Daniɛl 2 - Vagla

Koorizeŋ Nɛbukadnɛɛza deeza wia

¹ Koorizeŋ Nɛbukadnɛɛza kora dii binni anɛɛhiŋ biini, u faa chɔɔwɔɔ deezi, u nfɛrɛ ra koozuu, waa kaa wer u chɔɔ dɔɔ.

² Awia, u chaali banla n na biruu liize, vugra, hila, nunzunna ani banla n zum chinchiŋwilaa wikpoglaa, bá bagluu u deeza hiŋ zɛɛ. Baŋ wa zuuwɛ chi u see,

³ u ŋɔ ba be, “Deeza bɛllɛ n deezi, u ra tɔɔriŋ werge maa, n na nyiŋŋi ń zum u zɛɛ.”

⁴ Denii ba ŋɔ u be Aram hina mɔɔri biini, “Ee, Jara, Kɔ́raawiizi tɛi miibɔɔjaŋ i de dui naa biini, di hanna la! Bagli yaa i deeza hiŋ, ya baglii u zɛɛ.”

⁵ A koorizeŋ ŋɔ ba be, “Kenne n dau lugɔ ń ɛɛ. Di ii waa haŋ bagliŋ n deeza hiŋ ani u zɛɛ, n daŋ gil bá ŋmɛnni ia jigzijigzi, di gil bá purgi ii diini, á chɔɔ kulululu.

⁶ Ka di ii bagliŋ n deeza hiŋ ni u zɛɛ waa, ii daŋ na sunzaazi ni girme werge n be. Awia, ií bagliŋ n deeza hiŋ ni u zɛɛ.”

⁷ Ba kaa kuari ŋɔ, “Jara, jaande maa, bagli yaa i deeza hiŋ, ya ge wer baglii u zɛɛ.”

⁸ Denii a koorizeŋ ŋɔ, “N zummɔ lugɔ ii ra ɛɛ dawarii ii na saŋa di fɛ nfɛrɛ, dikuu gunla miŋ dauwɛ tɛɛ ia la wia.

⁹ Di ii waa haŋ bagliŋ n deeza hiŋ, n daŋ tɛr ii digna. Ii ta jinaa di ɛɛ nuukpaŋ lugɔ ii kanni kara ra tɛŋ, dikuubɛɛwiai, ii ɛɛ tamiirɛ lugɔ wia daŋ birgi. Awia, ií bagliŋ n deeza hiŋ, denii n zum lugɔ ii daŋ wer bagliŋ u zɛɛ gba.”

¹⁰ Banla n na biruu liize la bir ŋɔ u be, “Jara, nɛr maa waa hoo durnya naa, ú wer ɛɛ wii naa hinna nyiŋŋi naa! Koori maa ge, haali gunla u zenni ni u fɔŋŋa n makkɛ gba, ŋmɛnɛ maa haa waa a wii naa dɔŋ pɛɛzɛɛ lii vugra ni hila gɛɛ nunzunna gɛɛ nɛra la n zum chinchiŋwilaa wikpoglaa be.

¹¹ Gunla Jara n na nyiŋŋi la kpolloo werge maa. Nɛr maa wàá wer pilluu tɛɛ Jara, see vuga, a ge waa newea be ra zuu.”

¹² Guŋ gil a koori baaŋ fuuh werge maa, u dau lugɔ bá kpu Babilɔn hɛri nunzunna maa.

¹³ Awia, ba du gbɔg lugɔ bá kpu a nunzunna maa, di hum nɛra lugɔ bá nyiŋŋi Daniɛl ni u dammuzi la, di kpu ba ge gba.

¹⁴ A koorizeŋ guure nabɔma banna yir Ariɔk, n wa liwɛɛ ú kpu Babilɔn hɛri nunzunna maa, Daniɛl ŋɔ wia tɛu ni nunzuma werge maa,

¹⁵ di pɛɛzi a koorizeŋ guure nabɔma la, “Bɛɛ wiarɛ koori du keŋ gbɔgkpeg naanɛi?” Denii Ariɔk bagli a zɛɛ tɛɛ Daniɛl.

¹⁶ Guŋ gil Daniɛl la a koorizeŋ be di ga suŋŋi saŋa, ú wer bagli a deeza zɛɛ tɛu.

¹⁷ Daniɛl bir la dia di ga bagli a wia tɛɛ u dammuzi, Hanania, Misɛl ani Azaria.

