มาลาคี 2 - ซูรัจ ปือมือเลา นะ ตูฮัด

¹ “โอ_ ลูมอฮ ซามี_ กะฆีเตอ ปูลัก_ ปือมือซัด อีนี อาดา บีดา กาเญา ดัฮ.

² ตูฮัด บือซัยํ เดะ อาตัซ_ ตูฮัด นู มือฆัฮ_ ญา มือเลา จะ_ ดัฮ กาเญา เตด มือนีงัย_ เตด จับ ตาโรฮ เดะ ฮาตี_ นู นะ อาเกะ ฌูโญก ปือนามา นะ กู_ กู นะ บรี ปือมือเลา ซูปัฮ อาโบยํ อาดา เดะ กาเญา_ นะ ซูปัฮ อาโบยํ กะ ลาฆู บรี ซือลามัจ นู กาเญา ซาโมจ ดัฮ. โงฮซูโงฮ กู บือเลฮ ซูปัฮ อาโบยํ ลาฆู บรี ซือลามัจ อีตู ดัฮ_ กรานา กาเญา เตด จับ ตาโรฮ เดะ ฮาตี เลอ.

³ ลีฮัจ เลอ_ กู นะ อูจะ โกะ อานะ จูจู นะ กาเญา_ นะ ซาปัก ตาฮี บือนาตัก บอฮ เดะ มูคา นะ กาเญา_ ฌาดี ตาฮี บือนาตัก มือญือมัฮ นะ กาเญา. กูญา นะ บาวา กาเญา ปี กะ ลูโงะ ตาฮี บือนาตัก.

⁴ ตูฮัด บือซัยํ เดะ อาตัซ_ ตูฮัด นู มือฆัฮ_ ญา มือเลา จะ_ กาเญา นะ ตาฮู จะ_ กู ซูโรฮ ปือมือซัด อีนี มาแรฮ กะ กาเญา_ บีดา ปือมือเลา บือฌาญี บือตือตู_ นู กู บือเลฮ มือเลา ดัฮ ฌางัน ลูมอฮ เลวี_ นะ อาดา ปี ซือลาลู.

⁵ ปือมือเลา บือฌาญี บือตือตู อีตู_ ฌาดี ปือมือเลา บือฌาญี นู บรี ฮีโดะ_ บรี ดูโดะ ซือนัง ซือลามัจ_ นู กู บือเลฮ บรี กะ กูญา_ บีดา กูญา นะ บือเลฮ บรีงัจ ตาโกจ. กูญา โปด_ บือเลฮ บรีงัจ ตาโกจ เดะ กู_ ตาโกจ เดะ ปือนามา นะ กู เลอ.

⁶ เดะ มูโลจ นะ กูญา_ อาดา ปือมือเลา อาฌัยํ_ นู ฌาดี ลาฆู ซูโงฮ. นะ ซารี ลาฆู ซาลัฮ เดะ มูโลจ นะ กูญา_ ฮอย เตด ดาปัจ ลาลู. กูญา ตูโรจ กะ กู ฌางัน ลาฆู ซือนัง ซือลามัจ_ ลาฆู รือมัก ซูโงฮ. กูญา บือเลฮ ตูโลก ซือมียา บาญะ_ บรี อาเลฮ ลือปัซ เดะ ลาฆู ซาลัฮ บือดูซา.

⁷ ซาเบะ จะ_ มูโลจ นะ ซามี_ บือฆูนา นะ ฌาฆา ลาฆู บรี ตาฮู. อูมัจ ซือมียา บือฆูนา นะ ซารี ปือมือเลา อาฌัยํ_ ดาตัก เดะ มูโลจ นะ ญา_ ซาเบะ จะ_ ญา ฌาดี ซือมียา มือเลา ฆาตี ตูฮัด บือซัยํ เดะ อาตัซ_ ตูฮัด นู มือฆัฮ เลอ.

⁸ ตาปี ลูมอฮ กาเญา ตะอาซิก_ บือเลฮ อาเลฮ ปี เดะ ฌาลัด อีตู_ บูวัจ บรี กะ บาญะ ซือมียา ตือซีปะ_ กรานา ปือมือเลา อาฌัยํ นะ กาเญา. ตูฮัด บือซัยํ เดะ อาตัซ_ ตูฮัด นู มือฆัฮ_ ญา มือเลา จะ_ กาเญา บือเลฮ บูวัจ บรี กะ ปือมือเลา บือฌาญี บือตือตู นะ เลวี เตด ฌาดี นามา ดัฮ.

⁹ กะฆีเตอ_ กู บูวัจ บรี กาเญา กือนา มือฌัฮ_ กือนา อาฆัฮ ฆือละ_ โซะ ฮือลด มูคา นะ ลูมอฮ ซือมียา ซือมูฮา_ ซาเบะ กาเญา เตด บือเลฮ บือฌาลัด ตูโรจ ฌาลัด นะ กู_ ตาปี บือเลฮ บูวัจ ลัฮบือลัฮ เดะ ลาฆู อาฌัยํ นะ กาเญา.”

อิซราเอน บูวัจ บรี ปือมือเลา บือฌาญี บือตือตู เตด ฌาดี นามา ดัฮ

¹⁰ กีตา ราตา อูรัก อาดา อาโปก ซา อีตู_ บูกัด เฆอ? ตูฮัด แนฮ ซา_ ญา บือฌาดี กีตา บูกัด เฆอ? กะฆีเตอ บูวัจ นามา กีตา บูวัจ กือบลากัก กะ กาวัด_ บูวัจ บรี กะ ปือมือเลา บือฌาญี บือตือตู นะ โกะ บีลาแก นะ กีตา_ ตะอารัฮ โตระ?

