Levitiku 7 - Emakhuwa Bible

Soolamulela mwaha wa sooveleelela nthowa

¹ Ikano mwaha wa yooveleelela nthowa eri yootteelaxa ti iya:

² Mwaamunama oomveleelela nthowa iiveliweke vanipuroni siniiveliwaayawo sooveleela soohisa ni ephomaaya eyeeheriweke mukerekhere wa altaari*.

³ Makhura ootheene a yooveleelela nthowa eveleeliweke: mpatta woonunaxa wa mwiila ni makhura anghuruwela marupo,

⁴ miso miili vamoha ni makhura anghuruwela, ni mpatta wa hapa onkuttelela ni simvenxiwa vamoha ni miso.

⁵ Musaserdoti* ahisereke seiyo valtaarini* ntoko yoomveleelela Yave yoorehereriwa vayikho; ti yooveleelela nthowa.

⁶ Asilopwana ootheene a mweemusini ya musaserdoti* eceeke yeeyo, mene eceliweke yeeyo vaNipuroni Nootteela*, niwoko ti yootteelaxa.

⁷ Ekanoweene yeeyo epakeliweke sooveleelela yoottheka mpaka sa nthowa: enama ti ya musaserdoti*.

⁸ Musaserdoti* aneera ampakele mukina yooveleela yoohisa ahalaneke exapala eyo.

⁹ Khula yooveleela ya irooro yoowooxiwa vayikho hoye hoye yoowaapeiwa mmwaapuni naari vanipuroni noowooxera, ti ya musaserdoti* aneera aveleele yeeyo.

¹⁰ Khula yooveleela ya irooro yooweetheliwa makhura hoye hoye yooheetheeliwa ti ya ekhapira yootheene ya Aharoni.

Soolamulela mwaha wa sooveleelela murettele

¹¹ Ikano mwaha wa sooveleelela murettele sineera siveleeliwe wa Yave ti iya:

¹² Mukina apaka yeeyo atthapelaka, vano vamoha ni yooveleelaawe ya otthapela aveleeleketho iboolu soohikhalano eferementu sooweetheliwa makhura, ipaawu sikhaanene soohikhalanotho eferementu ni soottikittheliwa makhura, ni iboolu sa ephepa yooreerela yooweetheiwa nnenesene ni yooweetheliwa makhura.

¹³ Owo aveleeleketho iboolu sooheliwa eferementu vamoha ni yooveleeleene yeeyo ya murettele.

¹⁴ Owo aruuheke emoha ya khula yoowooxiwa eyo ntoko yoomveleelela Yave, ni iyo ti sa musaserdoti* ommisamisa ephome ya sooveleelela murettele.

¹⁵ Enama ya yooveleelela murettele ya otthapela ekhuuriweke nihuku nenenenno emveleeliwaaya; ehikone.

¹⁶ Wa soothesene yooveleelaawe yakhala yookwanihera nlipelo hoye hoye ya otthunawawe, eyo ekhuuriweke nihuku nenenenno emveleeliwaaya, mene eneera ehale eyo ekhuuriweke waaxiiye.

¹⁷ Vaheera yakhalaru enama eneera ehale mpaka nihuku nanaararu ehisiweke.

¹⁸ Yakhalaru enama ya yooveleelela murettele yakhuuriwa vanihukuni nanaararu, eyo kheerwa yaakhuleliwa ni Muluku. Yooveleela eyo kheemvareleya muteko ni yoole oveleenle, niwoko ti yoonanara. Mutthu aneera akhuure onookhalano nthowa.

¹⁹ Enama yatavaru etthu yoohitteela ehikhuuriweke; eyo ehisiweke. Mwaha wa enama yootteela – ootheene ari ootteelihiwa, ekhuureke.

²⁰ Vaheera mukina ori oohitteela akhuura enama ya yooveleelela murettele eri ya Yave, vano mutthu owo amalamalihiweke mmulokonimwawe.

²¹ Yoowo aneera ataveru etthu yoohitteela – ekhalaka yoohitteela ya omutthu, ya axinama naari yakhalaru etthu yoohitteela ya mwiikho – ni akhuura enama ya yooveleelela murettele eri ya Yave, mutthu owo amalamalihiweke mmulokonimwawe.’”

Makhura ni ephome

²² Yave aamweerela Moisesi:

²³ “Mwaaleele aYixrayeli: ‘Muhikhuureru makhura a imombe, ikhondoolo hoye hoye ipuri.

²⁴ Makhura a mwaamunama oovettuliwa naari oonyaanyiwa ni axinama a ntuphini avareliwe muteko wa miteko sikina, mene ahikhuuriweru.

²⁵ Yoowo aneera akhuure makhura a mwaamunama ooveleeleliwa Yave wa yooveleela yoorehereriwa vayikho amalamalihiweke mmulokonimwawe.

²⁶ Weiwo muneeraanyu mwamakeru, muhice ephome ya mwaapalame hata mwaamunama.

²⁷ Yoowo aneera ace onoomalamalihiwa mmulokonimwawe.’”

Mipatta sa asaserdoti*

²⁸ Yave aamweerela Moisesi:

²⁹ “Mwaaleele aYixrayeli: ‘Yoowo aneera amveleelele Yave yooveleelela murettele, aruuheke mpatta wa yeeyo ntoko yoomveleelelaawe Yave.

³⁰ Owo aruuheke ni matataawe muneenaawe yoomveleelela Yave yoorehereriwa vayikho. Owo aruuheke makhura vamoha ni ehoce iinainiheraka ehoceene yeeyo ohoolo wa Yave ntoko yooveleela ya wiinainihera.

³¹ Musaserdoti* ahisereke makhura valtaarini*, mene ehoce ti ya Aharoni ni anamwane asilopwana.

³² Nyuwo mumvahe musaserdoti* mwetto woolopwana wa ottuli wa yooveleelela murettele ntoko mpattaawe.

³³ Mwaana mulopwana a Aharoni aneera aveleele ephome ni makhura a yooveleelela murettele aakheleke mwetto woolopwana wa ottuli ntoko mpattaawe.

³⁴ Wa sooveleelela murettele sa aYixrayeli kookuxa ehoce yoowiinainiheriwa ni mwetto omveleeliwa ni koomvaha musaserdoti* Aharoni ni anamwane asilopwana ntoko mpattaaya wa khula nihuku wa aYixrayeli.

³⁵ Ola ti mpatta wa soomveleelela Yave soorehereriwa vayikho siri sa Aharoni ni anamwane asilopwana vanihukuni akhalihiwaaya weera emurumeele Yave ntoko asaserdoti*.

³⁶ Ti yeeyo Yave aalamulenlaawe waavahasa vanihukuni yaattikittheliwaaya eriyari ya aYixrayeli. Ti ekano yoohimala wa ikhapira sootheene.

³⁷ Vano iya ikano mwaha wa yooveleela yoohisa, yooveleela ya irooro, yooveleelela yoottheka, yooveleelela nthowa, yooveleela ya ottikittheliwa ni yooveleelela murettele.

³⁸ Yave aamwinnyerera Moisesi vamwaako Sinayi vanihukuni aalamulenlaawe aYixrayeli omuruuhela Yave sooveleelasaya, munikareni na oSinayi.’”