Lua tohi a Paulo ki te kau TESALONIKA 2 - Ko te Tohi Tapu i te fakauvea

¹ O uhiga mo te toe liliu mai o totatou Aliki ko Sesu-Kilisito pea mo tatatou fakatahi mo ia, e matou kole atu, u tehina,

² ke aua naa vavataga faigafua takotou fakakaukau, pea ke aua naa kotou oho noa, o uhi ko he sio fakalaumalie, pee ko he kikite, pee ko he tohi maia matou, o hage kua hoko te aho o te Aliki.

³ Ke aua naa kakaai koutou e he tahi i he mea pe; koteuhi e maua ke hoko te aposetasia* i mua pea ke fakaha te tagata o te agahala, te foha o te malaia,

⁴ te tagata agatuu ae e malaga ki oluga o te u mea fuli ae e higoa ko te Atua, pee ko te u mea fuli ae e atolasio ki ai; pea e kaku ia o nofo o hage ko te Atua i te fale tapu o te Atua, o fakaha ia ia totonu ko te Atua.

⁵ Pe e mole kotou manatui nee au fakaha atu te u mea aia kia koutou i te temi nee au nofo ai mo koutou?

⁶ Pea e kotou iloi te mea ae e ina taofi ia i te temi nei, ke ha ia i tona temi totonu.

⁷ Koteuhi kua gaue nei te misitelio o te agahala; e tonu pe ke puli ia ae e ina taofi ia i te temi nei.

⁸ Pea ka osi ia, e ha anai te tagata agakovi, ae e tamatei anai ia e te Aliki Sesu aki te tukumanava o tona gutu, pea mo maumaui anai ia aki te gigila o tana toe liliu mai.

⁹ E fai anai te ha a te tagata agatuu aia i te malohi o Satana, aki ni milakulo kehekehe, mo ni fakailoga, pea mo ni mea fakamanamana loi,

¹⁰ pea mo te u kaka fuli o te agahala kia natou ae e mamate, he nee mole natou tali te ofa ki te mooni ke fakamauli ai natou.

¹¹ Koia e fekaui mai anai e te Atua he malohi kaka kia natou, ke natou tui ki te loi,

¹² pea ke tautea ai natou fuli ae nee mole tui ki te mooni, kae nee fiafia ki te hee agatonu.

Fakamalohii o te kau Tesalonika

¹³ Kia matou, u tehina ofaina i te Aliki, e tonu ke matou fakafetai tuumau ki te Atua o uhiga mo koutou, koteuhi nee filifili koutou e te Atua talu mai te kamataaga ki te haofaki, aki te fakamaa a te Laumalie pea mo te tui ki te mooni.

¹⁴ Ko te mea aia nee ina paui koutou ki ai aki tamatou Evaselio, ke kotou mau te kololia o totatou Aliki ko Sesu-Kilisito.

¹⁵ Koia, u tehina, koutou tuu malohi, pea kotou taofi te u akonaki nee kotou tali, pee i tamatou akonaki, pee i tamatou tohi.

¹⁶ Ko totatou Aliki ko Sesu-Kilisito totonu, pea mo te Atua ko tatatou Tamai, ae nee ofa kia tatou, pea nee ina foaki kia tatou i tona kalasia he fakafimalie heegata pea mo he falala lelei,

¹⁷ ke na fakafimaliei okotou loto mo na fakamalohii koutou i te u gaue lelei fuli pea mo te u palalau lelei fuli!