Tohi a Paulo ki te kau EFESO 2 - Ko te Tohi Tapu i te fakauvea

Fakamauli i te kalasia

¹ Nee kotou mamate i akotou logogataa mo akotou agahala,

² ae nee kotou haele ai i mua, o mulimuli ki te teka o te malamanei, o mulimuli ki te aliki o te malohi o te aele, o te laumalie ae e gaue nei i te u foha o te logogataa.

³ Pea ko tatou fuli foki, nee tou kau ia natou, pea nee tou mauli i mua o mulimuli ki te u holi kovi o totatou kakano, o fai te u loto o te kakano mo atatou manatu; pea ko ni fanau tatou o te hauhau i te natula, o hage ko te u tagata fuli.

⁴ Kae ko te Atua, ae e maukoloa i te manavaofa, o uhiga mo te ofa lahi ae nee ofa ai ia kia tatou,

⁵ tatou ae nee mamate i atatou logogataa, kua ina fakamauli tatou fakatahi mo Kilisito (kua kotou mauli i te kalasia);

⁶ kua ina fakatuuake tatou fakatahi, pea kua ina fakaheka tatou fakatahi i te u potu fakalagi, ia Sesu-Kilisito,

⁷ ke fakaha i te u sekulo ka hau te maukoloa heegata o tona kalasia i tona agalelei kia tatou ia Sesu-Kilisito.

⁸ Koteuhi nee fakamauli koutou aki te kalasia, aki te tui. Pea e mole hau te mea aia maia koutou, ko te meaofa ia o te Atua.

⁹ Pea e mole uhi ko te u gaue, koteuhi ke aua naa fakakololiai ai he tahi.

¹⁰ Koteuhi ko tatou ko tana gaueaga, ae nee fakatupu ia Sesu-Kilisito ki he u gaue lelei, ae nee teuteui fakatomua e te Atua, ke tou fai natou.

Fakatahi a te kau Sutea mo te kau pagani ia Kilisito

¹¹ Koia, ko koutou hahai pagani i mua i te kakano, nee fakahigoa ko te kau hee silikosisio e natou ae e ui ko te kau silikosisio koteuhi nee silikosisioi natou i te kakano e te nima o te tagata,

¹² kotou manatui i te temi aia, nee kotou hala Kilisito, mo hala kolo i Iselaele, mo matapule ki te u hai o te fakapapau, mo hala amanaki lelei, pea mo hala Atua i te malamanei.

¹³ Kae i te temi nei, ia Sesu-Kilisito, ko koutou ae nee mamao i mua, kua fakaoviovi mai koutou e te toto o Kilisito.

¹⁴ Koteuhi ko totatou tokalelei ia, ia ia ae kua ina fai aki te u mea e lua he mea e tahi, pea kua ina maumaui te kaupa fakamavaevae i loto, te fefiliaki.

¹⁵ Pea kua ina holoi i tona sino te lao o te u fakatotonu i ana lekula; pea kua ina loto ke fakatupu ia ia kia naua toko lua he tagata foou e tahi, o fakatuu te tokalelei;

¹⁶ pea ke fakatokatoka naua mo te Atua i he sino e tahi i te koluse, o maumaui te fefiliaki i te koluse.

¹⁷ Pea nee hau ia o fakaha te tokalelei kia koutou ae nee mamao, pea mo te tokalelei kia natou ae nee ovi;

¹⁸ koteuhi ia ia, ko koutou mo matou, e tou mau he uluaga ki te Tamai i he Laumalie e tahi.

¹⁹ Koia, e mole ko ni matapule koutou, pee ko ni tagata mai tua; kae kua kotou kau ki te kolo o te kau sagato, mo te fale o te Atua.

²⁰ Kua fakatuu koutou i te fakatafito o te kau apositolo mo te kau polofeta, Sesu-Kilisito totonu, ae ko te maka agele.

²¹ Ia ia e fehokoaki lelei osi te fale katoa, o malaga ki oluga ke liliu ko he fale tapu maonioni ki te Aliki.

²² Ia ia kua fau foki koutou ke liliu ko he nofoaga o te Atua i te Laumalie.