Okhuma 38 - Emakhuwa Bible

Altaari* a sooveleela soohisa

¹ Aahaateka altaari* a sooveleela soohisa a mwiri wa akaasiya* ni miringo iya: imeetru* piili ni vakhaani, vamoha ni imeetru* piilitho ni vakhaani, vamoha ni emeetru* emoha ni vakhaani.

² Aahaapakela manyaka mmaloothoni oomaxexe ekhalaka awo etthu emohamoharu ni altaari*, mwa yaawo aahuruwenlaawe ni ebronze*.

³ Aapakatho ikarumasaya sootheene sa ebronze*: Mookhupelamo ettuura, apoxoro, ibasiya soovuuvihera, igarfu* sa enama ni yootholelano makhala.

⁴ Aahaapakelatho nivali na ebronze* antoko ntthavi waathi wa altaari*, eriyari ya orakamela wa altaari*.

⁵ Aahaahana annela axexe a ebronze* woovolongheramo ikopo, mmoha wa khula nlootho na nivali.

⁶ Aapaka ikopo ni mwiri wa akaasiya*, anahuruwela ni ebronze*.

⁷ Ikoposene seiye saavolongheriwa mwaannelani mwa mipatta miili sa altaari*, weera eteexeriweke. Aahaapaka altaari* a nikhuku epakiweene ni itthaabwa.

⁸ Aapaka ebasiya ya ebronze* ni mweettwaaya wa iloola sa asithiyana yaarumeela vamulako wa Eheema ya Muthukumano*.

Nipuwa

⁹ Vahoolowaya aapakela etabernaakulu* nipuwa. Vano mpatta wa ohitto naakhalano imeetru* miloko mixexe niithannamosa mweerakameloni ni iluttu sa nliinya nootteettheya nootthaviwa,

¹⁰ ni amarimbu miloko miili vamoha ni nyettosaya miloko miili sa ebronze* nitho ivarelelo ni makumano a eparatha* mwaamarimbuni.

¹¹ Mpatta wa ottuttuwanitho yaakhalano imeetru* miloko mixexe niithannamosa mweerakameloni okhalanaka amarimbu miloko miili, nyetto miloko miili sa ebronze*, ivarelelo ni makumano a eparatha* mwaamarimbuni.

¹² Mpatta wa ninkela nsuwa waakhalano imeetru* miloko miili ni piili ni eriyari ya emeetru* mweekhuveeloni okhalanaka iluttu, amarimbu muloko ni nyettosaya muloko, ivarelelo ni makumano a eparatha* mwaamarimbuni.

¹³ Mpatta wa ninkhuma nsuwa waakhalanotho imeetru* miloko miili ni piili ni eriyari ya emeetru* mweekhuveeloni.

¹⁴ Vano saakhala iluttu sa omokoni sa imeetru* ithannamosa ni eriyari ya emeetru* mweerakameloni wa mpatta mmoha wa mulako vamoha ni amarimbu araru ni nyettosaya miraru,

¹⁵ ni iluttu sa omokoni sa imeetru* ithannamosa ni eriyari ya emeetru* mweerakameloni wa mpatta mukina wa mulako wa nipuwa vamoha ni amarimbu araru ni nyettosaya miraru.

¹⁶ Iluttu sootheene saarukureenre nipuwa saapakiwe ni nliinya nootteettheya nootthaviwa.

¹⁷ Nyetto sa amarimbu saari sa ebronze*. Ivarelelo ni makumano mwaamarimbuni saari sa eparatha* ni vasulu amarimbutho yaahuruweliwe ni eparatha*. Vano amarimbu ootheene a nipuwa yaakumanyihiwe ni eparatha*.

¹⁸ Eluttu ya mulako wa nipuwa yaakala ya nliinya nootteettheya yootthaviwa ni ikuwo sa kanka, sookankela ni sooxeera. Yaapakiwa ni namaxora ekhalanaka imeetru* ithanniixexe mweerakameloni ni, ntoko iluttu sa nipuwa, imeetru* ithanu mweerakamelonimwaya.

¹⁹ Yaakhalanotho amarimbu axexe ni nyettosaya mixexe sa ebronze*. Ivarelelosaya ni makumano saapakiwe ni eparatha* ni vasulu wa amarimbu yaahuruweliwe ni eparatha*.

²⁰ Mikuro sootheene sa Eheema ya Etabernaakulu* ni sa nipuwa naarukureenre saari sa ebronze*.

Itthu saavareliwa muteko oteka etabernaakulu

²¹ Itthu iya saavareliwa muteko oteka etabernaakulu*, aani etabernaakulu* ya Wiiraana. Moisesi aahaalamula aLeevi weera elepe itthu iya, yaahooleliwa ni Ithamari, mwaana mulopwana a musaserdoti* Aharoni.

²² Bezaleli, mwaana a Uri, mwaana a Huri, a epuumba ya Yuda, aapaka sootheene Yave aamulamulenlaawe Moisesi.

²³ Oholiyabi, mwaana a Ahisamaki, a epuumba ya Dani, namaratta, namasomela mmutekoni, nitho namaxora a nliinya na ekuwo yootteettheya ya kanka, yookankela, ni yooxeera, aamukhavihera Bezaleli.

²⁴ Eyuuma yoorikaxa yootheene yaavahiwa ni sooveleela soowiinainihiwa ni yaavareliwa muteko weera Nipuro Nootteela* nitekiwe yaalemela ikiilu* macira muloko, ettharaka olemela wa exekeli* ya Nipuro Nootteela*.

²⁵ Eparatha* yaakheliwe wa yaawo yaalikeliwe variyari wa aYixrayeli yaalemela ikiilu* macira miloko miraru ni macira maxexe, ettharaka olemela wa exekeli* ya Nipuro Nootteela*.

²⁶ Entaphulela weera khula mutthu aalepelingwe okhuma iyaakha miloko miili mpaka ohoolo aavaha ebeka* emoha (enoolikana exekeli* eriyari), ettharaka olemela wa exekeli* ya Nipuro Nootteela*. Vano waatta wa yaawo yaavanghe waapwexerera yaari atthu 603 550.

²⁷ Vano italentu* ncira sa eparatha* saavareliwa muteko weera nyetto sa acikhi a Nipuro Nootteela* ni iluttu sihaneliwe. Saakhala nyetto ncira, eyo tiiyo etalentu* emoha wa khula mwetto.

²⁸ Yaavarela muteko ikiilu* miloko miili weera epake ivarelelo sa amarimbu, weera ehuruwele mpatta wa osulu wa amarimbu ni weera epake makumanowaaya.

²⁹ Olemela wa ebronze* yaakheliwe ntoko sooveleela soowiinainihiwa waari ikiilu* macira miloko miili ni macira maxexe.

³⁰ Yaavarela muteko ebronze* ele weera epake nyetto sa mulako wa Eheema ya Muthukumano*, altaari* a ebronze* vamoha ni nivalinaya ni ikarumasaya sootheene.

³¹ Yaavarela mutekotho wa nyetto sa nipuwa naarukureenre, mulakwaaya ni mikuro sootheene sa etabernaakulu* ni sa nipuwa naarukureenre.