Daniɛl 3 - Vagla

Saliŋ vug ni ninzeŋ wia

¹ Koorizeŋ Nɛbukadnɛɛza gil ba kpa saliŋ kuari vug, u chiŋ laŋaa ɛɛ nogumzi tokkoahoro, u wassi ge ɛɛ nogumzi anumbɛl, di kpau chiŋŋi lɛl bɛl banna yir Dura biini, Babilɔn hɛri.

² Denii u chaali u hɛri nabɔnzi maa, sitɔɔra, hɛssi nabɔnzi, nabɔnzi la n na biruu liize, kebibinna, sitɔɔra, seriya diire ani nabɔnzi la maa n du u kora diiribɔr biini. Bá wa faari di kuari vug la uŋ chiŋŋɛɛ la.

³ Ba maa n wa chaalɛɛ bá kuari Koorizeŋ Nɛbukadnɛɛza vug la uŋ chiŋŋɛɛ la, ba ga chi a vug see.

⁴ Denii siiri sii di ŋɔ werge maa, “Hɛssi hina, nɛra maa ani mɔɔrizi maa, kenne koorizeŋ ŋɔ ií ɛɛ,

⁵ di ii haŋ wa nuu nyigaa, tiitorii, kem, janjalaŋ, kaloopezi ani duarikuna iri maa wiraa, a dɛkkɔɔ ií chɔɔ hɛri di jaami vug la Koorizeŋ Nɛbukadnɛɛza n chiŋŋɛɛ la.

⁶ Unla maa waa haŋ wa sɛɛ chɔɔ di jaamuu, ba daŋ kpau ha ninzeŋ biini.”

⁷ Awia, baŋ haŋ waa nuu a kuna naa maa wiraa, a nɛra maa maa chɔɔ, di jaami kunla Koorizeŋ Nɛbukadnɛɛza n kpa saliŋ kuari chiŋŋi la.

⁸ Kenne a ɛɛ, banla n zum chinchiŋwilaa wikpoglaa la baŋhina na ŋmɛnɛɛ bá chɔgi Jus hina la wia.

⁹ Ba ŋɔ Koorizeŋ Nɛbukadnɛɛza be, “Jara, Kɔ́raawiizi tɛi miibɔɔjaŋ, í du de di hanna la!

¹⁰ Jara, i du gbɔgrɛ lugɔ di unla maa haŋ wa nuu nyigaa, tiitorii, kem ani duarikuna la maa wiraa, a dɛkkɔɔ u chɔɔ, di jaami saliŋ vug la,

¹¹ di unla maa haŋ wa vɛɛ guŋ ɛɛi, bá kpau ha ninzenzeŋ biini.

¹² Ka Jus hina la hiŋ tɛɛ Babilɔn paga nabɔmuu la, Sadrak, Mɛsak ani Abɛdnigo waa, waa sɛɛwɛ. Ba waa i vuga ra hum gɛɛ di ra jaami saliŋ vug la hiŋ chiŋŋɛɛ la.”

¹³ Koorizeŋ la baaŋ fuuh werge maa, u ŋɔ bá yir ba nɛra bahoro hiŋ. Denii ba kpogli baa ba u be,

¹⁴ u pɛɛzi baa, “Sadrak, Mɛsak ani Abɛdnigo, wibiire ii waa n vuga ra hum gɛɛ di ra jaami saliŋ vug la miŋ chiŋŋɛɛ laa?

¹⁵ Awia, filaŋkeŋ, di ii haŋ wa nuu nyigaa, tiitorii, kem ani duarikuna la maa wiraa, ií ɛɛ sirya di jaamuu nɛnnɛ. Ka di ii wa vɛɛwɔ, ba daŋ kpa ia ha ninzenzeŋ biini manaŋ, ń na, di vug bɛl du denii ú wer lɛɛ ia ha, lii n nonee biini gɛɛ?”

¹⁶ Denii Sadrak, Mɛsak ani Abɛdnigo bir ŋɔ u be, “Jara, yaa waa wii maa dɔɔwɛ, ya ŋɔ mɔgli yaa hinaa.

¹⁷ Jara, di ba kpa yaa ha a ninzenzeŋ biini, Kɔraawiizi la yaa n na hum la daŋ wer mɔgli yaa lii u biini, di lɛɛ yaa lii i nonee biini.

