ฮาดัจ 2 - ซูรัจ ปือมือเลา นะ ตูฮัดรือฆา นะ ลาฆู ปานัย อากัน 1 โอ_ นานะ นะ กู เออ_ ดัฮ เกา ซาโมจ ปือมือเลา นะ กู ปือมุน ปือมือเลา ฮูโกบ นะ กู_ ตาโรฮ เดะ ฮาตี นะ เกา เลอ. 2 กือนา บูวัจ บรี ตือลีงา นะ เกา_ มือนีงัย กะ ลาฆู ปานัย อากัน กือนา จีเฮะ ฮาตี นะ เกา_ มือโซะ ซารี ลาฆู มาโซะ ฮาตี 3 เออ_ ดัฮ เกา นะ บลาโลก ซารี_ ลาฆู นู นะ บูวัจ บรี ตาฮู ดัฮ เกา บือซูระ ซารี_ ลาฆู มาโซะ เดะ ฮาตี เลอ 4 ดัฮ เกา มือโซะ ซารี_ ลาฆู อากัน บือกะ นู เกา ซารี ปีระ เกา เตอ_ ซารี ลาฆู อากัน_ บือกะ ซารี ลูโงะ บารัก บรือฆา_ นู กือนา บูนี ตาโรฮ เตอ 5 อีตู เลอ_ เกา นะ มาโซะ เดะ ฮาตี_ ปาซัน ลาฆู บรีงัจ ตาโกจ_ ตูฮัด บือซัยํ เดะ อาตัซ เกา นะ ดาปัจ ลาฆู นู นะ บือกราลา ตูฮัด เลอ. 6 กรานา ตูฮัด บือซัยํ เดะ อาตัซ_ ญา บรี ลาฆู ปานัย อากัน ลาฆู นู ตาฮู_ ฌางัน ลาฆู มาโซะ เดะ ฮาตี_ ดาตัก มาแรฮ เดะ มูโลจ นะ ญา. 7 ตูฮัด ญา ปือมุน_ ลาฆู ปานัย อากัน ตาโรฮ_ บีดา โกะ ซือมียา นู บาฌิ ตือปัจ. ตูฮัด เตอ เลอ_ นู ฌาดี ตือปัจ ซาฆัก_ นะ โกะ ซือมียา นู ตูโรจ กะ ลาฆู รือมัก เลอ. 8 ญา เตอ_ นู ฌาฆา ฌาลัด นู รือมัก ซูโงฮ ฮัจลีฮัจ ฌาลัด_ นะ ลูมอฮ ซือมียา ฮาตี รือมัก นะ ญา เลอ. 9 กะฆีเตอ_ เกา นะ มาโซะ ฮาตี_ เดะ ลาฆู บาฌิ ตือปัจ_ ฌางัน ลาฆู นู รือมัก ซูโงฮ ฌาดี ฌาลัด นู รือมัก_ ตือดะ รอจ กะ ปือญูดัฮ 10 กรานา ลาฆู ปานัย อากัน_ ญา นะ มาโซะ เดะ ดาลับ ฮาตี นะ เกา นู เกา ตาฮู ดัฮ_ นะ บูวัจ บรี เกา_ บราซา ซือนัง เดะ ฮาตี เลอ. 11 ลาฆู ปานัย บือกีรา_ นะ ตูงู ฌาฆา เกา ลาฆู มาโซะ เดะ ฮาตี_ นะ ฌาฆา ฮัจลีฮัจ เกา ดัฮ. 12 บีดา นะ ตูโลก บรี เกา ลือปัซ_ เดะ ฌาลัด นะ ซือมียา ฌาฮัจ ลือปัซ เดะ ซือมียา_ นู มือเลา ฆือลี ฆือละ 13 ซือมียา นู ตีงัน ฌาลัด บาฌิ ตือปัจ บีดา นะ ตูโรจ ปี บือฌาลัด_ เดะ ฌาลัด นู กือลับ 14 ซือมียา นู ปือนอฮ เดะ ฮาตี_ ปาซัน ลาฆู ฌาฮัจ นู ซูกา ฮาตี_ เดะ ลาฆู ฆือลี ฆือละ อีตู เลอ 15 ฌาดี ซือมียา นู อาดา ฌาลัด นู ปีเกาะ ฌาลัด นะ กูญา_ ฮอย เตด รือมัก เลอ. 16 ลาฆู ปานัย อากัน_ นะ ตูโลก บรี เกา ลือปัซ_ เดะ นีบีนี ฌาลัก ลือปัซ เดะ นีบีนี นู ฮอย เตด ตือตู รูมัฮ_ อาดา ลาฆู มือเลา มือนีปู เลอ. 17 ฌาดี ซือมียา นู ตีงัน ลากี นะ ญา_ นู ญา บือเลฮ วะตู มูดา ลาฆี ลูปา ปือมือเลา บือฌาญี บือตือตู นะ ญา_ ฌางัน ตูฮัด. 18 ซาเบะ รูมัฮ นะ นีบีนี อีตู_ บาวา ปือตูโรด ปี กะ ลาฆู มาตี ฌาลัด นะ นีบีนี อีตู เตอ_ ปี กะ ลูมอฮ ฮาตู เลอ. 19 ซือมียา นู ปี ซารี นีบีนี อีตู_ ฮอย ซาปา บือเลฮ ปาเระ บาลิ_ ซา อูรัก โปด เฆอ จะ_ ฮอย ซาปา อาเลฮ มาโซะ_ กะ ฌาลัด นู บูวัจ บรี ฮีโดะ บือเลฮ ดัฮ. 20 กะฆีเตอ_ เกา กือนา ตูโรจ ปี_ กะ ฌาลัด นะ ซือมียา บาฌิ ฌาฆา บรี ตูโรจ_ กะ ฌาลัด นะ ซือมียา นู บาฌิ ตือปัจ เลอ. 21 ซาเบะ จะ_ ซือมียา บาฌิ ตือปัจ_ นะ บือเลฮ ดูโดะ เดะ นังฆรี โกะ ซือมียา รือมัก_ อาดา ดูโดะ เดะ ตือปัจ อีตู เลอ. 22 ตาปี ซือมียา ฌาฮัจ_ กือนา นะ กีปัซ ปี_ บรี ฌาโวฮ เดะ บือนูวา ตานัฮ ซือมียา นู บูวัจ กือบลากัก_ นะ กือนา โปรฮ ปี ฮาบิฮ เลอ. |