TOHI GAUE A TE KAU APOSITOLO 2 - Ko te Tohi Tapu i te fakauvea

Hifo o te Laumalie Maonioni

¹ I te aho lahi o te Penikosite, nee natou nonofo fuli fakatahi i te kogamea e tahi.

² Pea fokifa pe nee hau leva mai te lagi he gugulu o hage ko ae a he matagi malohi, pea nee ina fakafonu te fale katoa nee natou nonofo ai.

³ Nee ha leva kia natou ni alelo, o hage ko ni aleloi afi, pea nee natou mavetevete o tahi tuu kia natou takitahi.

⁴ Pea nee natou fonu fuli leva i te Laumalie Maonioni, pea nee natou kamata palalau leva i ihi age lea, o mulimuli pe ki tona foaki age kia natou e te Laumalie Maonioni ke natou palalau.

⁵ I te u aho aena, nee nonofo i Selusalemi he kau Sutea, tagata tauhi lotu lelei, mai te u puleaga fuli o te lalo lagi.

⁶ I te logoaa nee hoko, nee fakatahitahi age leva te hahai kaugamalie, pea nee natou heia leva koteuhi nee natou tahi logo ki tanatou palalau i tana lea totonu.

⁷ Nee natou punamauli mo fakaofoofo fuli, pea nee natou feuiaki ia natou: Ko te u hahai aeni e palalau, pe e mole natou Kalilea fuli?

⁸ Pea e feafeai e tou logo ai kia natou ia tatou palalau totonu nee tou tupu ake ai?

⁹ Ko tatou ko te kau Palete, mo te kau Mete, mo te kau Elami; mo natou e nonofo i Mesopotamia, mo Sutea, mo Kapatosia, mo Ponito, mo Asia,

¹⁰ mo Filisia, mo Pamefilia, mo Esipito pea mo te fenua o Lipia e ovi ki Silenia, mo natou nee omai mai Loma, kau Sutea mo te kau poloselite*,

¹¹ mo te kau Kelete mo te kau Alape, pe e feafeai e tou logo ai ki tanatou palalau i atatou lea ki te u mea matalelei a te Atua?

¹² Nee natou punamauli fuli, pea nee mole natou iloi hanatou manatu, pea nee natou feuiaki ia natou: Kotea te uhiga o te mea aeni?

¹³ Kae nee nukinuki ni ihi, o ui: Kua lahi fau tanatou inu te u vino lelei.

Uluaki akonaki a Petelo

¹⁴ Pea nee tuu ake leva Petelo ki oluga mo te toko hogofulu ma tahi, nee ina hiki ake tona leo, pea nee ina ui: Tagata Sutea, pea mo koutou fuli e nonofo i Selusalemi ia aho nei, ke koutou iloi te mea aeni, pea ke kotou fakalogo mai ki aku palalau!

¹⁵ E mole konana te hahai aeni, o hage ko te mea e koutou manatu ki ai, he ko te hola hiva pe aeni o te uhu.

¹⁶ Kae ko te mea aeni nee fakaha e te polofeta ko Soele:

¹⁷ I te u aho fakamuli, e ui e te Atua, E au tufaki anai toku Laumalie Maonioni ki te u kakano fuli; E faikikite anai okotou foha mo okotou ofafine, E mau anai e akotou tupulaga ni sio pea e mau anai e akotou matua ni moemisi.

¹⁸ Io, ki aku tagata faifekau mo fafine faifekau, i te u aho aia, E au tuku anai kia natou toku Laumalie; pea e natou faikikite anai.

¹⁹ E au fai anai ni mea fakaofoofo i oluga o te lagi pea mo ni milakulo i lalo o te kele, e i ai anai he toto, Mo he afi, pea mo te kohui afi;

²⁰ E fakapouli anai te laa; pea e toto anai te mahina, Ia mua o te hoko o te aho o te Aliki, ko te aho lahi aia pea mo fakakololia.

²¹ Pea ko ae e fetapa anai ki te huafa o te Aliki, e fakamauli anai ia.

Ko Sesu ae nee fakaha e Tavite

²² Tagata Iselaele, koutou fakalogo mai ki te u folafola aeni! Ko Sesu mai Nasaleti, te tagata aena nee fakamooni ki ai te Atua i okotou mua aki ni milakulo, mo ni mea fakamanamana, pea mo ni fakailoga nee fai e te Atua ia ia i te lotolotoga o koutou, o hage ko takotou iloi ia e koutou totonu;

²³ ko te tagata aena, nee fakatau o mulimuli ki te fakatuutuu mo te poto o te Atua, nee koutou kolusifikoi ia, nee koutou tuku ia ki te nima o te kau pagani ke natou tamatei ia.

