Nuumeru 33 - Emakhuwa Bible

Ihuhu soohiyanahiyana sa mukwaha wa aYixrayeli okhuma wExipitu

¹ Iya ti ihuhu sa mukwaha wa aYixrayeli ekhumelo wExipitu, otthariheleyaka okawanyeyawaya, ehooliwaka ni Moisesi ni Aharoni.

² Munlamuloni na Yave, Moisesi aalepa ihuhu sa mukwahaaya. Mukwahaaya, mweehuhuni waari ola:

³ Yaakhumasa oRamesese vanihukuni nanaamuloko nimathanu na mweeri woopacera, waaxiiye wa mPaska*, enakhumasa oolipeene, awExipitu ootheene yoonaka.

⁴ awExipitu yeera yaavithaka anamwanaaya a matthaara a khula mutthu a yaawosa, aawiivalaawe Yave, niwoko Yave oottaruxa milukusaya.

⁵ aYixrayeli yaattimulasa oRamesese, enakonelasa oSukota.

⁶ Yaattimula oSukota, enakonelasa wEta, mmwiinanoni wa munikareni.

⁷ Ettimulaka wEta, yaahokoleela oPi-Hahirote, mpatta ninkhuma nsuwa wa oBahali-Zefoni, enakonelasa vakhiviru wa oMigedoli.

⁸ Ettimulaka oPi-Hahirote, yaalapuwa ephareiya, ephiyaka munikareni ni, yeettiyeene mahuku mararu munikareni na wEtami, yaakonelasa oMara.

⁹ Ettimulaka oMara, yaarowa wElimi, yaaraayawo anaattuuttu muloko neeli ni mavare miloko mithannamiili, enakonelasawo.

¹⁰ Ettimulaka wElimi, yaakonelasa muxerexere wa Ephareiya Yooxeera.

¹¹ Wookhuma Ephareiya Yooxeera, yaakonela munikareni na oSini.

¹² Yaattimula munikareni na oSini, enakonelasa oDofeka.

¹³ Ettimulaka oDofeka, yaakonela wAluxi.

¹⁴ Ettimulaka wAluxi, yaakonelasa oRefidimi, mwa weiwo yahaakhanlaayawo maahi oowura.

¹⁵ Ettimulaka oRefidimi, yaakonelasa munikareni na oSinayi.

¹⁶ Ettimulaka munikareni na oSinayi, yaakonelasa oKiberoti-Hataava.

¹⁷ Ettimulaka oKiberoti-Hataava, yaakonelasa oHazeroti.

¹⁸ Ettimulaka oHazeroti, yaakonelasa oRitema.

¹⁹ Ettimulaka oRitema, yaakonelasa oRimoni-Perezi.

²⁰ Ettimulaka oRimoni-Perezi, yakonelasa oLibena.

²¹ Ettimulaka oLibena, yaakonelasa oRisa.

²² Yaattimula oRisa, enakonelasa oKehelata.

²³ Ettimulaka oKehelata, yaakonela vamwaako Xeferi.

²⁴ Ettimulaka vamwaako Xeferi, yaakonela oHarada.

²⁵ Yaattimula oHarada, enakonela oMakeloti.

²⁶ Ettimulaka oMakeloti, yaakonela oTahati.

²⁷ Ettimulaka oTahati, yaakonela oTera.

²⁸ Ettimulaka oTera, yaakonela oMiteka.

²⁹ Ettimulaka oMiteka, yaakonela oHaxemona.

³⁰ Ettimulaka oHaxemona, yaakonela oMoseroti.

³¹ Yaattimula oMoserote, enakonela oBene-Yaakani.

³² Ettimulaka oBene-Yaakani, yaakonela oHori-Hagidegadi.

³³ Ettimulaka oHori-Hagidegadi, yaakonela oYotebata.

³⁴ Ettimulaka oYotebata, yaakonela wAberona.

³⁵ Ettimunleene wAberona, yaakonela wEziyoni-Geberi.

³⁶ Ettimulaka wEziyoni-Geberi, yaakonela oKadexi, munikareni na oSini.

³⁷ Yaattimula oKadexi, enakonela vamwaako Hori, mmwiinanoni wa wEdomi.

³⁸ Ti weiwo Aharoni aawenlaawe vamwaako Hori, attharihaka Nlamulo na Yave, anakhwelawo vanihukuni noopacera na mweeri wanaathanu wa eyaakha yanaamiloko mixexe aYixrayeli ekhumaleene wExipitu.

³⁹ Aharoni aakhwelaawe vamwaako Hori, aarino iyaakha ncira ni miloko miili ni tthaaru.

⁴⁰ Mwene muKanaani a wAradi, aakhala oNegeba, mulaponi ya oKanaani, aasuwela weera aYixrayeli yeera ephiyaka.

⁴¹ Yaattimula vamwaako Hori, enakonela oZalemona.

⁴² Ettimulaka oZalemona, yaakonela oPunoni.

⁴³ Ettimulaka oPunoni, yaakonela wOboti.

⁴⁴ Ettimulaka wOboti, yaakonela wIye-Abarimi, omwiinanoni ni oMowabe.

⁴⁵ Ettimulaka wIye-Abarimi, yaakonela oDiboni-Gadi.

⁴⁶ Yaattimula oDiboni-Gadi, enakonela wAlmoni-Diblatayimi.

⁴⁷ Ettimulaka wAlmoni-Diblatayimi, yaakonela mmanyaakoni sa wAbarimi, oluluwana ni oNebo.

⁴⁸ Ettimulaka mmanyaakoni sa wAbarimi, yaakonela munghawalawani wa oMowabe, muxerexere Yordanu, okhopela wa oYeriko.

⁴⁹ Munghawalawani wa oMowabe, awosa yaakonelasa muxerexere Yordanu okhuma oBeti-Yeximoti mpaka wAbeli-Xitimi.

Soonyesereriha sa owina ni okawiwa wa oKanaani

⁵⁰ Munghawalawani wa oMowabe, muxerexere Yordanu, okhopela wa oYeriko, Yave aamweerela Moisesi:

⁵¹ “Mwaaleele aYixrayeli weera, nyuwosa munlapungweene Yordanu weera mvolowe oKanaani,

⁵² mwawoomole amaki ootheene a mulaponi. Mwaphwate icaambulo soopatthiwa sootheene ni miluku sootheene soohaniwa, ni mwaaphwate altaaraaya ootheene ari mmattumuxanimwaya.

⁵³ Mwakuxe elapo ni mwamakemo, niwoko Miyo kohoovahasani elapo weera ekhale yawinyu.

⁵⁴ Mwakawane elapo mumpakaka mwaathanle, muttharihaka mahimwaanyu. Wa nihimo noowaatta, mwavaheke yoohiyeriwa yoowaatta, ni wa nooyeva, mwavaheke yoohiyeriwa yooyeva. Khula nihimo naakheleke elapo mwa yeeyo nneeraaya nireereliwe. Mwakawaneke variyari wa ipuumba sa makholowaanyu.

⁵⁵ Wa soothesene, nyuwosa mwaahiwoomolasa amaki a mulaponi, yaawo muneeraanyu mwaatthunihere okhala, anoothatuwa nyiiwa mmaithonimwanyu ni mipuule mweerutthunimwanyu. Awosa animootannyerani milattu mulaponi mwa mwemmo muneeraanyu mwamakemo.

⁵⁶ Vano, Miyo kinimoopakelasani yeeyo kaatthunaaka waapakelasa.