii te kele ke hali ai te u vaitafe.

— Mamanava.

— Mamanava.

¹⁰ E tete te u mouga i tanatou sisio kia koe, E fakalofia e te u ua malohi te kele, E gugulu te moana loloto, E ina lagai ona galu o kaku ki te lagi.

¹¹ I te malama o au nahau ae e lele, I mua o te tapa gigila o tau tao, E tutuu te laa mo te mahina i ona nofoaga.

¹² E ke folii te kele i tou itaita, E ke malamalaki te atu puleaga i tou hauhau.

¹³ E ke ulu mai o haofaki tau hahai, O haofaki tau filifiliia. E ke fasii te fakafisi o te fale o te tagata agakovi, E ke maumaui osi tona fale katoa…

— Mamanava.

— Mamanava.

¹⁴ E ke hoka aki au nahau te ulu o ona pule, Ae e oho mai kia au o hage ko he afa, ke natou fakamavetevete au, Kua natou taukalaga fakafiafia, O hage kua natou folo te tagata fakaofaofa i tona nonoaga.

¹⁵ E ke malamalaki te tai aki au hosi, mo te pela o te atu vai lalahi.

¹⁶ Nee au logo… Pea nee malave i oku tootooga. I te leo aia, e tete oku laugutu, E osiosi oku hui, Pea e tete oku tuli: E tonu ke au talitali fakalologo ki te aho o te mamahi, Te aho ae e haele ai anai te tagata fakataga ki te hahai.

¹⁷ Koteuhi e mole matala anai te fiki, E mole tuku anai e te vite he mea, E puli anai te fua o te oliveto, E mole tuku anai e te u gaueaga he meakai; E pupuli anai te u ovi i te u lotoa manu, Pea e mole toe mau anai ni pipi i te u fale manu.

¹⁸ Kae, e au loto ke au fakafiafia i te Eteleno, E au loto ke au fakafiafia i te Atua o toku fakamauli.

¹⁹ Ko te Eteleno, te Aliki, ko toku malohiaga; E ina fakaliliu oku vae o hage ko ae o te u tia fafine, Pea e ina fakahaele au i oku potu maoluga. Ki te pule o te kau hiva. Ki ni mea faimusika uka.