¹⁸ Uŋ wa bagli guŋ tɛɛ baa tuŋ, u ŋɔ ba be siaahmu ni, dí ba aah siwii suŋŋi Kɔraawiizi La N Na Di Kora Chiŋ la, ú na ba sinyɛna, di pilli a wisuahlii naa tɛɛ baa, guŋ gil bá gilɛɛ wa kpu u ni baa ni Babilɔn hɛri nunzunna maa.

¹⁹ Hamuŋa ni, Kɔraawiizi pilli a wia lugɔ deeza biini ni u zɛɛ di bagli Daniɛl. Daniɛl chɔli Kɔraawiizi La N Na Di Kora Chiŋ la,

²⁰ di ŋɔ, “Kɔraawiizi sɔŋ dɛg dargaarɛ saŋaa saŋa maa, nunzuma ni fɔŋŋa ɛɛ u horaa.

²¹ Waabuu gillɛ saŋazi ra birgi, di ra soŋŋi koora, waabuu ra wir baa. Di ɔɔ tɛɛ nunzunna nunzuma, di ra tɛɛ banla n dɔɔ nfɛrɛ, wia zɛɛ zumaa.

²² Waabuu ɔɔ pilli wiluŋe ni wisuahlaa, di zum kunla n du bɔbiri biini, bɔchaaŋ du u benii.

²³ N Dɔɔri Kɔraawiizi la n mɛɛwaa n na hum, n na jaamiibuu di ra chɔlii. I tɛmbuu nunzuma ni fɔŋŋa werge, di bagliŋ kunla yaa n suŋŋii, i pilli koorizeŋ deeza labuu bagli yaa.”

Daniɛl n bagli a koorizeŋ deeza wia

²⁴ Denii Daniɛl la Ariɔk be, unla a koorizeŋ n faa lizɛɛ ú kpu Babilɔn hɛri nunzunna maa la, di ga ŋɔ u be, “Gilɛɛ kpu Babilɔn hɛri nunzunna la. Kpogliŋ la koorizeŋ be ń ga bagli u deeza hiŋ zɛɛ tɛu.”

²⁵ Ariɔk kpogli Daniɛl la a koorizeŋ be manaŋ, di ga ŋɔ, “N na baal bɛllɛ lii Juda hina la yaa n laurɛɛ ba la biini, ú wer baglii i deeza la zɛɛ.”

²⁶ A koorizeŋ pɛɛzi Daniɛl, unla banna yir Bɛltisaaza la, “I daŋ wer bagliŋ kunla min nawɛɛ n deeza la biini, di bagli u zɛɛ tɛŋŋ?”

²⁷ Daniɛl bir ŋɔ u be, “Jara, nunzunni gɛɛ vugri gɛɛ hil gɛɛ nɛr la n zum chinchiŋwilaa wia waa hoo ú wer pilli wisuahlii naa hinna nyiŋŋi naa,

²⁸ ka Kɔraawiizi n du chiŋ bɛnnɛ ra pilli wisuahlaa. U bagli Koorizeŋ Nɛbukadnɛɛzaa wia la n niŋ ŋmɛnɛ wa ɛɛ. Wia la hiŋ nawɛɛ lii deeza la hiŋ chɔɔwɛ deezi labuu keŋ.

²⁹ Jara, hiŋ faa chɔɔwɛ la, i nfɛrɛ faa bittɔɔ du wia la n niŋ ŋmɛnɛ wa ɛɛ la ni. Unla n ɔɔ ra pilli wisuahlaa labuu kpa a wia la n niŋ ŋmɛnɛ wa ɛɛ la baglii.

³⁰ Ka miŋwaa, u pilli wisuahlii naabuu tɛŋ, a waa lugɔ miŋ dɔɔ nunzuma werge kaali newee maa wiarɛ. Jara, ka a ɛɛwɔɔ í wer zum i deeza naa zɛɛ, di zum wia la maa n ba i nfɛrɛ biini la zɛɛ.

³¹ Jara, i binnɔɔrɛ di na baŋ ma kumbɛl lugɔ newee, u du kaŋ werge di chi i see, di ra nyɛgzi werge maa, u duula dɔɔ ɔnsii werge.

³² Saliŋ himmaanii ba kpa ma u nyuu, di kpa saliŋhuŋŋu ma u kuge, di kpa danyɛ ma u hia ni u naapɔga,

³³ u gballi ɛɛ lugbia, u naapezi ge ɛɛ lugbii ni chuuri la n kpekke di koozi dɔŋa ni.

³⁴ Hinna binnuu la, bizeŋ yembɛl ku, di nɛr maa wɔɔ gbɔgzɛɛ, di wa lɔ a kuŋ naapezi la n ɛɛ lugbia ni chuuri n koozi dɔŋa la, di purgi a maa burburbur.

