Tohi a Paulo ki te kau EFESO 3 - Ko te Tohi Tapu i te fakauvea

Misitelio fakafufu o te Atua

¹ Uhi ko te mea aia, ko au Paulo, ko te tagata pilisoni a Kilisito o uhiga mo koutou te hahai pagani…

² mo kapau kua kotou logo ki taku fakaha te kalasia o te Atua nee foaki mai kia au o uhiga mo koutou:

³ Ko te Atua ae nee ina tuku mai kia au i he levelasio* te misitelio aia kua au tohi atu kia koutou i ni kii kupu sii.

⁴ I takotou lau natou, e feala ke kotou malama ki te atamai e au mau o uhiga mo te misitelio o Kilisito.

⁵ Nee mole fakaha te misitelio aeni ki te u foha o te u tagata i te u taitupu mua, o hage ko tona fakaha i te temi nei e te Laumalie ki te kau apositolo maonioni mo te kau polofeta a Kilisito.

⁶ Ko te misitelio aia: Kua kau te kau pagani ki te tofiga, pea kua natou liliu ko he sino e tahi, pea kua natou kau ki te fakapapau e tahi ia Sesu-Kilisito aki te Evaselio.

⁷ Kua au liliu ko te tagata gaue a te Evaselio, o mulimuli ki te meaofa o te kalasia nee foaki mai kia au e te Atua, aki te gaue o tona mafimafi.

⁸ Kia au, ae e veliveli osi i te kau sagato fuli, kua tuku mai kia au te kalasia aia ke au fakaha ki te hahai pagani te u koloa loloto o Kilisito,

⁹ pea ke iloi e te u tagata fuli te misitelio nee fufu talu mai te kamataaga i te Atua ae nee ina fakatupu te mea fuli.

¹⁰ Koteuhi i te temi nei, aki te Ekelesia, ke iloi e te kau pule mo te kau mafimafi o te u potu fakalagi te poto heegata o te Atua i ona aluaga kehekehe.

¹¹ Nee fai e te Atua o mulimuli ki tana fakatuutuu heegata nee ina fau ia Sesu-Kilisito totatou Aliki;

¹² ia ia e tou mau ai, aki te tui kia ia, te ateaina ke tou fakaoviovi ai ki te Atua i te falala.

¹³ Koia e au kole ai kia koutou ke aua naa kotou lotovaivai uhi ko te u mamahi e au tali o uhiga mo koutou: ko tokotou kololia natou.

Ofa lahi o Kilisito

¹⁴ Koia e au peluki ai oku tuli ia mua o te Tamai,

¹⁵ ae e hau mai ai te u higoa o te u famili fuli i te lagi mo te kele,

¹⁶ ke ina foaki atu kia koutou, o mulimuli ki te koloa o tona kololia, ke fakamalohii koutou e tona Laumalie i te tagata loto,

¹⁷ pea ke nofo Kilisito i okotou loto aki te tui, pea ke kotou tauaka mo fakatafito i te ofa,

¹⁸ pea ke kotou mahino mo te kau sagato fuli ki te laulahi, mo te loa, mo te loloto, pea mo te maoluga,

¹⁹ pea ke kotou iloi te ofa o Kilisito, ae e fakalaka i te u iloilo fuli, pea ke kotou fonu o kaku ki te katoa o te Atua.

²⁰ Ki te Atua ae e ina fealagia te fakahoko o lahi maumau age i te u mea fuli e tou kole pee tou manatu ki ai, aki te malohi ae e gaue ia tatou,

²¹ ke tuku kia ia te kololia i te Ekelesia pea ia Sesu-Kilisito, i te u taitupu fuli, i te u sekulo mo te u sekulo! Ameni!