กีรา 3 - ซูรัจ ปือมือเลา นะ ตูฮัดโกะ นานะ นะ อาโรน ( เลวี 10.1-7 ) 1 ตะเดะ อีนี ฌาดี บือแนฮ บักซา นะ อาโรน ฌางัน มูซา_ กาลา ตูฮัด บือซัยํ เดะ อาตัซ มือเลา ฌางัน มูซา_ เดะ อาตัซ บูเกะ ซีนัย. 2 นานะ นะ อาโรน_ อาดา นาดับ_ นู ฌาดี นานะ ซูโลก_ อาบีฮู_ เอเลอาซา_ ฌางัน อีทามา. 3 อีนี เลอ_ ฌาดี นานะ นะ อาโรน_ นู กือนา ลือมัยํ มีญะ ดัฮ_ ฌาดี ซามี_ ฌาดี ซือมียา นู กือนา อาเกะ ตืองะ_ บรี ฌาดี ซามี. 4 ตาปี นาดับ ฌางัน อาบีฮู_ มาตี โซะ ฮือลด มูคา นะ ตูฮัด บือซัยํ เดะ อาตัซ_ กาลา กูญา อาเมด อาปี นู กือนา บลารัก_ อาเกะ มือญือมัฮ กะ ตูฮัด_ เดะ ตือปัจ ตานัฮ ตูโฮยํ นู ลือฆา นะ ซีนัย. ซิกมาซิก ฮอย โกะ นานะ. กะฆีเตอ เอเลอาซา_ ฌางัน อีทามา กูญา บือเลฮ บือกรือฌา ฌาดี ซามี_ นู อาดา อาโรน_ ปะ เดะ กูญา_ ฮัจลีฮัจ. ลาฆู บือกรือฌา นะ ลูมอฮ เลวี 5 ตูฮัด บือซัยํ เดะ อาตัซ_ มือเลา ฌางัน มูซา_ จะ_ 6 “กือนา บาวา ปาลัฮ ลูมอฮ เลวี_ มาโซะ มาแรฮ ดาปิก_ ตืองะ กูญา โซะ ฮือลด มูคา นะ อาโรน_ นู ฌาดี ซามี_ บรี กูญา บือกรือฌา กะ อาโรน. 7 กูญา นะ บือกรือฌา ฆาตี อาโรน_ ฆาตี โกะ ลูมอฮ ซือมียา ซือมูฮา_ ฮือลด รูมัฮ ซาเราะ บือฌาญี บือดาปัจ_ กาลา กูญา บือกรือฌา เดะ รูมัฮ มือญือมัฮ. 8 กูญา นะ ฮัจลีฮัจ_ โกะ ซือบารัก นู นะ ซูโรฮ เดะ รูมัฮ ซาเราะ บือฌาญี บือดาปัจ_ บือกรือฌา ฆาตี โกะ ลูมอฮ อิซราเอน_ กาลา นู กูญา บือกรือฌา เดะ รูมัฮ มือญือมัฮ. 9 กือนา ซรัฮ ลูมอฮ เลวี_ บรี กะ อาโรน ฌางัน โกะ นานะ นะ ญา. กูญา กือนา ปีเลฮ_ ดาตัก เดะ ลูมอฮ อิซราเอน_ ซรัฮ บรี กะ อาโรน ดัฮ. 10 เกา กือนา ตืองะ อาโรน_ ฌางัน โกะ นานะ กีลากี นะ ญา_ บรี บือกรือฌา ฌาดี ซามี. ตาปี ซือมียา วัยํลูวัยํ นู มาแรฮ ดาปิก_ นะ ฆาโดฮ กือนา ลาฆู กรัจ ฮูโกบ_ รอจ กะ มาตี.” 