²⁴ Nee toe fakatuuake ia e te Atua, i tana haofaki ia mai te u hai o te mate, koteuhi nee mole feala ke taofi ia e te mate.

²⁵ Koteuhi nee fakaha e Tavite o uhiga mo ia: Nee au sio tuumau ki te Aliki i oku mua, koteuhi e afio ia i toku fahai matau, O tupu ke aua naa au higa.

²⁶ Koia e fiafia ai toku loto, pea e fakavikivikii toku alelo, Pea e malolo anai mo toku kakano i te falala,

²⁷ Koteuhi e mole ke liaki anai toku laumalie i te nofoaga o te kau mate, Pea e mole ke fakagafua anai ke sio tau Sagato ki te pala.

²⁸ Kua ke fakaha mai kia au te u ala o te mauli; E ke fakafonu anai au i te fiafia ki tau afio.

²⁹ Kau tagata mo tehina, kotou fakagafua mai ke au palalau fakalauatea atu kia koutou, o uhiga mo tatatou tamai ko Tavite, kua mate ia, pea kua tanu ia, pea kei tuu nei tona tanuma i te lotolotoga o tatou.

³⁰ Koteuhi nee polofeta ia, pea nee ina iloi nee fakapapau age e te Atua kia ia, e ina fakaheka anai he tahi i tona hakoga totonu ki tona hekaaga fakahau,

³¹ ko te toe tuuake aia o te Kilisito nee fakaha age kia ia, pea nee sio ia ki ai, pea nee ina fakaha fakatomua, i tana ui: E mole ina tuku anai ia i te nofoaga o te kau mate, pea e mole sio anai tona kakano ki te pala.

³² Ko te Sesu aia, kua toe fakatuuake e te Atua; ko matou fuli ko he kau fakamooni ki te mea aia.

³³ Kua hiki ake ia ki te faahi matau o te Atua, pea kua ina tali mai te Tamai te Laumalie Maonioni nee fakapapau mai, pea kua ina liligi ia, o hage ko takotou sio mo logo ki ai.

³⁴ Koteuhi nee mole hake Tavite ki te lagi kae nee ina fakaha totonu: Nee ui e te Aliki ki toku Aliki: Heka ia koe i toku faahi matau,

³⁵ O kaku ki taku fakaliliu ou fili ko tou hiliaga vae.

³⁶ Ke iloi fakapapau e te fale katoa o Iselaele kua fakanofo e te Atua ke Aliki mo Kilisito te Sesu aena nee kotou kolusifikoi.

³⁷ I tanatou logo ki te palalau aia, nee natou logoi i onatou loto he fakahemala lahi, pea nee natou ui age leva kia Petelo mo te kau apositolo: Kau tagata mo tehina, kotea te mea e tonu ke matou fai?

³⁸ Nee ui age leva e Petelo kia natou: Koutou fakahemala pea koutou tahi papitema i te huafa o Sesu Kilisito, o tupu ko te fakamolemole o akotou agahala; pea e kotou tali anai te meaofa o te Laumalie Maonioni.

³⁹ Koteuhi nee fai te fakapapau aia kia koutou, mo akotou fanau, pea mo natou fuli e nonofo i mamao, natou fuli e paui anai e te Aliki totatou Atua.

⁴⁰ Pea aki ni ihi age folafola lahi nee ina fakalotoi mo fakamalohii natou, o ui: Koutou feholaki mai te taitupu agakovi aeni.

⁴¹ Ko natou nee natou tali leva tana folafola nee papitemai leva natou; pea i te aho aia, ko te lahi o te kau tisipulo nee lau ko te toko tolu afe ape.

Uluaki fakatahi a te kau kilisitiano

⁴² Nee natou kataki fualoa i te akonaki a te kau apositolo, mo te komunio fakatautehina, mo te tofitofi o te pane, pea mo te faikole.

⁴³ Pea nee hifo kia natou takitahi te mataku, pea nee lahi te u mea fakaofoofo mo te u milakulo nee fai e te kau apositolo.

⁴⁴ Ko natou fuli nee tui nee nonofo i te kogamea e tahi, pea nee natou mau fakatahi te u mea fuli.

⁴⁵ Nee natou fakatau onatou kele mo onatou koloa, pea e natou tufatufa te paaga ia natou fuli, o mulimuli ki te mea e aoga ki te tagata takitahi.

⁴⁶ Nee natou tatuu i te aho takitahi ki te fale tapu, pea nee natou tofitofi te pane i onatou fale, pea nee natou too tanatou meakai i te fiafia mo te loto faigafua,

⁴⁷ pea nee natou fakavikiviki ki te Atua, pea nee tali leilei natou e te hahai fuli. Pea nee fakatahii age e te Aliki i te aho takitahi ki te Ekelesia natou fuli kua haofaki.