Lua tohi a Paulo ki te kau KOLINITO 2 - Ko te Tohi Tapu i te fakauvea

Ko te u fua o te fakahemala

¹ Koia nee au fakatotonu ai leva ia au ke aua naa au toe liliu atu kia koutou i te mamahi.

² He kapau e au fakamamahii koutou, pe ko ai e feala ke ina fakafiafiai au? Pe e mole ko ia pe ae nee au fakamamahii?

³ Koia nee au tohi ai te u mea ae nee au tohi, ke aua naa au mau, i taku tau atu, he mamahi maia natou ae nee tonu ke natou fakafiafiai au, o au mau kia koutou fuli te amanaki lelei aeni ko toku fiafia ko te fiafia foki aia o koutou fuli.

⁴ E au faitohi atu kia koutou mo he loto mamahi lahi osi, mo he loto tuania, pea mo ni loimata lahi osi, o mole uhi ke kotou mamahi ai, kae uhi ke kotou iloi te ofa lahi e au mau kia koutou.

Te tagata agahala kua fakamolemole

⁵ Pea kapau nee liliu he tahi ko he mea fakatupu mamahi, e mole ko au ae nee ina fakamamahii, kae ko koutou fuli, pee ko he koga o koutou, ke aua naa fakalalahi he mea.

⁶ E feauga ki te tagata aena te tua nee tuku kia ia e te kaugamalie.

⁷ Koia e tonu ke kotou fakamolemole kia ia, pea ke kotou fakafimaliei ia, koteuhi ke aua naa taomia ia i he mamahi lahi.

⁸ Koia e au kole atu ai kia koutou ke kotou fakaha te ofa kia ia;

⁹ koteuhi nee au faitohi atu foki kia koutou ko taku fia iloi, i taku ahiahii koutou, pe e kotou fakalogo i te u mea fuli.

¹⁰ Koia, ko ae e kotou fakamolemole ki ai, e au toe fakamolemole foki ki ai, pea ko te mea ae kua au fakamolemole ki ai, mo kapau nee au fakamolemole ki he mea, nee au fai te mea aena o uhi ko koutou, ia mua o Kilisito,

¹¹ koteuhi ke aua naa tuku ke mau e Satana he faigamalie ia tatou, he mole pouli kia tatou ana fakatuutuu.

¹² Koia i taku kaku atu ki Toloasi o fakaha te Evaselio a Kilisito, logo ai nee avahi e te Aliki he matapa kia au i ai, kae nee mole au mau he fimalie i toku loto, koteuhi nee mole au mau ia Tito, toku tehina;

¹³ koia nee au tauine ai leva kia natou pea nee au alu leva ki Masetonia.

Malo ia Kilisito

¹⁴ Ke fakafetai ki te Atua, ae e ina taki tuumau maua i te malo ia Kilisito, pea e ina huai ia maua te magoni o tona iloilo i te potu fuli pe!

¹⁵ Koteuhi ko tatou ko te kaloni o Kilisito ki te Atua, ia natou kua haofaki pea mo natou e mamate:

¹⁶ Ki ihi ko he mamanu o te mate ae e ina foaki te mate; ki ihi ko he mamanu o te mauli ae e ina foaki te mauli. Pea ko ai e feauga mo te gaue lahi aia?

¹⁷ Koteuhi e mole matou fetogi te folafola a te Atua, o hage ko tona fai e he kaugamalie; kae e matou palalau i te mooni, ia mua o te Atua, o hage ko ni tagata faifekau a Kilisito.