2 Tɛsalɔnika 2 - Vagla

Biinikpola hiŋ wia

¹ Yaa Dɔɔri Yeesu Kristo balaa wia naa ni gunla yaa maa n niŋ chaali u be naa, n na suŋŋi ia, yaabalaa,

² ií zum a wia nɛnnɛ. Maa nyiŋŋi nɛr maa wer ŋɔ witama keŋ ii banchulli tenna lɔ ii ra fɛ lugɔ yaa Dɔɔri hɔpizii la teŋ ballɔɔ. Di ba ŋɔ Kɔraawiizi Dumaa bagli baa guŋ ba ra ŋɔ, di ii nuu guŋ nɛr maa be, gɛɛ di ii na hɔŋ bɛl ba dar ia lugɔ yaabuu sɛbuu, ka ii gilɛɛ sɛɛ di gil u guŋ tir ia.

³ Ií gilɛɛ gil nɛr maa wer dar ia wii naa wia. Ií zum lugɔ wia aŋhinaa niŋ waa ɛɛ mɔɔ ka á hɔpizii haa ba. Saŋa la nɛra n niŋ izi vɛɛ Kɔraawiizi labuu niŋ ba mɔɔ. Nɛr la n ɛɛ gbɔgchɔgrizeŋ hiŋ daŋ lii mɔɔ, unla Kɔraawiizi baaŋfuuih n teŋ du u ni lugɔ ú chɔguu la.

⁴ A hiŋ daŋ naa kunla maa nɛra n na tɔgzi di ra jaami la, di kpa u hiŋ bɔ a maa, di kaa kpa Kɔraawiizi Dia la birgi u sognibɔr, di ŋɔ lugɔ waabuu Kɔraawiizi.

⁵ Ii waa liizi miŋ faa ɔɔ ra bagli ia guŋ saŋa la miŋ faa du ii be laa?

⁶ Ii zum kunla n na teŋuu ŋmɛnɛɛ ú gilɛɛ wer lii mɔɔ ka ú saŋa wa hel tuŋ labuu.

⁷ Ama, gbɔg chɔgaa wia teŋ du denii, ka a wàá wer tɔ see mɔɔ, di ba waa kunla n na teŋaa ŋmɛnɛɛ la lizɛɛ lɛi.

⁸ Di ba wa lizuu, denii gbɔgchɔgrizeŋ hiŋ ge lii chaaŋ ya zumuu. Ka di yaa Dɔɔri Yeesu wa ballɔ, u daŋ chɔg u ni u huma la maa manaŋ. U heeza bɛŋ daŋ wer kpuu, ú balaa chaanaa la ge chɔg u huma la.

⁹ Sitaanii niŋ du a hiŋ ni ra hiinuu werge maa, ú wer dɔɔ fɔŋŋa werge di wer ra ɛɛ wizenaa, witittaa ani nuukpuuri wia ra dar nɛra,

¹⁰ di ra ɛɛ wichɔgaa maa dee n du de, di wer ra dar banla n niŋ siu. Kɔraawiizi daŋ chɔgi baa dikuu baŋ faa waa sɛɛwɛ bá nɔŋŋi wibii la ú faa wer lɛɛ baa wia.

¹¹ Awia, u daŋ hum kundattaa ra tɛɛ baa á tɔ ba siwee bá sɛɛ kara wia,

¹² ka ú wer di banla maa n waa sɛɛwɛ tɛɛ u wibii la ka ra ɛɛ wichɔgaa a zuu baa suma la seriya bá chol.

Ií chi chigigi

¹³ Awia, a dɛkkɔɔ yaa n na jaami Kɔraawiizi saŋa maa dikuu ii wia, yaabalaa. U nɔŋŋi iabuu werge di lizi ia tɛɛ u hiŋ durnya faaraa la maa, ka ii wer wa na lɛɛi filaŋkennaa. U Dumnanii gillɔɔ ii doŋa maa lii ii ni ii ge sɛɛ u wibii. Awiarɛ u lɛɛ ia la.

¹⁴ Yaa n faa lizi amaniyesuma la tɛɛ ia ii sɛɛ la, Kɔraawiizii faa ra yir ia ií wer dɔɔ girme yaa Dɔɔri Yeesu Kristo be.

¹⁵ Awia, yaabalaa, ií haa lau chigigi di ra hiŋ. Baglaa la maa yaa n kpa nua bagli ia ani anla yaa n sɛbɛɛ tɛɛ ia hɔŋ biini la, ií gil a maa du ii bampiree nɛnnɛ.

¹⁶ Yaa Dɔɔri Yeesu Kristo himmaa ni yaa Mɛɛ Kɔraawiizi la n nɔŋŋi yaa werge di suŋ yaa ni di hiini yaa di du yaa bɔkpega la n waa tuŋ ani taminanii la,

¹⁷ bá du ia bɔkpega di gil ií lau nɛnnɛ, ií ɔɔ wer ɛɛ winanaa dee maa di wer ra ŋɔa ge.