¹¹ ยูดา โปด_ บูวัจ กือบลากัก. กูญา อาดา บูวัจ ลาฆู ตะอารัฮ เตด บือฆูนา_ เดะ นังฆรี อิซราเอน ฌางัน เดะ นังฆรี เยรูซาเลม. ซาเบะ จะ_ ยูดา บือเลฮ บูวัจ บรี ตือปัจ นู บาฌิ บือซรี นะ ตูฮัด บือซัยํ เดะ อาตัซ_ นู ญา ซายัก_ ฌาดี ตะอารัฮ_ บือเลฮ ปี บือนีกัฮ ฌางัน นานะ นีบีนี นะ โกะ ตูฮัด บักซา อาซิก.

¹² บรี กะ ตูฮัด กรัจ ปือตรือเบะ ซือมียา ดีฮา นู บูวัจ กะฆีนี_ บรี ญา ฮอย ตือปัจ ดูโดะ เดะ โกะ รูมัฮ ซาเราะ นะ ยาโกบ_ ฮอย ซาปา นะ ตีกัฮ_ มีเซ ญา นะ บาวา โกะ ซือบารัก มาแรฮ มือญือมัฮ กะ ตูฮัด บือซัยํ เดะ อาตัซ_ ตูฮัด นู มือฆัฮ เลอ.

¹³ กาเญา บือเลฮ บูวัจ กะฆีนี ปูลัก ฌูฆา_ ฌาดี จะ_ กาเญา อาเมด อาเย มาตา จือลอย ราตา เดะ ตือปัจ มือญือมัฮ นะ ตูฮัด บือซัยํ เดะ อาตัซ_ อาดา ฌางัน ลาฆู มือนาแงฮ บือปาโตด_ ฌางัน ลาฆู บือซูซัฮ_ กรานา ญา เตด ปือดูลี กะ ซือบารัก มือญือมัฮ_ เตด ซาโมจ ซือบารัก อีตู_ ฌางัน ลาฆู ซูกา ฮาตี_ ดาตัก เดะ ตางัน นะ กาเญา ปูลัก ดัฮ.

¹⁴ กาเญา ตาญา จะ_ “ซาเบะ นามา ตูฮัด เตด ซาโมจ?” กรานา จะ_ ตูฮัด บือซัยํ เดะ อาตัซ ญา ฌาดี ซะซรี_ ซามา ตืองัฮ เกา ฌางัน บีนี นะ เกา_ นู เกา บือเลฮ ตะเดะ กาลา เกา อูรัก มูดา เตอ. มีเซ นีบีนี อีตู ญา บือฆู ฌางัน เกา_ ฌาดี บีนี นะ เกา ตูโรจ บือกะ ปือมือเลา บือฌาญี บือตือตู_ เกา โปด_ บูวัจ กือบลากัก กะ นีบีนี อีตู ดัฮ.

¹⁵ ตาปี ฮอย ซาปา ซา อูรัก_ นู อาดา ฮาตี บรีงัจ_ นู นะ บูวัจ ลาฆู กะฆีนี. ซือมียา นู อาดา ลาฆู บรีงัจ เตอ_ ญา บือคานะ นามา? ญา บือคานะ นะ บือเลฮ โกะ อานะ จูจู_ ตูโรจ ฌาลัด นู รือมัก ฌางัน ตูฮัด. กะฆีเตอ กือนา ฌาฆา ญาวา บรี บาฌิ_ ฌางัน บรี กะ ซาปา บูวัจ กือบลากัก กะ บีนี นะ เกา นู บือเลฮ ตะเดะ กาลา อูรัก มูดา เตอ.

¹⁶ ตูฮัด บือซัยํ เดะ อาตัซ ตูฮัด_ นะ ลูมอฮ อิซราเอน_ ญา มือเลา จะ_ “ซาเบะ จะ_ กู บือชี กะ ลาฆู บรือจัย_ ฌางัน ลาฆู บูวัจ โตระๆ เลอ” ตูฮัด นู มือฆัฮ_ ญา มือเลา กะฆีนี เลอ. กะฆีเตอ กือนา ฌาฆา ญาวา บรี บาฌิ_ ฌางัน ฌาดี ซือมียา นู บูวัจ กือบลากัก.

¹⁷ กาเญา บูวัจ บรี กะ ตูฮัด บือซัยํ เดะ อาตัซ รือมัย ฮาตี_ ฌางัน ปือมือเลา นะ กาเญา. ตาปี กาเญา อาดา มือเลา จะ_ “กามี บูวัจ บรี ตูฮัด รือมัย ฮาตี กะฮามี?” ฌาดี กะฆีนี เลอ_ นู กาเญา มือเลา จะ “ราตา ซือมียา นู บูวัจ ฌาฮัจ โปด_ ฌาดี ซือมียา บาฌิ เดะ โซะ ฮือลด มูคา นะ ตูฮัด บือซัยํ เดะ อาตัซ. ญา เตอ ปือนอฮ ฮาตี กะ โกะ ซือมียา อีตู” เฆอ จะ_ ตาญา จะ_ “ตูฮัด นะ ลาฆู รือมัก ซูโงฮ เตอ_ อาดา ปัจ ดีฮา?”