Tohi a Paulo ki te kau EFESO 5 - Ko te Tohi Tapu i te fakauvea

Mauli i te malama

¹ Koia kotou liliu ko te u faifaitaki o te Atua, o hage ko he u fanau ofaina;

² pea kotou haele i te ofa o faifaitaki kia Kilisito ae nee ofa kia tatou, pea nee ina foaki ia ia totonu ki te Atua o uhiga mo tatou, o hage ko he molaga mo he sakilifisio magoni ki te Atua.

³ Ke aua pe naa palalaui ia koutou te feauaki, mo te u mea uli fuli, mo te manumanu, koteuhi e mole gali ia mo te kau sagato.

⁴ Ke aua naa logo ia koutou ki ni palalau kovi, mo ni palalau fakavale, mo ni fakahuahua, koteuhi e mole gali te u mea aia mo te fakaapaapa; kae ke logo tafito ki ni fakafetai.

⁵ Koteuhi, ke kotou iloi, e mole he tagata feauaki, mo he tagata agauli, mo he tagata manumanu, (ko tona uhiga e tauhi taulaatua) e ina mau tofiga te puleaga o Kilisito mo te Atua.

⁶ Ke aua naa kakaai koutou e he tahi aki ni palalau vaiga; koteuhi ko te u mea aena nee tupu ai te hifo o te hauhau o te Atua ki te u fanau logogataa.

⁷ Koia ke aua pe naa kotou fakatahi i he mea mo natou,

⁸ koteuhi i mua nee kotou fakapouli, kae i te temi nei kua kotou malama i te Aliki. Koutou haele o hage ko ni fanau o te malama!

⁹ Koteuhi ko te fua o te malama ko te u agalelei fuli, mo te u faitotonu fuli, pea mo te u mooni fuli.

¹⁰ Kotou kumi te mea ae e lelei ki te Aliki;

¹¹ kae aua naa kotou kau ki te u gaue hee fua a te fakapouli, kae kotou aumai natou ki te malama.

¹² (Koteuhi e fakaufiufi te palalau ki te mea ae e natou fai fakafufu;)

¹³ kae kapau e fakaha te u mea fuli aena ki te malama, e ha anai tonatou natula totonu, koteuhi ko te u mea fuli e fakaha fena e liliu o malama.

¹⁴ Koia e ui ai: Ke ke alaala, ia koe ae e moe, Ke ke tuu mai te kau mate, Pea e fakamalamai anai ia koe e Kilisito.

¹⁵ Koia kotou tokaga aupito ki takotou haele, ke aua naa kotou hage ko he kau vale, kae kotou hage ko he kau poto;

¹⁶ kotou totogi te temi, koteuhi kua kovi te u aho.

¹⁷ Koia ke aua naa kotou hala atamai, kae ke koutou mahino ki te finegalo o te Aliki.

¹⁸ Aua naa kotou konahia i te vino, ko te mauli fakavale aia; kae ke kotou fonu i te Laumalie.

¹⁹ Kotou fefakalotomalohiaki aki ni pesalemo, mo ni katiko, pea mo ni hiva fakalaumalie, o kotou hiva mo fakavikiviki ki te Aliki i tokotou loto katoa.

²⁰ Kotou fakafetai tuumau ki te Atua te Tamai i te u mea fuli, i te huafa o totatou Aliki ko Sesu-Kilisito.

²¹ Kotou fefakalogoaki ia koutou i te fakaapaapa kia Kilisito.

Te famili fakakilisitiano

²² U fafine ohoana, ke kotou tahi fakalogo ki tona ohoana, o fakatatau ki te Aliki;

²³ koteuhi ko te tagata ko te pule ia o te fafine, o hage ko Kilisito ko te pule ia o te Ekelesia, ae ko tona sino, pea ko ia foki ko tona Fakamauli.

²⁴ Kae, o hage ko te Ekelesia ae e fakalogo kia Kilisito, ke fakalogo foki te fafine ki tona ohoana i te u mea fuli.

²⁵ U tagata ohoana, koutou tahi ofa ki tona ohoana, o hage ko Kilisito nee ofa ki te Ekelesia, pea nee ina foaki ia ia totonu o uhiga mo ia,

²⁶ ke ina fakamaonioni ia, mo ina fakamaa ia, pea mo ina fufulu ia aki te vai o te folafola,

²⁷ koteuhi ke ina fakaha ia kia ia, ko te Ekelesia fakakololia, hee uli, hee fefe, hee maimoa, kae maonioni mo hee mele.

²⁸ E tonu ke ofa fena te tagata ki tona ohoana o hage ko tona sino totonu. Ko te tagata ae e ofa ki tona ohoana e ofa kia ia totonu.

²⁹ Koteuhi e heeki he tagata kua fehia ki tona sino totonu, kae e ina fafaga ia mo tokaga ki ai, o hage ko Kilisito ki te Ekelesia,

³⁰ he ko te u kogasino tatou o tona sino.

³¹ Koia e mavae anai te tagata mai tana tamai mo tana fae, pea e pipiki anai ia ki tona ohoana, pea e na liliu anai ko he kakano e tahi.

³² E lahi te misitelio aeni; pea e au fakaha ko te mea aeni e uhiga mo Kilisito pea mo te Ekelesia.

³³ Kae e toe uhiga foki mo koutou: Ke tahi ofa te tagata ki tona ohoana o hage kia ia totonu, pea ke fakaapaapa te fafine ki tona ohoana.