Tohi a Paulo ki te kau KOLOSE 2 - Ko te Tohi Tapu i te fakauvea

Tupu tagata o te Atua ia Kilisito

¹ Koia, e au loto ai ke kotou iloi te lahi o te tau ae e au fai o uhiga mo koutou, pea mo natou e nofo i Laotise, pea mo natou fuli ae e heeki sio ki oku mata,

² koteuhi ke fonu onatou loto i te fakapelepele, ke natou pipiki tahi i te ofa, pea ke natou maukoloa i he atamai fonu ke natou iloi te misitelio o te Atua, ia Kilisito,

³ misitelio ae e fufu ai te u koloa fuli o te poto pea mo te iloilo.

Valoki o te u akonaki loi

⁴ E au fakaha te mea aena ke aua naa kakaai koutou e he tahi aki ni palalau logolelei.

⁵ Koteuhi, kapau e au puli i te sino, e au nofo mo koutou i te laumalie, o sio mo fiafia ki te tokalelei ae e mau ia koutou, pea mo te malohi o takotou tui kia Kilisito.

⁶ Koia, o hage ko takotou tali te Aliki ko Sesu-Kilisito, koutou haele ia ia,

⁷ o koutou tauaka mo fakatafito ia ia, mo tuu malohi i te tui, o mulimuli ki te u akonaki ae nee tuku atu kia koutou, pea mo tuputupua i te fakafetai.

Valoki o te filosofia mo te tauhi fakalao

⁸ Koutou tokaga naa hele koutou e he tahi aki te filosofia pea mo he kaka alunoa, o falala ki te talatisio a te u tagata, pea ki te u malohi fakalaumalie o te malamanei, kae mole kei fai kia Kilisito.

E mau te u mea fuli ia Kilisito

⁹ Koteuhi e nofo fakasino ia ia te katoa pau o te Atua.

¹⁰ E kotou mau ia ia te katoa o te mea fuli, ae ko te ulu o te pule fuli pea mo te malohi fuli.

¹¹ Pea ia ia nee silikosisioi foki koutou aki he silikosisio ae nee mole fai e te nima o te tagata, kae aki te silikosisio a Kilisito, ae ko te fakamasiva o te sino o te kakano:

¹² He nee tanu fakatahi koutou mo ia i te papitema, pea nee kotou toe tuuake foki ia ia pea fakatahi mo ia, aki te tui ki te mafimafi o te Atua, ae nee ina toe fakatuuake foki ia mai te kau mate.

¹³ Koutou nee mate i akotou agahala pea mo te hee silikosisio o tokotou kakano, pea nee ina fakamauli fakatahi koutou mo ia, i tana fakamolemole atatou agahala fuli;

Nee fakahoko e Kilisito te u tauhi fuli o te lao

¹⁴ pea nee ina holoi te tohi fakamooni nee tuu ai te u mea fuli nee tuku kia tatou pea nee taofi kia tatou; pea nee ina pulihi ia, o ina tutuki ia ki te koluse;

¹⁵ pea nee ina maumaui i te mea aia te malohi o te kau pule mo te kau malolohi, pea nee ina tuku natou ke katai e te hahai, i tana malo ia natou i te koluse.

¹⁶ Koia, ke aua naa fakamaaui koutou e he tahi o uhiga mo te meakai, mo te meainu, pee ko he aho lahi, pee ko he mahina foou, pee ko he sapato:

¹⁷ Ko te u mea fuli aia ko te ata o te u mea ka hoko mai, kae ko te sino ko Kilisito.

Valoki o te atolasio mo te tauhi ki te u aselo

¹⁸ Ke aua naa kakaai koutou e he tahi o uhiga mo te totogi o te lele, aki he agamalu i tafa pea mo he tauhi ki te kau aselo; koteuhi e makita ia i te fiamealahi vaiga i ana sio fakalaumalie, pea mo ana manatu fakasino,

¹⁹ kae e mole pipiki ia ki te ulu, ae e ina fafaga mo fakatahii te sino katoa i ona hokoga mo ona hai, pea e ina tuku kia ia te tutupu o mulimuli ki tona finegalo.

Valoki o te sesunio mo te fakamamahi

²⁰ Kapau kua kotou mate mo Kilisito ki te u lao noa o te malamanei, kotea, o hage kei kotou mauli i te malamanei, e fakamaua ai kia koutou te u lekula aeni:

²¹ Aua naa ke fafa! Aua naa ke kai! Aua naa ke milihi!

²² Lekula ae e liliu fuli o kovi i te fakaaoga tuumau, pea e fakatafito pe natou aki ni fakatotonu mo ni akonaki a te u tagata?

²³ E mooni, e natou mata fakapotopoto, koteuhi e natou palalau ki he fia lotu, mo he agavaivai, pea mo he fakamamahi o te sino; kae e mole hona aoga, gata pe ki te fakafimaliei o te kakano.