Ɛfɛsus 2 - Vagla

Yaa dɔɔ miibɔɔrɛ dikuu yaa ni Yeesu Kristo n kpauwɛ wia

¹ Ii faa ɛɛ kunsiwaarɛ. Ii wichɔgaa kpa iabuu birgi guŋ.

² Ii faa ra hiŋ durnya naa ni u wichɔgaa wiarɛ, di ra hiŋ unla n ɛɛ kunchɔgaa yaa siwee n waa na la dɔɔri. Waabuu ɔɔ ra hum dignikpega hina bampiree biini. Yaa maa ni a dignikpega hinaa faa.

³ Yaa maanii faa ra hiŋ baa, di ra ɛɛ wia la maa yaa bɔrahɔŋ n tɛɛ yaa ŋɔ ya ra ɛɛ la, di ra hiŋ yaa kunnyiŋŋichɔgaa ni yaa nfɛrchɔgaa. Yaa ni durnya maa ninɛɛ Kɔraawiizi baaŋ faa du, dikuu yaa machɔgaa la wia.

⁴ Ka Kɔraawiizi n nɔŋŋi yaa werge maa la, u wer suŋ yaa ni werge,

⁵ di lalli yaa siu la yaa n siuwɛ dikuu yaa wichɔgaa la wia biini, yáa ni Kristo maa wer kpau dɔɔ miibɔɔ. Kɔraawiizi n suŋ ii ni wiarɛ ii wer na lɛɛi u be.

⁶ Un lalli yaa ni Yeesu Kristo maa siu biini la, u tɛɛ yaabuu sognibɔra u be, dikuu yaa ni Yeesu Kristo n kpauwɛ wia.

⁷ A maanii u ɛɛ tɛɛ yaa dikuu Yeesu Kristo wia, ú wer kpa yaa wia bagli nɛra la n niŋ haa wa du de ni saŋa maa hina, bá na gunla un suŋ yaa ni di hiini yaa werge maa dikuu yaa ni Yeesu Kristo n kpauwɛ la wia la. U nɛsunaa la kannɔɔ werge. Waa maga dɔɔwɛ.

⁸ Kɔraawiizi n lɛɛ ia ha la, ii winanaa ɛɛi wia lɛi u lɛɛ ia ha. U nɛsunaa ni ii yarda wiarɛ u lɛɛ ia ha. Pɛɛpɛɛrɛ u lɛɛ ia ha, di tɛɛ ia miibɔɔ la.

⁹ Yaa hunnanaa biini lɛi a lii, nɛ́r maa gilɛɛ kuu guŋ wia ra chɔli u hiŋ.

¹⁰ Kɔraawiizii ma yaa. Um ma yaa la, hunnanaa humaa wiarɛ u ma yaa, yá wer humaa Yeesu Kristo fɔŋŋa biini. U feloore dau a hunnanaa tɛɛ yaa saŋa maa, ya ŋmɛnɛ wer humaa.

Yaa ɛɛ kpannɛ Yeesu Kristo wia

¹¹ Awia, ií ra liizi gunla iiŋ faa duwɛɛ la. Ii waa Jus hina ɛɛwɛ, awia, ii waa ii hɛna teŋree. Banla n teŋri ba hɛna la faa ra gbɛlli iabuu dikuu guŋ wia. Ka ba hor la ɛɛ bɔrahɔŋ mɔnnaa bɛnnɛ.

¹² Ii faa waa Kristo wia zummɛ. Ii faa waa wiimaa dɔɔwɛ Jus hina wia biini. Ii faa waa Kɔraawiizi nua la uŋ ŋɔwɛɛ kuari u ni u nɛra nuukpaŋ dɔɔi wia zummɛ. Ii faa waa tamii maa dɔɔwɛ ka du de. Ii faa waa Kɔraawiizi zummɛ ú wer hiini ia.

¹³ Ka filaŋkeŋ, ii banla n faa du bɔɔnɛɛ bɔɔnɛɛ la, Kɔraawiizi kuu ii ni Yeesu Kristo n kpauwɛ la wiarɛ, di kpa ia dugli u be. Yeesu chal wiarɛ guŋ wer ɛɛ.

¹⁴ U gillɔɔ yaa dɔɔ nuukpaŋ, di gil yaa banla n faa bargi dɔŋa be birgi kpaŋ. Gunla yaa n faa hah dɔŋa la faa ɛɛwɔɔ lugɔ koŋlii, di teŋ yaa baaŋ. U jaa purgi a maanii ta.

¹⁵ U himmaa bɔrahɔŋ ninɛɛ u ɛɛ gunla, di lizi Moosis Gbɔgni hiŋaa la yaa be, á widaulaa gilɛɛ kaa ra bargi yaa, ka ú wer kpa yaa maa birgi kuŋfalii ni kuŋkpaŋ, dikuu yaa maa nuu n kpauwɛ wia. Gunnɛ u ɛɛ di gil yaa dɔɔ nuukpaŋ.

¹⁶ Wia la maa n faa bargi yaa, yaa hah dɔŋa la, u chɔgi a maanii ha daakaŋlii la ni, di gil yaa maa birgi kpaŋ, di kaa kuari yaa ni Kɔraawiizi wia tɛɛ yaa gunla,

¹⁷ ka wa bagli ii banla n faa du bɔɔnɛɛ ani banla n faa duglɛɛ la maa lugɔ nuukpaŋ jaa du denii.

¹⁸ U wiarɛ yaa maa wer hel yaa Mɛɛ Kɔraawiizi be. Yaa maa dɔɔ u Dumnanii. U Dumnanii la ɔɔ giluu yaa wer ra hel u be.

¹⁹ Awia, ii waa kaa ɛɛ hɔɔhra. Ii ɛɛ bol biizii, di ɛɛ Kɔraawiizi nɛra.

²⁰ U gillɔɔ ii ɛɛ u dia koŋlaa. U huŋhunna ni u dɔgtɛɛzi ɛɛ u zɛɛ. Yeesu Kristo ge ɛɛ binanii la baŋ kpawɛɛ chiŋŋi a dia zɛɛ.

²¹ Banla maa ba nuu n kpauwɛ la choŋŋi u ni, dia la ra hel di ɛɛ Kɔraawiizi Dia, dikuu yaa Dɔɔri la wia.

²² Ii gba du denii di ɛɛ dia la Kɔraawiizi n na ma ú ɛɛ u duuribɔr la, dikuu u Duma n du ii ni la wia.