11 ตูฮัด บือซัยํ เดะ อาตัซ_ มือเลา ฌางัน มูซา_ จะ_ 12 “ลีฮัจ เลอ_ กู บือเลฮ ปีเลฮ ลูมอฮ เลวี_ เดะ ลูมอฮ อิซราเอน_ ฆาตี นานะ ซูโลก_ เดะ ซามา ตืองัฮ ลูมอฮ อิซราเอน_ นู ฌาดี ซือมียา ลามูลา_ ดูโดะ เดะ อาปี_ ดาตัก เดะ โปรจ นะ มะ เดะ ญา. ลูมอฮ เลวี ฌาดี นะ กู เลอ 13 ซาเบะ โกะ นานะ ซูโลก ซือมูฮา ฌาดี นะ กู. เดะ อารี นู กู บือเลฮ บูนอฮ นานะ ซูโลก ซือมูฮา_ เดะ นังฆรี อียิบ_ กู บือเลฮ ปีเลฮ โกะ นานะ ซูโลก เดะ อิซราเอน_ เตด จะ_ อูมัจ ซือมียา_ เฆอ จะ_ บือนาตัก_ บรี ฌาดี นะ กู. ซือมูฮา อีนี_ ฆาโดฮ ฌาดี นะ กู. กู นี เลอ_ ฌาดี ตูฮัด บือซัยํ เดะ อาตัซ.” ลาฆู กีรา ลูมอฮ เลวี 14 ตูฮัด บือซัยํ เดะ อาตัซ_ มือเลา ฌางัน มูซา_ เดะ ตือปัจ ตานัฮ ตูโฮยํ นู ลือฆา นะ ซีนัย_ จะ_ 15 “กือนา กีรา ปาลัฮ เลวี_ ตูโรจ กะ บือแนฮ_ ตูโรจ กะ ซือมียา ซือรูมัฮ_ ฌาดี จะ_ ฆาโดฮ กีรา กีลากี ราตา อูรัก_ นู อาดา อูมอยํ ตะเดะ ซา บูลัด_ ญาแญะ ปี.” 16 กะฆีเตอ มูซา_ ญา กีรา กูญา ดัฮ_ ตูโรจ กะ ปือมือเลา นะ ตูฮัด บือซัยํ เดะ อาตัซ_ บือกะ นู ญา บือเลฮ ปือซัด ดัฮ. 17 ตะเดะ อีนี_ ฌาดี ปือนามา นานะ กีลากี นะ เลวี_ อาดา เกอโชน_ โคฮาด_ ฌางัน เมรารี. 18 ปือนามา นานะ นะ เกอโชน_ ตูโรจ กะ ซือมียา ซือรูมัฮ_ อาดา ลิบนี ฌางัน ชิเมอี. 19 นานะ นะ โคฮาด_ ตูโรจ กะ ซือมียา ซือรูมัฮ_ อาดา อัมราม_ อิดซะฮา_ เฮโบรน_ ฌางัน อูซีเอน. 20 นานะ นะ เมรารี_ ตูโรจ กะ ซือมียา ซือรูมัฮ_ อาดา มาลี ฌางัน มูชี. นี เลอ_ ฌาดี โกะ ซือมียา ซือรูมัฮ นะ เลวี_ ตูโรจ กะ บือแนฮ นะ กูญา. 21 ลูมอฮ บักซา นะ เกอโชน_ อาดา บือแนฮ ลิบนี_ ฌางัน บือแนฮ ชิเมอี. ซือมูฮา อีนี_ ฌาดี บักซา นะ เกอโชน. 22 โกะ ซือมียา ซือมูฮา อาดา กือมูฮา_ นู อาดา อูมอยํ ตะเดะ ซา บูลัด ญาแญะ ปี_ ฌาดี ตูโฌฮ รีบู ลีมา ราตุซ (7,500) อูรัก. 23 ลูมอฮ บักซา เกอโชน เตอ_ นะ ฆาโดฮ ตืองะ รูมัฮ ซาเราะ บราดู บือปรัก_ โซะ บลากัก รูมัฮ มือญือมัฮ_ โซะ บารัจ. 24 อาดา เอลียาซับ_ นานะ นะ ลาเอน_ ฌาดี กือปาลา ลูมอฮ บักซา เกอโชน. 