СВЯТОЙ АПОСТОЛ ПАВЕЛӸН ФИЛИППӸШТӸ ӸЛӸШӸВЛӒЛӒН КОЛТЫМЫ СИРМӒШӸЖӸ 1 - У Согонь

1 ГЛАВА 1 Вӓшлимӹ шамаквлӓ. 3 Филиппӹштӹ ылшы церкӹ верц Йымылан таум ӹштен ыдылмаш. 12 Ӹлӹмӓш – Христос, а колымаш – сӹнгӹмӓш.

¹ Иисус Христосын Павел дон Тимофей цоравлӓжӹ гӹц Христос Иисус доно ушнен шалгышы, Филиппӹштӹ ылшы цилӓ святойлан, тенгеок епископ дон диаконвлӓлӓн.

² Мӓмнӓн Йымы Ӓтянӓ гӹц дӓ Иисус Христос Господь гӹц тӓлӓндӓ благодать дӓ тыр лижӹ.

³ Хоть-кынамат тӓмдӓм ӓшӹндӓрӹмем годым Йымемлӓн таум келесем.

⁴ Цилӓдӓ верц Йымым сарвалымем годым соок ӹвӹртен ыдылам,

⁵ вет тӓ пӹтӓришӹ кечӹ гӹцок тагачы яктеӓт Пуры Уверӹм шӓрӓш палшедӓ.

⁶ Мӹнь ӹнянем: кӧргӹштӹдӓ пуры пӓшӓм тӹнгӓлшӹ Йымы тӹдӹм Иисус Христосын кечӹжӹ якте мычашыш шокта.

⁷ Цилӓдӓ гишӓн мӹньӹн тенге шанымем тӧр. Тӓ йӓнгӹштем ылыда. Питӹрӹмӓштӹ лиӓм ӓль Пуры Уверӹм защищӓен попем дӓ тӹдӹ верц ӹняндӓрен шайыштам, цилӓн мӹнь донем иквӓреш Йымын благодатьыштыжы ылыда.

⁸ Мӹнь тӓмдӓм Иисус Христосын яратымашыжы доно яратем, тидӹлӓн Йымы свидетель ылеш.

⁹ Тӓмдӓн яратымашда пӓлӹмӓш дӓ шижӹн-ынгылен мыштымаш доно соок утларак шукемжӹ манын, мӹнь ыдылам.

¹⁰ Тӹнӓм ма сек яжо ылмым терген кердӹдӓ, тӓ Христосын кечӹнжӹ ире, самыньдымы лидӓ

¹¹ дӓ Иисус Христосын шачыктымы тӧр ӹштӹмӓш кӹцкӹ доно циц темӹдӓ, тидӹжӹ Йымылан хвальымашым дӓ лӹмлештӓрӹмӓшӹм канда.

¹² Шӱмбелвлӓ, пӓлӹдӓ манын шанем: ма мӹнь донем лин гӹнь, Пуры Уверлӓн утларак пайдам канден.

¹³ Ӹнде преториштӹшӹ улы халыклан, тенгеок цилӓ молыланат пӓлӹмӹ лин: мӹнь питӹрӹмӓштӹ Христос верц ылам.

¹⁴ Господь доно ушнышы шӱмбелвлӓ логӹц шукыракшы мӹньӹн питӹрӹмӓштӹ шӹнзӹмем гишӓн пингӹдемӹнӹт, Йымын шамакым эчеӓт патырын дӓ лӱддеок шайышташ тӹнгӓлӹнӹт.

¹⁵ Лачок, иктӹвлӓ йӓлӹнлӓн йӓнг йылымышты дӓ кӹрмӓшӓш яратымышты доно Христос гишӓн увертӓрӓт, а весӹвлӓжӹ тидӹм пуры шанымаш доно ӹштӓт:

¹⁶ иктӹвлӓжӹ ире агыл йӓнг доно, ӹшкӹлӓн пайдам кӹчӓлӹн, Христос гишӓн увертӓрӓт, тидӹн доно мӹлӓнем питӹрен шӹнзӹмӓштӹ орлыкым шукемдӹнештӹ,

¹⁷ а весӹвлӓжӹ, мӹньӹм Пуры Уверӹм перегӓш шагалтымым пӓлӓтӓт, яратымаш гишӓн ӹштӓт.

¹⁸ Ну и ма? Христос гишӓн хоть-кыце увертӓрӹштӹ, яжола каяш цацен ӓль йӓнг вашт, тидӹлӓн мӹнь ӹвӹртем веле. Анзыкыжымат ӹвӹртӓш тӹнгӓлӓм,

¹⁹ вет мӹнь пӓлем: тӓмдӓн ыдылмыда дӓ Иисус Христосын Шӱлӹшӹжӹн палшымы гишӓн тидӹ цилӓжӓт мӹлӓнем ытарымашкы сӓрнӓлтеш.

²⁰ Мӹнь пишок вычем дӓ ӹнянем: мӹлӓнем нима шотыштат намысланаш ак вӓрешт, но лӱддӹмӹ лиӓм, дӓ хоть ӹлӹмӓш, хоть колымаш лижӹ, Христос мӹньӹн кӓпем гач кӹзӹт молнамшы семӹньок лӹмлештӓрӓлтеш.

²¹ Ӹлӹмӓш мӹлӓнем – Христос, а колымаш – сӹнгӹмӓш.

²² Кӓпӹштӹ ӹлӹмӓш мӹньӹн пӓшӓэм гач кӹцкӹм канда гӹнь, мам айырен нӓлшӓш, мӹнь ам пӓлӹ.

²³ Мӹньӹм тидӹжӓт, тӹдӹжӓт шыпшеш: мӹнь ти ӹлӹмӓш гӹц кенем дӓ Христос доны линем, тидӹжӹ шукы пачаш яжорак,

²⁴ но тӓ верцдӓ кӓпӹштӹ ӹлӓш кодаш керӓлрӓк.

^25-26 Мӹнь тидӹлӓн ӹнянем, седӹндон пӓлем: тӓ ӹнянӹмӓштӹ анзылтымашкы шода дӓ ӹвӹртӹдӓ манын, мӹнь тишӓк кодам дӓ, тӓ докыда угӹц толмыкем, мӹнь гишӓнем сусуда Иисус Христос доно ушнен шалгымашты шукемжӹ манын, цилӓдӓ доно иквӓреш ылам.

²⁷ Анжыда, Христосын Пуры Увержӹлӓн яралын ӹлӹдӓ. Мӹнь тӓмдӓм ужаш толам ӓль агым, тӓ ик шӱлӹш доно икышын ылыда дӓ Евангелиэш негӹцлӓлтшӹ ӹнянӹмӓш верц пингӹдӹн шалгедӓ манын колнем.

²⁸ Ваштареш шалгышывлӓ гӹц тӓ нима шотыштат лӱдшӓшлык ада ыл. Тидӹжӹ нӹнӹлӓн колымашын пӓлӹжӹ ылеш, а тӓлӓндӓ – ытарымашын пӓлӹжӹ, тидӹ – Йымы гӹц.

²⁹ Вет Христослан ӹнянӓш веле агыл, Тӹдӹн верц парвалашат тӓлӓндӓ цӓш пуалтын.

³⁰ Мӹньӹн кредӓлмӓшем тӓ ужында дӓ эчеӓт кредӓлмем гишӓн тӓ кӹзӹт колыда. Тӓмдӓнӓт ти кредӓлмӓшок.