³⁵ Denii a lugbii, a chuuri, a danyɛ, a saliŋhuŋŋu ani a saliŋ maa purgi kakpaŋ, di birgi lugɔ nɔɔri n chɔɔ pila lumaŋa. Peu paagaa kaali, a tama maa waa kawɛɛ gba. Ka bii la n lɔ a kuŋ purgi la birgi bizenzeŋ, di tɔ hɛri maa.

³⁶ Jara, i deeza hinnɛ guŋ. Yaa daŋ baglii u zɛɛ filaŋkeŋ.

³⁷ Jara, hinuu Koora Maa Koori. Kɔraawiizi La N Na Di Kora Chiŋ la tɛibuu kora, fɔŋŋa, zenni ani girme.

³⁸ U kpa newea, sela ani zumbizi maanii du i nonee biini. U gillɔɔ i di kora a maa ni, bɔr la maa aŋ duwɛɛ. Hinuu a kuŋ nyuu la n ɛɛ saliŋ la.

³⁹ Di i saŋa wa tunnɔ, kora bɛl daŋ kaa ba, ka wàá hel i hor naa. U ge har, horohiŋ kaa lii di ɛɛ lugɔ danyɛ hor, di di kora durnya naa maa ni.

⁴⁰ Unnii har, kornaazuhiŋ ba, di du kpeg lugɔ lugbii, dikuubɛɛwiai, lugbiirɛ ɔɔ wer purgi kummaa burburbur. Gunla lugbii n ɔɔ purgi kuna burburbur la, gunnɛ u wa purgi kossi la maa n tɔ u see la.

⁴¹ Gunla hiŋ haŋ na u naapezi ni naanibee n ɛɛ lugbia ni chuuri la, gunnɛ a kora naa dee wa bargi, ka haa dɔɔ fɔŋŋa lugɔ lugbii, gunla hiŋ na lugbii n koozi chuuri ni la.

⁴² Gunla u naanibee n koozi chuuri ni lugbii la, gunnɛ a kora naa fɔŋŋa wa du, u yeŋ du kpeg, u yeŋ ge gɛrgi.

⁴³ Gunla ge hiŋ na lugbii n koozi chuuri ni la, gunnɛ nɛra wa koozi dɔŋa ni, di du de, ba wàá dɔɔ nuukpaŋ maa gunla chuuri ni lugbii n wàá wer koozi dɔŋa ni, di lau dɔŋa nɛnnɛ la.

⁴⁴ A guŋ koora dii saŋa, Kɔraawiizi La N Na Di Kora Chiŋ la daŋ chiŋŋi kora bɛl, nɛr maa ŋmɛnɛ maa wàá wer chɔguu gɛɛ di kpegluu. U daŋ chɔgi a kossi maa nyaamm, ka du de di hanna la.

⁴⁵ Bizeŋ bɔr la hiŋ nawɛɛ uŋ kuwee, ka nɛr maa wɔɔ gbɔgzɛɛ, ni gunla uŋ wa lɔ kunla baŋ kpa lugbii, danyɛ, chuuri, saliŋhuŋŋu ani saliŋ di ma lugɔ newee di purguu burburbur la, a deeza hinnɛ guŋ. Kɔraawiizi La N Kaali Kummaa la bagli hìŋ́ koorii wia la n niŋ ŋmɛnɛ wa ɛɛ. Gunnɛ i deezi la, u zɛɛ la miŋ baglii la ɛɛ wibiire.”

⁴⁶ Denii Koorizeŋ Nɛbukadnɛɛza chɔɔ pi Daniɛl see, di kpau girme, ka ŋɔ bá ba sunzaa ni daahɛgsɔɔhsuma ni, di wa tɛu.

⁴⁷ A koorizeŋ ŋɔ Daniɛl be, “Wibii maa, Kɔraawiizi la hinna hum labuu kaali vuga maa. Waabuu dɔɔra maa Dɔɔri, di ɛɛ unla n na pilli wisuahlaa, dikuu hiŋ wette pilli n wisuahlii naa wia.”

⁴⁸ Denii a koorizeŋ tɛɛ Daniɛl nabɔmuu werge maa, di sunzuu kuŋkpila werge maa, di gil u ra binni Babilɔn paga ani ba nunzunna maa ni.

⁴⁹ Daniɛl suŋŋi a koorizeŋ, ú gil Sadrak, Mɛsak ani Abɛdnigo birgi nabɔnzi Babilɔn paga, ka Daniɛl waa himmaa ɛɛ a koorizeŋ nabɔma bɛl.