СВЯТОЙ АПОСТОЛ ПАВЕЛӸН ФИЛИППӸШТӸ ӸЛӸШӸВЛӒЛӒН КОЛТЫМЫ СИРМӒШӸЖӸ 3 - У Согонь

3 ГЛАВА 1 Христослан ӹнянӹмӓш гач тӧрӹш лӓкмӓш. 12 Анзыкы кемӓш.

¹ Тенгежӹ, шӱмбелвлӓэм, Господь доно ушнымашты ӹвӹртӹдӓ. Тидӹмок угӹц тӓлӓндӓ сирӹмем мӹньӹм ак ясыландары, а тӓлӓндӓ пайда лиэш.

² Пивлӓ гӹц, худа пӓшӓзӹвлӓ гӹц перегӓлтдӓ, пӹчкедӹшӹвлӓ гӹц перегӓлтдӓ.

³ Мӓ, шӱлӹш доно Йымылан служышы, Христос Иисус доно когоэшнӹшӹ дӓ кӓплӓн ӹштӹмӹ овуцалан агыл ӹнянӹмӓшӹм пиштӹшӹвлӓ, лачокат пӹчмӹ ылына.

⁴ Хоть мӹнь ӹшкежӹ кӓплӓнӓт уанымашым пиштен кердӓм ыльы. Иктӓжӹ кӓплӓн ӹнянӹмӓшӹм пиштӓш шана гӹнь, тидӹлӓн мӹньӹн вир утларак улы:

⁵ шачмыкем, мӹлӓнем кӓндӓкшӹмшӹ кечӹн пӹчмӹ овуцам ӹштенӹт, Израиль халыкын Вениамин роды-йых гӹц, еврей халык гӹц шачшы еврей ылам, а закон шотышты фарисей линӓм,

⁶ ӹшке пӓшӓэм докы тенге шӱмӓнгӹнӓм – Йымын Церкӹм поктылшы линӓм, законым колыштмы доно тӧр ӹштӹмӹ шотышты – йӓтлӓш лидӹмӹ эдем.

⁷ Но ма мӹлӓнем сӹнгӹмӓш лин, тидӹм Христос гишӓн ямдымеш шотлем.

^8-9 Тенге, мӹнь цилӓок ямдымеш шотлем, вет Христос Иисусым, мӹньӹн Господьым, пӓлӹмӓш мӹлӓнем цилӓ гӹцӓт утларак яжо. Тӹдӹ гишӓн мӹнь цилӓ шуэн колтенӓм. Христосым ӹшкӹлӓнем моаш дӓ Тӹдӹн доно цицмӓш ушнаш манын, мӹнь цилӓок кыныжеш шотлем. Тенге мӹнь ӹшке сылен нӓлмем доно агыл, законым колыштмы доно агыл, а Христослан ӹнянӹмӹ доно тӧр ӹштӹшеш лӓктӓм. Тенге тӧреш лӓкмӓш ӹнянӹмӓш верц Йымы гӹц лиэш.

¹⁰ Мӹнь Христосым дӓ Тӹдӹн ӹлӹжмӹжӹн силажым пӓлӹнем, Тӹдӹн ясыланымашкыжы ушнынем дӓ, Тӹдӹ семӹнь колен, Тӹдӹ гань линем.

¹¹ Тенге, ӓнят, мӹнят колымаш гӹц ӹлӹжтӹмӹ лиӓм.

¹² Мӹнь кышкы кешӓшлык ылам, тӹшкӹ шонам ӓль цицмӓшӹш толынам манын ам попы, но, кыце Христос Иисус мӹньӹм нӓлӹн, тенгеок, вычымым нӓлӓш цацен, силам пиштен, анзыкы кеем.

¹³ Шӱмбелвлӓ, мӹнь кышкы кешӓшлык ылам, тӹшкӹ эче шонам манын ам шотлы гӹнят, иктӹм ӹштем: шайылан кодшым цилӓ монден, анзыкы улы сила доно кеем.

¹⁴ Мӹнь тӹшкӹ шонем, кышты Христос Иисус доно ушнен шалгымашты Йымын пӹлгомыштышы ӱжмӹжӹ гач пушашлык сӹнгӹмӓш подарка мӹньӹм выча.

¹⁵ Тенгежӹ мӓ логӹцнӓ ӹнянӹмӓштӹ кушкын шошывлӓ тенге шанышашлык ылыт, а тӓ иктӓ-ма гишӓн вес семӹнь шанедӓ гӹнь, тидӹмӓт Йымы тӓлӓндӓ анжыкта.

¹⁶ Но махань кӱкшӹцӹш мӓ шонна, мӓ тенгеок шанышашлык дӓ тӹ правило семӹньок ӹлӹшӓшлык ылына.

¹⁷ Шӱмбелвлӓ, мӹнь семӹнем ӹштӹдӓ, мӓмнӓн тӓлӓндӓ анжыктымы корны доно каштшывлӓ вӹкӹ анжыда.

¹⁸ Мӹнь тидӹ гишӓн тӓлӓндӓ шӹрен попенӓм, дӓ ӹнде сӹнзӓвӹд яре келесем: шукынжы Христосын крестӹжӹн тышманжы семӹнь ӹлӓт.

¹⁹ Нӹнӹн мычашышты – пӹтӹмӓш, нӹнӹн йымышты – мӹшкӹр, а лӹмнерӹштӹ – намысан кайыш. Нӹнӹ мӱлӓндӹ вӹлнӹшӹ гишӓн шанат.

²⁰ Но мӓмнӓн сӓндӓлӹкнӓ пӹлгомышты, тӹшецӹн мӓ Ытарышым, мӓмнӓн Господь Иисус Христосым, выченӓ.

²¹ Кид лӹвӓкӹжӹ цилӓ нӓлӓш Тӹдӹн силажы улы, ти сила доно Тӹдӹ мӓмнӓн лышкыды кӓпнӓм Ӹшкӹмжӹн лӹмлештӓрӓлтшӹ кӓпшӹ ганьыш сӓртен вашталта.