СВЯТОЙ АПОСТОЛ ПАВЕЛЫН ФИЛИППЫШТЕ ИЛЫШЕ-ВЛАКЛАН КОЛТЫМО СЕРЫШЫЖЕ 4 - У Сугынь

4 ГЛАВА 2-9 Каҥаш-влак. 10-20 Пӧлеклан тауштымаш. 21-23 Чеверласымаш.

¹ Тыгеже, йӧратыме да ужмо шумо иза-шольым-влак, мыйын куанем да сеҥымаш вуйшӱдышем, Господь дене тыге ушнен шогыза, йӧратымем-влак.

² Господь дене ушнен икоян лияш Еводиям да Синтихиям сӧрвалем.

³ Туге, тыйымат йодам, пашаште ӱшанле йолташем: нине ӱдырамашлан полшо, нуно мый денем пырля, тыгак Климент да мый денем ыштыше моло еҥ дене пырля Поро Увер верч тыршеныт. Нунын лӱмышт – илыш книгаште.

⁴ Господь дене ушнен эре куаныза. Угыч каласем: куаныза!

⁵ Тендан тыматле улмыда чыла еҥлан палыме лийже; Господь лишнак.

⁶ Нимо нергенат ида тургыжлане, а, кумалын, тауштен да сӧрвален, йодмыдам чыла годымат Юмылан палдарыза.

⁷ Тунам Юмын кеч-могай уш деч кӱшнӧ шогышо тыныслыкше тендан шӱмдам да шонымыдам Христос Иисус дене ушнымаште арала.

⁸ Пытартышлан, иза-шольо-влак, чыла, мо чын, мо пагалыме, мо сай, мо ару, мо келшыше, мо мокташ йӧрышӧ – мо гына поро лиеш да тауштымым шога гын, тидын нерген шоныза.

⁹ Мый дечем те молан тунемында, мом налында, колында да ужында, тудым ыштыза, да тыныслыкым пуышо Юмо тендан дене лиеш.

¹⁰ Те ынде мыйын верч угыч тыршаш тӱҥалында, садлан Господь дене ушнен моткоч куанышым. Те ондакат полшынеда ыле, но йӧнда лийын огыл.

¹¹ Мый йорло улмемлан огыл тидым ойлем, мый мо улмо дене серлагаш тунемынам.

¹² Мый чӱдӧ илыш денат, улан илыш денат илен моштем, чыла годымат да чыла вереат темын илашат, шужашат, улан але йорлын илашат тунемше улам.

¹³ Мылам вийым пуэн шогышо [Иисус] Христос дене мый чылажымат кертам.

¹⁴ Туге гынат мылам орлыкем куштылемдаш полшымыда дене те сай ыштенда.

¹⁵ Те, Филиппыште илыше-влак, шкеат паледа: Поро Увер шарлаш тӱҥалме годым, Македоний гыч лекмекем, тендан деч моло ик черкат мыланем полышым пуэн огыл.

¹⁶ Фессалоникыште улмем годымат те кӱлмӧ годым мылам ик гана веле огыл полышым колтенда.

¹⁷ Тендан деч пӧлекым налашлан огыл тидым ойлем, но поро паша лектышда ешаралтмым ужмем шуэш.

¹⁸ А мый чыла налынам, чылажат лыҥ уло. Тендан колтымыдам Епафродит деч налынамат, мыйын чылажат шуко. Мом те пуэнда, тиде «тамле пушан пӧлек», «Юмылан келшыше, йӧрышӧ надыр».

¹⁹ Мыйын Юмем тек тендан чыла кӱлешдам чап дене шке поянлыкше почеш Христос Иисус гоч тема.

²⁰ Юмылан, мемнан Ачаланна, курым-курымеш чап лийже. Аминь.

²¹ Христос Иисус дене ушнен шогышо чыла святой-влаклан саламым каласыза. Мыйын пеленем улшо иза-шольо-влак тыланда саламым колтат.

²² Тыланда чыла святой, поснак кесарьын полатысыже-влак, саламым колтат.

²³ Тек Господьна Иисус Христосын порылыкшо чыланда дене лиеш. Аминь.