25 ลาฆู บือกรือฌา นะ ลูมอฮ บักซา เกอโชน_ บือกรือฌา เดะ รูมัฮ ซาเราะ บือฌาญี บือดาปัจ_ อาดา บือกรือฌา เดะ รูมัฮ มือญือมัฮ_ รูมัฮ กาฌัก มารือมา ฌางัน ซือบารัก ซรือโกะ รูมัฮ กาฌัก_ ฌางัน ดีนิง กาเยด เดะ ปีตู รูมัฮ ซาเราะ บือฌาญี บือดาปัจ_ 26 ดีนิง กือตัก ลามัน_ ฌางัน ดีนิง ปีตู ลามัน_ นู อาดา กือลีลิก รูมัฮ มือญือมัฮ_ ฌางัน ตือปัจ มือญือมัฮ_ ฆือนะ ฌางัน โกะ ตาลี รือโกฮ_ ฌางัน ลาฆู บือกรือฌา ซือมูฮา_ เดะ ปาซัน โกะ ซือบารัก อีนี. 27 ลูมอฮ บักซา โคฮาด_ อาดา บือแนฮ อัมราม_ บือแนฮ อิดซะฮา_ บือแนฮ เฮโบรน_ ฌางัน บือแนฮ อูซีเอน. ซือมูฮา อีนี ฌาดี ลูมอฮ บักซา โคฮาด. 28 กีรา โกะ กีลากี ซือมูฮา_ นู อาดา อูมอยํ ตะเดะ ซา บูลัด ญาแญะ ปี_ ฌาดี ลาปัด รีบู นัม ราตุซ (8,600) อูรัก_ นู ฌาดี ซือมียา บือกรือฌา เดะ รูมัฮ มือญือมัฮ ตูฮัด. 29 โกะ บือแนฮ นานะ นะ โคฮาด_ นะ ตืองะ รูมัฮ ซาเราะ บราดู บือปรัก_ โซะ บารัจ ดายา นะ รูมัฮ มือญือมัฮ. 30 อาดา เอลีซาฟัน_ นานะ นะ อูซีเอน_ ฌาดี กือปาลา นะ ลูมอฮ บักซา โคฮาด. 31 โกะ ซือมียา อีนี_ กูญา อาดา ฮัจลีฮัจ ปือตี ปือมือเลา บือฌาญี นะ ตูฮัด_ ปาปัด โตะ_ ตือปัจ ตืองะ ปลีตา_ ตือปัจ มือญือมัฮ ซือมูฮา_ ฌางัน โกะ ปีโยะ บลางา นะ ซูโรฮ เดะ ตือปัจ มือญือมัฮ_ นู โกะ ซามี ซูโรฮ บือกรือฌา. อาดา ฌูฆา ดีนิง กาเยด_ ฌางัน ลาฆู บือกรือฌา ราตา ฌือแนฮ_ เดะ ปาซัน โกะ ซือบารัก อีนี. 32 เอเลอาซา_ นานะ นะ อาโรน_ นู ฌาดี ซามี_ ญา ฌาดี กือปาลา บือซัยํ_ ลือเบฮ เดะ กือปาลา นะ ลูมอฮ เลวี_ มือญาซัจ ลีฮัจ โกะ ซือมียา บือกรือฌา_ เดะ รูมัฮ มือญือมัฮ. 33 ลูมอฮ บักซา เมรารี_ อาดา บือแนฮ มาลี_ ฌางัน บือแนฮ นะ มูชี. ซือมูฮา อีนี ฌาดี ลูมอฮ บักซา เมรารี. 