Nuumeru 8 - Emakhuwa Bible

Soomwaleela ithannapiili

¹ Yave aamweerelatho Moisesi:

² Mwamuleele Aharoni: ‘Mwaarehereraka soomwaleela ithannapiili, iyo simwaleeleke mpatta wa ohoolo wa onyaari.

³ Aharoni aapaka hiiho. Aahiikaathi soomwaleela moota seeraaya siwehihiwe ohoolo wa onyaari, ntoko Yave aamulamulenlaawe Moisesi.

⁴ Onyaari waapakeliwe eyuuma yoorikaxa woohaneliwa okhuma nyettosaya mpaka ithutusaya, hiihoweene Yave aamoonihenraawe Moisesi.

Okhalihiwa ni otteelihiwa wa aLeevi

⁵ Yave aamweerela Moisesi:

⁶ “Mwaamwalamwalihe aLeevi eriyari ya aYixrayeli ni mwaatteelihase.

⁷ Otteelihiwawaya okhaleke ha: nyuwo mwaamisereke maahi a otteelihera; vahoolowaya mpakihe weera emetthe erutthu yootheene ni ecape soowarasaya weera yiitteelihe.

⁸ Woottharelana awosa emuruuheke mwaamombe ni sooveleela sa irooro sa ephepa yooreerela yooweetheeliwa makhura, ni nyuwo munruuheke mwaamombe anaaveeli ntoko yooveleelela yoottheka.

⁹ Mwaarongheke aLeevi ohoolo wa Eheema ya Muthukumano* ni muthukumanyiheke muloko wootheene wa aYixrayeli.

¹⁰ Mwaarongheke aLeevi vamaithoni wa Yave, ni aYixrayeli ewiikaathereke matata.

¹¹ Aharoni aarongheke aLeevi wa Yave ntoko yooveleela yoowiinainiheriwa wa mpatta wa aYixrayeli weera awosa etteeliheriweke muteko wa Yave.

¹² aLeevi yiikaathenreene matata mmuru mwa aximombe, nyuwo mumveleeleke mwaamombe mmoha ntoko yoomveleelela yoottheka ni mukinoowo ntoko yoomveleelela yoohisa weera aareherereleke wiiwanana ni Yave aLeevi.

¹³ Ngwiikaathi aLeevi ohoolo wa Aharoni ni wa anamwanaawe asilopwana ngwooniheraka ntoko yooveleela yoowiinainiheriwa Yave.

¹⁴ Moota owo, nyuwo munimwaamwalamwaxa aLeevi eriyari ya aYixrayeli, ni aLeevi anookhala awaka.

¹⁵ Mwaatteelihaleene aLeevi ni ngwoonihenreene ntoko yooveleela yoowiinainiheriwa, awosa evoloweke Muheemani ya Muthukumano* weera erumeelemo.

¹⁶ Awosa ti aYixrayeli kineeraaka kitteeliheraxiwe. Miyo kaamwalamwalihenre weera ekhale awaka vanipuroni na matthaara, aani matthaara asilopwana a khula muthiyana muYixrayeli.

¹⁷ Matthaara asilopwana ootheene a aYixrayeli a eriyari ya atthu ni axinama, ti awaka. Miyo kimwalamwalihenre kaavulalinghaaka matthaara ootheene a wExipitu.

¹⁸ Vanonto kinaathanla aLeevi vanipuroni na matthaara ootheene a aYixrayel.

¹⁹ Eriyari ya aYixrayeli ootheene, kohaatteeliha aLeevi ntoko yoomvaha Aharoni ni anamwanaawe asilopwana; awosa anoorumeela Muheemani ya Muthukumano* mwa nsina na aYixrayeli ni animwaarehererela wiiwanana ni Yave weera nihikhaleru nihooxo nneera naaphwanye aYixrayeli yaattamelaka Nipuro Nootteela*.

²⁰ Moisesi, Aharoni ni muloko wootheene wa aYixrayeli yaahaapakela aLeevi ntoko Yave aamulamulenlaawe Moisesi.

²¹ aLeevi yaahiitteeliha, enacapa soowarasaya ni Aharoni aahaaruuha ntoko yooveleela yoowiinainiheriwa ohoolo wa Yave, anaarehererela wiiwanana ni Yave weera aatteelihe.

²² Vahoolowaya, aLeevi yaahoorwa orumeela Muheemani mwa Muthukumano ewehawehiwaka ni Aharoni ni anamwanaawe asilopwana. Yaahaapakela aLeevi ntoko Yave aamulamulenlaawe Moisesi.

²³ Yave aamweerela Moisesi:

²⁴ “Moota aLeevi antthuneyaaya otthara ti ola: asilopwana okhuma a iyaakha miloko miili niithanu woorowa ohoolo angwera orumeela, epacereke ovara muteko Muheemani mwa Muthukumano.

²⁵ Vaheera okhuma a iyaakha miloko mithanu ehiyeke ovara muteko ni ehipwahereretho.

²⁶ Yaakhavihereke asikhwaaya mmutekoni wookosoopa Eheema ya Muthukumano*, mene awosa ehivareketho muteko. Ti hiiha nyuwosa muneeraanyu muthanleke sootthuneya sa aLeevi.