HAPAKUKE 2 - Ko te Tohi Tapu i te fakauvea

Te tui malohi a Hapakuke

¹ Nee au nofo i toku nofoaga, pea nee au tuu i oluga o te tule; Nee au alaala, ke sio ki te mea ae e fakaha mai anai kia au e te Eteleno, Pea mo te mea ae e au tali anai i te osi o taku tagi.

² Nee palalau mai leva te Eteleno kia au, o ui: Tohi te folafola fakakikite: Togi ia ia i ni laupapa, o tupu ke lau tuumau ia ia.

³ Koteuhi ko he folafola kikite ae kua osi tona temi i te fakatuutuu, E haele ia ia ki tona fakahoko, pea e mole loi anai ia ia; Kapau e tuai ia ia, talitali ki ai, Koteuhi e hoko anai ia ia, E hoko mooni anai ia ia.

⁴ Koeni, nee makita tona laumalie, e mole totonu ia ia i tona loto; Kae e mauli anai te tagata agatonu i tana tui.

Fakamaaui o te tagata fakataga

⁵ Tatau mo ae e kona mo matasoka, E mole feala ke fimalie te tagata fiamealahi; E ina avahi laulahi tona gutu o hage ko te nofoaga o te kau mate, E mole makona ia ia i he temi o hage ko te mate, E ina aumai kia ia te atu puleaga fuli, E ina fakatahii ki ona tafa te u hahai fuli.

⁶ Pe e mole liliu anai ia ia ki te hahai fuli ko ni mea fakakatakata, Mo he mea nukinuki mo he mea fakaofolele? E ui anai: Malaia ki te tagata ae e ina fakatuuga te u mea ae e mole ko ni ana mea! E kaku anai ki afea?… Malaia ki te tagata ae e ina fakatuuga ona maua!

⁷ Pe e mole malaga fakapunamauli ake anai natou ae e ke tuu maua ki ai? Pe e mole alaala ake anai natou ae nee ke popula ki ai? Io, e ke liliu anai ko tanatou meakai.

⁸ O tupu nee ke kaihaa ni puleaga kaugamalie osi, E kaihaa anai ia koe e te toega fuli o te hahai; Koteuhi nee ke liligi te toto o ni tagata, Nee ke fai ni agamalohi i te fenua, Ki te kolo mo tana hahai katoa.

⁹ Malaia ki ae e ina tanaki ki tona fale ni totogi kaihaa, O tupu ke fakatuu tona fatai i he kogamea maoluga, Ke hao ai mai te nima o te malaia!

¹⁰ Ko te matagafua aena o tou fale totonu aena kua ke fakatuu, I tau maumaui ni hahai kaugamalie, Pea ko koe totonu ae kua ke agahala ki ai.

¹¹ Koteuhi e kalaga te maka i lotomalie o te kaupa, Pea e tali ki ai te akau ae e ina fakahohoko te kanofale.

¹² Malaia ki ae e ina fakatuu he kolo aki te toto, Ae e ina fakatuu he kolo aki te agakovi!

¹³ Koeni, kua fakapapau te Eteleno o te atu fua tau: E gaue te hahai ki te afi, E kinakina noa te atu puleaga.

¹⁴ Koteuhi e fonu anai te kele i te iloilo o te kololia o te Eteleno, O hage ko te takele o te moana ae e fonu i te vai ae e ina uufi ia ia.

¹⁵ Malaia ki ae e ina fakainu tona oloi, Kia koe ae e ina liligi tau hina vino ke fakainu ai ia ia ke kona, O tupu ke sio ki tona telefua!

¹⁶ E ke makona anai i te ufiufi o lahi age i te kololia; Ke ke inu foki mo koe totonu, pea ke ke nofo telefua! E maliu anai kia koe te ipu o te nima matau o te Eteleno, Pea e ulihi anai tou kololia e te ufiufi.

¹⁷ Koteuhi e to anai kia koe te u agamalohi ae nee fai ki Lipane, Pea e fakamatakutakui anai ia koe e te u maumau o te u manu, O tupu nee ke liligi te toto o ni tagata, Pea nee ke fai ni agamalohi i te fenua, Ki te kolo mo tana hahai fuli.

¹⁸ Kotea te aoga o he fakatata togi, ke tupu ai tona ta e he tagata tufuga? Kotea te aoga o te fakatata ukamea haka ae e ina ako te loi, Ke tupu ai te tuku e te tagata tana falala kia ia, Kae ko te mooni e ina lolotoga fau ni taulaatua gutu mate?

¹⁹ Malaia ki ae e ui ki te akau: Tuu ki oluga! Ki he foi maka gutu mate: Alaala! Pe e ina fakaha anai he mea? Koeni, e teuteui ia ia aki te aulo mo te siliva, Kae e mole mau ia ia he laumalie ae e ina fakamauli ia ia.

²⁰ E nofo te Eteleno i tona fale tapu maonioni. Ke fakalologo te kele katoa i ona mua!