Levitiku 17 - Emakhuwa Bible

Okhoottihiwa oca ephome

¹ Yave aamweerela Moisesi:

² “Mwamuleele Aharoni ni anamwanaawe asilopwana ootheene nitho aYixrayeli ootheene: ‘Yave onlamulela ha:

³ Akhalaru muYixrayeli aneera aveleele emombe, eputtiputthi hoye hoye epuri mpuwa naari okhwipi okonelingwe,

⁴ ahinaruuha vamulako wa Eheema ya Muthukumano* weera oonihere ntoko yoomveleelela Yave ohoolo wa etabernaakulu* ya Yave, vano mulopwana owo onookhalano nthowa na ephome; owo ooyeeha ephome ni onoomalamalihiwa mmulokonimwawe.

⁵ Eyo entthuneya weera aYixrayeli emurongheleke Yave sooveleelasaya ampakelaaya ottai wa okonelingwe. Awosa emuruuheleke musaserdoti*, eyo tiiyo, wa Yave, vamulako wa Eheema ya Muthukumano ni epakeke ntoko sooveleelela murettele.

⁶ Musaserdoti* amisereke ephome valtaarini* a Yave vamulako wa Eheema ya Muthukumano ni ahiseke makhura ntoko yoowunkhelaxa enimusiveliha Yave.

⁷ Awosa ehipakeletho yakhalaru yooveleela miluku sa ipuri mwa seiyo anlapaaya moota wa mwiikho. Ela ti ekano yoohimala wa yaawosa ni wa ikhapirasaya.’

⁸ Mwaaleele: ‘Akhalaru muYixrayeli hoye hoye namarwa onkhala variyariwaya aneera apake yooveleela yoohisa hoye hoye yooveleela ekina,

⁹ ahinaruuha yeeyo vamulako wa Eheema ya Muthukumano weera amveleelele Yave, mulopwana owo onoomalamalihiwa mmulokonimwawe.

¹⁰ Akhalaru muYixrayeli hoye hoye namarwa onkhala variyariwaya aneera ace yakhalaru ephome ya mwaamunama, vano Miyo kinoothatuwa Mwiittanaawe kimmalamaliheke mmulokonimwawe.

¹¹ Vano okumi wa soopattuxiwa sootheene sineetta ori mphomeni, ni Miyo kohoovahani weera murehererele wiiwanana ni Yave valtaarini*; ti ephome enrehererela okumi wiiwanana ni Yave.

¹² Tivawo kiweerenlaaka aYixrayeli: ‘Ahikhaleru mmoha a nyuwo aneera ace ephome hata akhalaru namarwa onkhala variyariwanyu.

¹³ Akhalaru muYixrayeli hoye hoye namarwa onkhala variyariwaya aneera amulupatthe mwaamunama hoye hoye mwaapalame onkhuuriwa, ayeehereke toko ephome vathi ni uuheeleke etthaya,

¹⁴ niwoko okumi wa soopattuxiwa sootheene sineetta ori mphomeni. Ti niwoko na yeeyo kiweerenlaaka aYixrayeli: ‘Muhiceru ephome ya yakhalaru mwaamunama, niwoko okumi wa soopattuxiwa sootheene sineetta ori mphomeni; yoowo aneera ace onoomalamalihiwa.’

¹⁵ Akhalaru muYixrayeli xaxaxa hoye hoye namarwa aneera amukhuure akhalaru mwaamunama oovettuliwa naari oonyaanyiwa ni axinama a ntuphini, vano mulopwana owo akattheke ikuwosawe ni arapeke. Onookhala oohitteela mpaka oxekuwa ni vahoolowaya onootteelihiwa.

¹⁶ Vaheera owo aahikattha ikuwosawe naari aahirapa, owo onoohaawa mootakhalanimwawe.’”