¹⁸ Haali di waa guŋ wa ɛɛwɛ gba, ka yaa ra nyiŋŋuu i zum lugɔ yaa wàá hum i vuga gɛɛ di sɛɛ saliŋ vug la hiŋ chiŋŋɛɛ la dɔɔra maa.”

¹⁹ Denii Koorizeŋ Nɛbukadnɛɛza baaŋ fuuh, Sadrak, Mɛsak ani Abɛdnigo ni werge maa, u manni bir kur ba ni. U gil ba bir kuari niŋ la du, u ra lau zagzagzag, di kaali gunla uŋ faa duwɛɛ la, buniidaanɛɛ.

²⁰ Denii u ŋɔ u laallɔɔra la baŋhina n dɔɔ fɔŋŋa werge be lugɔ bá vɔɔzi baa, di kpa baa ha a ninzenzeŋ biini.

²¹ Awia, ba vɔɔzi ba ni ba laala la maa baŋ laalɛɛ, ba tagtajaŋraa, galinjaŋraa, namuzii, di kpa baa ha a ninzenzeŋ biini.

²² Dikuu a koorizeŋ n ŋɔ ba ɛɛ guŋ manaŋ, a niŋ ge faa ra haahri werge maa wia, a niŋ faa kpu laallɔɔra la n kpa Sadrak, Mɛsak ani Abɛdnigo ha u biini la,

²³ ka ba nɛra bahoro naa baŋ vɔɔzɛɛ nɛnnɛ la, ga chol a niŋ biini.

²⁴ Kakpaŋ, Koorizeŋ Nɛbukadnɛɛza jeŋki naazi, di pɛɛzi banla n na biruu liize la, dikuu u nua n kpuwɛɛ wia, di ŋɔ, “Baala bahoro lɛi yaa vɔɔzi ha a niŋ biini laa?” Ba bir ŋɔ, “Jara, gunnɛ a ɛɛ.”

²⁵ U ŋɔ, “Ií na, n na baala banaazu n volle ra bar a niŋ biini, ba waa fuuhwe, ka naazuhiŋ la du lugɔ mɛlika.”

²⁶ Koorizeŋ Nɛbukadnɛɛza jaa tuzi hel a ninzenzeŋ dominua, di ga gbooli werge maa, “Sadrak, Mɛsak, ani Abɛdnigo, Kɔraawiizi La N Kaali Kummaa la balaa, ií lii ba ɛŋ!” Awia, Sadrak, Mɛsak ani Abɛdnigo lii a niŋ biini.

²⁷ Sitɔɔraa, hɛssi nabɔnzii, laallɔɔra nabɔnzii ani nabɔnzi la maa n jaawɛ, wa bar baa, di na lugɔ niŋ la waa ba bɔrahɔna ɛɛwɛ wiimaa gɛɛ ba nyuhuŋ kpaŋ gba waa nyursɛɛ, ba tagtazi waa fuuhwe, ba waa nyɔɔzi gba ra sɔɔhri.

²⁸ Denii Koorizeŋ Nɛbukadnɛɛza ŋɔ, “Chɔlaa ɛɛ Kɔraawiizi la Sadrak, Mɛsak ani Abɛdnigo n na hum la hotte, unla n hum u mɛlika di lɛɛ u balaa! Ba yarduubuu, di vɛɛ mìŋ́ koori wiŋɔɔlii. A par baabuu lugɔ bá kpa ba miibɔɔni chɛr siu kaali ban niŋ hum di jaami vuga aŋhina, see ba himmaa Kɔraawiizi la banna hum.

²⁹ Awia, n du gbɔgrɛ lugɔ hɛri bɛl maa nɛra gɛɛ mɔɔri iri maa hina, n niŋ kaa ŋɔ wiimaa zuu Kɔraawiizi la Sadrak, Mɛsak ani Abɛdnigo n na hum la ni, bá mɔnni baa jigzijigzi, di purgi ba diini á chɔɔ kulululu, dikuubɛɛwiai, vug maa wàá wer lɛɛ nɛra keŋ dɔŋ maa.”

³⁰ Denii Koorizeŋ Nɛbukadnɛɛza kaa bir jaa Sadrak, Mɛsak ani Abɛdnigo nabɔmuu, Babilɔn paga maa.