34 โกะ ซือมียา ซือมูฮา_ ฌาดี โกะ กีลากี กือมูฮา_ นู อาดา อูมอยํ ตะเดะ ซา บูลัด ญาแญะ ปี_ ฌาดี นัม รีบู ดูวา ราตุซ (6,200) อูรัก. 35 อาดา ซูรีเอน_ นานะ นะ อาบีฮาอิน_ ฌาดี กือปาลา นะ ลูมอฮ บักซา เมรารี. กูญา อีนี_ ตืองะ รูมัฮ ซาเราะ บราดู บือปรัก_ โซะ ตารา นะ รูมัฮ มือญือมัฮ. 36 ลาฆู บือกรือฌา นู บรี กะ ลูมอฮ บักซา เมรารี_ ฌาดี ลาฆู บือกรือฌา ฮัจลีฮัจ กายู ชะ รูมัฮ มือญือมัฮ_ กายู ปืองาจิก_ จาวัก_ ตือปัจ มือนาฮัด_ ฌางัน โกะ บารัก นู นะ ปรือกะ โกะ ซือบารัก อีนี ซือมูฮา_ ฌางัน ลาฆู บือกรือฌา ราตา ฌือแนฮ_ เดะ ปาซัน โกะ ซือบารัก อีนี. 37 อาดา ฌูฆา จาวัก กือลีลิก ลามัน_ อาดา ฆือนะ ฌางัน ตือปัจ มือนาฮัด_ บาตู ปืออูโกยํ_ ฌางัน ตาลี รือตัก. 38 โซะ ซือมียา นู นะ ตืองะ รูมัฮ ซาเราะ บราดู บือปรัก_ โซะ ฮือลด รูมัฮ มือญือมัฮ_ โซะ ตีมอยํ นะ รูมัฮ ซาเราะ บือฌาญี บือดาปัจ_ โซะ มาตา อารี ญาแญะ_ อาดา มูซา ฌางัน อาโรน_ ฌางัน โกะ อานะ จูจู นะ ญา_ นาตี ฮัจลีฮัจ ลาฆู บือกรือฌา เดะ อีซี รูมัฮ มือญือมัฮ_ ฌางัน โกะ ลาฆู บือกรือฌา นู บือฆูนา นะ บูวัจ_ บีดา ลูมอฮ อิซราเอน. ลูมอฮ อาซิก_ นู มาโซะ มาแรฮ ดาปิก_ นะ กือนา กรัจ ฮูโกบ_ รอจ กะ ลาฆู มาตี. 39 กีรา โกะ ซือมียา_ นู มาโซะ ฌางัน ลูมอฮ เลวี_ นู มูซา ฌางัน อาโรน กูญา กีรา_ ตูโรจ กะ ปือมือซัด นะ ตูฮัด บือซัยํ เดะ อาตัซ_ ฌาดี โกะ กีลากี_ ตูโรจ กะ ซือมียา เดะ รูมัฮ นะ กูญา_ นู อาดา ตะเดะ อูมอยํ ซา บูลัด ญาแญะ ปี_ ฌาดี ดูวา ละซา ดูวา รีบู (22,000) อูรัก. ลาฆู ตือบุซ นานะ ซูโลก 40 ตูฮัด บือซัยํ เดะ อาตัซ_ มือเลา ฌางัน มูซา_ จะ_ “กือนา กีรา นานะ ซูโลก ซือมูฮา_ นะ อิซราเอน_ นู อาดา อูมอยํ ตะเดะ ซา บูลัด ญาแญะ ปี. กือนา บรีงัจ ตูโรจ กะ ปือนามา นะ กูญา. 41 กือนา ซือกัจ ลูมอฮ เลวี ตาโรฮ_ บรี กะ กู. กู นี เลอ_ ฌาดี ตูฮัด บือซัยํ เดะ อาตัซ. อีนี เลอ_ บีดา ฆาตี โกะ นานะ ซูโลก_ เดะ ซามา ตืองัฮ ลูมอฮ อิซราเอน. บรี กะ โกะ บือนาตัก ซือมูฮา นะ ลูมอฮ เลวี_ ฆาตี บือนาตัก ซูโลก ซือมูฮา นะ ลูมอฮ อิซราเอน.” 