Lua tohi a Paulo ki te kau TESALONIKA 3 - Ko te Tohi Tapu i te fakauvea

Faikole mo te u gaue

¹ Fakaosi leva, u tehina, kotou hufaki matou, ke hoko atu te mafola a te folafola a te Aliki, pea ke fakakololiai ia ia, o hage ko tana fai ia koutou,

² pea ke matou hao mai te hahai pauu mo agakovi, koteuhi e mole mau te tui e te tagata fuli.

³ E agatonu te Aliki, e ina fakamalohii anai koutou, pea e ina puipui anai koutou mai ae e kovi.

⁴ Kia koutou, e matou falala ki te Aliki, e kotou fai pea e kotou fai anai te u mea ae nee matou fakatotonu atu kia koutou.

⁵ Ke takitaki e te Aliki okotou loto ki te ofa o te Atua pea mo te kataki fualoa o Kilisito!

⁶ E matou kole mamahi atu, u tehina, i te higoa o totatou Aliki ko Sesu-Kilisito, ke kotou fakamamao mai te u tehina fuli e mauli i te piko kae e mole mulimuli ki te u fakatotonu nee kotou mau maia matou.

⁷ E kotou iloi e koutou totonu te faifaitaki mai kia matou, koteuhi nee mole matou mauli ia koutou i te piko.

⁸ Nee mole matou kai noa he pane a he tahi, kae i te gaue pea mo te kinakina, nee matou gaue i te po mo te aho, ke aua naa matou liliu ko he kavega ki he tahi ia koutou.

⁹ Nee mole ui ia, nee mole matou mau te faigamalie aia, kae nee matou loto ke matou tuku atu kia koutou, ia matou totonu, he faifaitakiaga ke kotou mulii.

¹⁰ Koteuhi i te temi nee matou nonofo ai mo koutou, nee matou fakaha fakahagatonu atu kia koutou: Kapau e mole fia gaue he tahi, ke aua naa kai foki ia.

¹¹ Kae e matou logo e i ai ni ihi ia koutou e mauli i te piko, e mole natou gaue, kae e natou tokaga ki te u mea e mole natou kau i ai.

¹² E matou fakaafe natou aia, pea e matou kole kia natou i te Aliki ko Sesu-Kilisito, ke natou kai tanatou pane totonu, o gaue i te tokalelei.

¹³ Kia koutou, u tehina, aua naa kotou piko i te fai o te lelei.

¹⁴ Pea kapau e mole fakalogo he tahi ki te mea aeni e matou fakaha atu i te tohi aeni, kotou fakamaumau ia, pea aua naa kotou toe fakatahi anai mo ia, ke ufiufi ai.

¹⁵ Aua naa kotou sio kia ia o hage ko he fili, kae kotou fai kia ia he fakatokaga o hage ko he tehina.

Tapuaki mo fakaalofa

¹⁶ Ko te Aliki o te tokalelei, ke ina foaki totonu atu kia koutou te tokalelei i te temi fuli, i te u mea fuli! Ke nofo te Aliki mo koutou fuli!

¹⁷ E au fakaalofa atu kia koutou, ia au Paulo, i toku nima totonu. Koena toku fakailoga i aku tohi fuli; e fena anai taku faitohi.

¹⁸ Ko te kalasia o totatou Aliki ko Sesu-Kilisito ke nofo mo koutou fuli!