ปือมือเลา มือญาเระ ดูลู
วะตู เปาโล บารู ปี กะ โซะ ยูโรบ_ ญา ปี กะ นังฆรี ฟีลิบปี ฌาดี ตือปัจ ลามูลา_ เดะ โซะ นังฆรี มาซิโดเนีย. (บาจา เลอ_ เดะ ซูรัจ ปือบูวัจ 16.9-15.) อาดา ซือมียา ซือตืองัฮ ปือจายา ดัฮ_ ญา ตืองะ ตือปัจ บือมุน ลูมอฮ นะ ตูฮัด_ ตือปัจ อีตู.
กาลา อีนี_ ซือปูโลฮ ตาโฮด ลือเบฮ ลือปัซ ดัฮ_ เปาโล ญา อาดา เดะ ราตัย_ เดะ นังฆรี โรม_ บรี ซีซา นู ฌาดี ราฌา บือซัยํ_ นะ กรัจ ฮูโกบ ญา_ กรานา ลาฆู นะ เยซู. โซะ อีตู_ อาดา ลูมอฮ ซือมียา ซือตืองัฮ_ นู บือลาวัด ฌางัน เปาโล. อาดา ฌูฆา_ ซือมียา ปือจายา ซือตืองัฮ_ นู ดือกี กะ เปาโล_ บือลาวัด ฌางัน ญา. ตาปี เปาโล ซูกา ฮาตี ซือลาลู_ บรี ซือลามัจ กะ ตูฮัด. ญา ซือลาลู บือฮีมัจ เดะ ฮาตี_ บรี ลีฮัจ จะ_ เยซู ฌาดี ตูฮัด นะ ญา เลอ.
กาลา ลูมอฮ นะ ตูฮัด_ เดะ นังฆรี ฟีลิบปี_ ดืองัยํ ดัฮ_ นู เปาโล อาดา ดูโดะ เดะ ราตัย_ บารู กูญา ซูโรฮ ซือมียา ซืออูรัก_ ปือนามา เอปาโฟรดิทัด_ ปี ซารี เปาโล_ ฮาฆิ ดูเวะ นะ กูญา_ บรี ฌาดี บลาญา นะ เปาโล.
เปาโล ฆาแรฮ ซูรัจ ฟีลิบปี อีนี_ นะ บรี ซือลามัจ กะ กูญา. ญา ปรีงัจ กะ กูญา_ บรี อาดา ฮาตี บรานี_ บรี มือนูโนะ ฮาตี กะ ตูฮัด_ บรี บือซามา ฮาตี ฌางัน ลูมอฮ ซือมียา ปือจายา_ บรี ซูกา ฮาตี_ ลือกัจ บือซามา ฌางัน ตูฮัด เยซู ซือลาลู. ญา ปรีงัจ กะ กูญา_ บรี ซือมาตา ตูโรจ กะ ตูฮัด_ อีงัจ จะ_ เตด ลามา_ อาดา อารี นะ ตูฮัด_ นู เยซู นะ ปาเระ มาแรฮ ปูลัก. บรี กูญา ฮอย ซาลัฮ เดะ อารี อีตู เลอ.
เดะ ดาลับ ซูรัจ ฟีลิบปี อีนี_ นะ ดาปัจ ลาฆู กะฆีนี
1. ลาฆู ลามูลา (1.1-11)
2. ปาซัน นะ เปาโล ตะอาซิก (1.12-26)
3. นะ บูวัจ ตูโรจ กะ เยซู กะฮามี (1.27—2.18)
4. ปาซัน ทิโมที ฌางัน เอปาโฟรดิทัด (2.19-30)
5. ลาฆู ปรีงัจ ปาซัน โกะ ซือตรู (3.1—4.9)
6. ปาซัน เปาโล ฌางัน ลูมอฮ ฟีลิบปี (4.10-20)
7. ลาฆู ปือญูดัฮ (4.21-23)
บาจา เลอ เดะ ซูรัจ ปือมือเลา นะ ตูฮัด
