Okhuma 3 - Emakhuwa Bible

Moisesi vaniphuwani nivarelaka

¹ Moisesi eera akukhulaka muhuwo wa atatawe oowaathelela, Yethero, musaserdoti* a oMidiyani. Nihuku nimoha aakuxa muhuwo arowanaka mpatta mukina wa nikare, anaphiya oHorebi, mwaako wa Muluku.

² Vaavaale ndyelo a Yave aamukhumelela mmalumini a mooro yaakhuma vaniphuwani. Moisesi aahoona weera naamvarelaru niphuwa, khanaasa.

³ Moisesi aahuupuwela: “Yootikhiniha heeni? Niphuwa nihinsela heeni? Kaattameleke yeele koone.”

⁴ Yave aahoona weera owo aamwaattamela weera oonexexe. Vanonto Muluku aamwiitthana vaniphuwani: “Moisesi, Moisesi!” Ni Moisesi aamwaakhula: “Miyo kiri va.”

⁵ Muluku aamweerela: “Muhaattameletho! Murule ikwakwaattasanyu, niwoko nipuro mweemenlaanyu ti nootteela.”

⁶ Aapwaherera eeraka: “Miyo ti Muluku a atithinyu; Muluku a Abrahaamu, a Isaki ni a Yakobe.” Vano Moisesi aakhuneela ekhovaawe niwoko aahoova ongweha Muluku.

⁷ Yave aaheera: “Vekhaikhai kohoona ohasuliwawaya mulokwaaka wExipitu. Kohiiwa okhuwelawaya niwoko na anamahooxa ni koosuwela ohaawawaya.

⁸ Tivawo kikhurungwaaka weera kaatapuxe mmatatani mwa awExipitu ni weera kaavenxeke nno kaaronghaka elapo yooreera ni yoowunnuwa, yoosareya ni mukaka ni oravo, eyo tiiyo elapo ya aKanaani, awAmori, aHiti, aPerizi, aHivi ni aYebusi.

⁹ Vanonto, okhuwela wa aYixrayeli wookiphwanya. Kohoona moota awExipitu anaahasulaaya.

¹⁰ Vano muroweke. Kinoorumihani wa Farawu* weera mwakhumihewo mulokwaaka aYixrayeli mwExipitu.”

¹¹ Wa soothesene Moisesi aamwaakhula Muluku: “Miyo taani weera kamweemelele Farawu* ni weera kaakhumihe aYixrayeli mwExipitu?”

¹² Muluku aamwaakhula: “Miyo nkikhale ni nyuwo. Ni ela eri eneneero weera ti Miyo kinoorumihani: Mwaakhumihaka atthu mwExipitu, nyuwosa mmwinlape Muluku mwaakweene yoola.”

¹³ Moisesi aamukoha Muluku: “Miyo kaphiya wa aYixrayeli ni kaaweerela: ‘Muluku a makholowaanyu ookirumiha wa nyuwo’ ni awosa yakikohasa: ‘Nsinanawe taani?,’ vano kaaweereleke hai?”

¹⁴ Muluku aamweerela Moisesi: “MIYO TI MIYO*.” ti yeeyo muneeraanyu mwaaleele aYixrayeli: ‘MIYO TI MIYO koorumihenlasiyeni.’”

¹⁵ Muluku aamweerelatho Moisesi: “Mwaaleele aYixrayeli: ‘Yave, Muluku a atithinyu, Muluku a Abrahaamu, a Isaki ni a Yakobe ti Yoowo okirumihale wa nyuwo.’ Nna ti Nsinanaka wa mahuku ootheene, Nsina mwa nenno kineeraaka kuupuweleliweno ikhapira ikhapirasene.

¹⁶ Muroweke, mwaathukumanyihe asitokweene a aYixrayeli ni mwaaleele: ‘Yave, Muluku a atithinyu, Muluku a Abrahaamu, a Isaki ni a Yakobe ookikhumelela, anakeerela: ‘Miyo kohootthukuruwelasani, niwoko kohoona mumpakasiwaanyu wExipitu.

¹⁷ Koororomeliha wookhumihasani moohasuliwani wExipitu wooronghani elapo ya aKanaani, awAmori, aPerizi, aHivi ni aYebusi, aani elapo yoosareya mukaka ni oravo.’

¹⁸ Asitokweene a aYixrayeli anoowaakhulelani. Vahoolowaya nyuwo mmurowe ni yaawosa wa mwene a wExipitu ni mwamweerele:‘Yave, Muluku a aHeberi, ooniphwanya. Munihiyeke neette ekwaha ya mahuku mararu munikareni weera nampakele sooveleela Yave, Mulukwaahu.’

¹⁹ Koosuwelatho weera mwene a wExipitu kharwa ootthuniherani nihaanyesereenre ntata nooweraxa.

²⁰ Tivawo kineeraaka kookole moonowaaka ni nkaapakele awExipitu sootikhiniha sootheene eriyaraaya ni vahoolo wa yeeyo, owo onimootthuniherasani okhuma.

²¹ Kinimweeriha weera awExipitu ereereliwe murima muloko moota wooweera waakhumaka, ohikhume matataru.

²² Asithiyana aYixrayeli ootheene yaavekele asimwaattamanaaya ni asithiyana eneera ephiyere vaatewaya itthu sa iyuuma soorikaxa nitho ikuwo. Nyuwosa muneeraanyu mwaawarihe anamwaniinyu asilopwana ni asithiyana. Hiiho nyuwosa mmwaahuhule awExipitu.”