СВЯТОЙ АПОСТОЛ ПАВЕЛӸН ФИЛИППӸШТӸ ӸЛӸШӸВЛӒЛӒН КОЛТЫМЫ СИРМӒШӸЖӸ 4 - У Согонь

4 ГЛАВА 1 Кӓнгӓшвлӓ. 10 Подаркалан таум ӹштӹмӓш. 21 Цеверӹн кодаш согонь.

¹ Тенгежӹ, яратымы дӓ ужаш шанымы шӱмбелемвлӓ, мӹньӹн сусуэм дӓ сӹнгӹмӓш вуй ӓршӓшем, Господь доно ушнен шалгыда, яратымывлӓэм.

² Господь доно ушнен, икышын лиӓш Еводиям дӓ Синтихиям сарвалем.

³ Тенге, тӹньӹмӓт ядам, пӓшӓштӹ ӹнян тӓнгем: ти ӹдӹрӓмӓшвлӓлӓн палшы, нӹнӹ мӹнь донем иквӓреш, тенгеок Климент дӓ мӹнь донем ӹштӹшӹ вес эдемвлӓ доно иквӓреш Пуры Увер верц цаценӹт. Нӹнӹн лӹмвлӓштӹ – ӹлӹмӓш книгӓштӹ.

⁴ Господь доно ушнен, соок ӹвӹртӹдӓ. Угӹц келесем: ӹвӹртӹдӓ!

⁵ Тӓмдӓн пуры кымылда цилӓ эдемлӓн пӓлӹмӹ лижӹ; Господь лишнок.

⁶ Нима гишӓнӓт идӓ тыргыжланы, а, ыдылын, сарвален дӓ таум ӹштен, ядмыдам цилӓ годымат Йымылан пӓлдӹртӹдӓ.

⁷ Тӹнӓм Йымын хоть-махань ыш гӹц кӱшнӹ шалгышы тыржы тӓмдӓн шӱмдӓм дӓ шанымыдам Христос Иисус доно ушнымашты перегӓ.

⁸ Остаткаэш, шӱмбелвлӓ, цилӓ, ма лачок, ма жеплӹмӹ, ма тӧр, ма ире, ма келшӹшӹ, ма хваляш ярышы – ма пуры ылеш дӓ таум ӹштӓш ярал ылеш гӹнь, тидӹ гишӓн шаныда.

⁹ Мӹнь гӹцем тӓ маэш тыменьӹндӓ, мам нӓлӹндӓ, колында дӓ ужында, тӹдӹм ӹштӹдӓ – дӓ тырым пушы Йымы тӓ сагада лиэш.

¹⁰ Тӓ ӹнде мӹнь верцем угӹц шытырланаш тӹнгӓлӹндӓ, седӹндон, Господь доно ушнен, пишок ӹвӹртӹшӹм. Тӓ молнамат палшынедӓ ыльы, но йӧндӓ ылде.

¹¹ Мӹнь укеӓн ылмем гишӓн агыл тидӹм попем, мӹнь ма ылмы доно сусу лиӓш тыменьӹнӓм.

¹² Мӹнь незерӹштӓт, уланыштат ӹлен мыштем, цилӓлӓн дӓ цилӓштӓт тыменьӹнӓм: темӹн ӹлӓшӓт, шужашат, улан ӓль незерӹн ӹлӓшӓт тыменьшӹ ылам.

¹³ Мӹлӓнем силам пуэн шалгышы [Иисус] Христос доно мӹнь цилӓ ӹштен кердӓм.

¹⁴ Тенге гӹнят мӹлӓнем нелӹ ылмы годым палшымыда доно тӓ яжон ӹштендӓ.

¹⁵ Тӓ, Филиппӹштӹ ӹлӹшӹвлӓ, ӹшкеӓт пӓледӓ: Пуры Уверӹм шӓрӓш тӹнгӓлмӹ годым, Македони гӹц лӓкмӹкем, тӓ гӹцдӓ пасна молы ик церкӓт мӹлӓнем окса доно палшыде.

¹⁶ Фессалоникӹштӹ ылмем годымат тӓ келмӹ годым мӹлӓнем ик гӓнӓ веле агыл палшыкым колтендӓ.

¹⁷ Тӓ гӹцдӓ подаркам нӓлӓш манын агыл тидӹм попем, но пӓшӓ кӹцкӹдӓ тӓлӓндӓ шукеммӹм ужмем шоэш.

¹⁸ А мӹнь цилӓ нӓлӹнӓм, цилӓжӓт утымеш улы. Тӓмдӓн колтымыдам Епафродит гӹц нӓлӹнӓмӓт, мӹньӹн цилӓ шукы. Мам тӓ пуэндӓ, тидӹ «тотлы пышан подарка», «Йымылан келшӹшӹ, ярышы жертва».

¹⁹ Мӹньӹн Йымемжӹ тӓлӓндӓ ма келмӹм лӹмлештӓрӓлтмӓш доно ӹшке пайдажы семӹнь Христос Иисус гач цилӓ темӹжӹ.

²⁰ Йымылан, мӓмнӓн Ӓтялӓннӓ, курым-курымеш лӹмлештӓрӓлтмӓш лижӹ. Аминь.

²¹ Христос Иисус доно ушнен шалгышы цилӓ святойвлӓлӓн шӓлӓм келесӹдӓ. Мӹнь сагаэм ылшы шӱмбелвлӓ тӓлӓндӓ шӓлӓм колтат.

²² Тӓлӓндӓ цилӓ святой, паснаок кесарьын пӧртӹштӹшӹвлӓ, шӓлӓм колтат.

²³ Иисус Христос Господьнан благодатьшы цилӓдӓ доно лижӹ. Аминь.