42 กะฆีเตอ_ มูซา ญา กีรา โกะ นานะ ซูโลก_ เดะ ซามา ตืองัฮ ลูมอฮ อิซราเอน_ ตูโรจ บือกะ นู ตูฮัด บือซัยํ เดะ อาตัซ ญา ปือซัด ดัฮ ฌางัน ญา. 43 โกะ นานะ ซูโลก ซือมูฮา_ นู กีรา ตูโรจ กะ ปือนามา_ นู กีรา บือเลฮ_ อาดา อูมอยํ ตะเดะ ซา บูลัด ญาแญะ ปี_ อาดา ดูวา ละซา ดูวา รีบู ดูวา ราตุซ ตูโฌฮ ปูโลฮ ตีฆา (22,273) อูรัก. 44 ตูฮัด บือซัยํ เดะ อาตัซ_ มือเลา ฌางัน มูซา_ จะ_ 45 “กือนา อาเมด ลูมอฮ เลวี_ ฆาตี นานะ ซูโลก ซือมูฮา_ นะ ลูมอฮ อิซราเอน. อาเมด โกะ บือนาตัก ซือมูฮา นะ ลูมอฮ เลวี_ ฆาตี บือนาตัก นะ ลูมอฮ อิซราเอน. โกะ ลูมอฮ เลวี นะ ฌาดี นะ กู. กู นี เลอ_ ฌาดี ตูฮัด บือซัยํ เดะ อาตัซ. 46 บีดา ฌาดี รือฆา ตือบุซ นานะ ซูโลก นะ ลูมอฮ อิซราเอน_ ดูวา ราตุซ ตูโฌฮ ปูโลฮ ตีฆา (273) อูรัก_ นู ลือเบฮ เดะ โกะ กีลากี ซือมูฮา นะ ลูมอฮ เลวี เตอ_ 47 เกา กือนา มูงอจ ซืออูรัก ลีมา เชเคน_ ตูโรจ กะ เชเคน นะ รูมัฮ มือญือมัฮ. (ซา เชเคน บรัจ บือกะ 12 กรัม.) 48 กะฆีเตอ กือนา บรี ดูเวะ อีตู_ นู ฆาโดฮ ฌาดี รือฆา ตือบุซ นะ ลูมอฮ ซือมียา_ นู ลือเบฮ อีตู_ บรี กะ อาโรน_ ฌางัน อานะ จูจู นะ ญา.” 49 กะฆีเตอ_ มูซา ญา มูงอจ ดูเวะ_ รือฆา ตือบุซ_ เดะ ลูมอฮ ซือมียา อีตู_ นู ลือเบฮ เดะ ลูมอฮ ซือมียา นู โกะ ลูมอฮ เลวี บือเลฮ ตือบุซ ดัฮ_ 50 ฌาดี จะ_ ญา มูงอจ ดูเวะ เดะ โกะ นานะ ซูโลก_ นะ ลูมอฮ อิซราเอน_ ฌาดี ดูเวะ ซือมูฮา ซือรีบู ตีฆา ราตุซ นัม ปูโลฮ ลีมา (1,365) รีเงะ ปีระ_ กีรา ตูโรจ กะ รีเงะ ปีระ นะ รูมัฮ มือญือมัฮ. 51 กะฆีเตอ_ มูซา บือเลฮ บาวา ดูเวะ รือฆา ตือบุซ_ บรี กะ อาโรน ฌางัน โกะ อานะ จูจู นะ ญา_ ตูโรจ กะ ปือมือเลา นะ ตูฮัด นู ตูฮัด บือซัยํ เดะ อาตัซ_ บือเลฮ ปือซัด ดัฮ ฌางัน มูซา. |