เยเรมียา 3 - ซูรัจ ปือมือเลา นะ ตูฮัด

ลูมอฮ อิซราเอน_ ซือมียา นู เตด รือมัก

¹ “ดัฮ กีลากี ดีฮา บรือจัย ฌางัน บีนี นะ ญา นีบีนี อีตู โปด ตีงัน ญา ดัฮ ปี ฌาดี บีนี นะ กีลากี นู ซืออูรัก กีลากี นู ลามูลา นะ ปาเระ ปี ซารี นีบีนี อีตู เฆอ? นังฆรี อีตู นะ ตะอารัฮ โตระ_ บูกัด เฆอ? เกา อูซิ บือกาเซฮ ฌางัน ซือมียา นู เกา ซายัก_ บาญะ ดัฮ เกา นะ ปาเระ มาแรฮ ซารี กู เฆอ?” ตูฮัด บือซัยํ เดะ อาตัซ มือเลา กะฆีนี เลอ.

² “กือนา ลางอฮ ปาลา กะ โกะ บูเกะ นู ตีงี นู จรัฮ อีตู_ ลีฮัจ เลอ. เดะ ตือปัจ ดีฮา ซือตืองัฮ_ ฮอย ซาปา มาแรฮ บือกาเซฮ ฌางัน เกา? เกา บือเลฮ ดูโดะ นาตี ซือมียา นู เกา ซายัก_ เดะ บีดิก ฌาลัด บือกะ ซือมียา บักซัจ ปี มาแรฮ เดะ ตานัฮ ตูโฮยํ นู ลือฆา. เกา บือเลฮ บูวัจ บรี กะ นังฆรี อีตู ตะอารัฮ ฌางัน ลาฆู ฌาลัก นู ฌาฮัจ นะ เกา.

³ ซาเบะ กะฆีเตอ_ ฮูฌัด กือนา บลารัก ดัฮ ฮูฌัด นู ลือบัจ เดะ มูเซด ปือญูดัฮ ฮอย ดัฮ ตาปี เกา อาดา กือนิง นะ นีบีนี ฌาลัก เกา กีปัซ เตด ยอม จือและ เลอ.

⁴ ซีงี เกา บลาโลก กู บูกัด เฆอ_ จะ ‘อาโปก เดะ กู_ เกา ฌาดี ซาบัจ ตะเดะ กู ฌาดี ราดารา

⁵ ตูฮัด นะ มูซัยํ ปี ซือลาลู เฆอ? ตูฮัด นะ บืออีเซด ปี รอจ กะ วะตู ปือญูดัฮ เฆอ?’ ลีฮัจ เลอ เกา มือเลา กะฆีนี ดัฮ ตาปี เกา โปด_ อาดา บูวัจ ลาฆู ฌาฮัจ_ ราตา ฌือแนฮ นู เกา บูวัจ บือเลฮ.”

ตูฮัด ญา บลาโลก บรี บราเลฮ ฮาตี

⁶ ตูฮัด บือซัยํ เดะ อาตัซ_ มือเลา ฌางัน กู_ เดะ ฮาดัจ นะ ราฌา โยซียา_ จะ “กูญา บูวัจ นามา_ เกา ลีฮัจ ดัฮ เฆอ? ลูมอฮ อิซราเอน นู ฮาตี เตด ซูโงฮ_ กูญา ญาแญะ ปี กะ อาตัซ บูเกะ_ ราตา บีฌี_ เดะ บาวัฮ ปูโฮด กายู ฮีเฌา_ ราตา ปูโฮด. กะฆีเตอ_ กูญา ปี อูซิ ลาฆู บือกาเซฮ เดะ ตือปัจ อีตู.

⁷ กู บรีงัจ จะ ‘กาลา ญา บูวัจ ลาฆู กะฆีนี ฌู ฮาบิฮ ดัฮ_ ญา นะ ปาเระ มาแรฮ ซารี กู’_ ตาปี ญา เตด ปาเระ มาแรฮ. ลูมอฮ ยูดา_ อาดี ราดารา นู บูวัจ กือบลากัก โปด_ ลีฮัจ.

⁸ กู ลีฮัจ จะ_ ซาเบะ ลาฆู บือกาเซฮ ซือมูฮา_ นะ อิซราเอน นู ฮาตี เตด ซูโงฮ_ กู บือเลฮ โปรฮ ญา_ ซาแมน บรี ซูรัจ บรือจัย. ตาปี ยูดา_ อาดี ราดารา นู บูวัจ กือบลากัก เตอ_ เตด ตาโกจ. ญา โปด_ ปาเระ ปี อูซิ ลาฆู บือกาเซฮ ฌูฆา.

⁹ ซาเบะ ญา ลีฮัจ จะ_ ลาฆู ฌาลัก นะ ญา อาดา รีฮัน_ ญา โปด_ บูวัจ บรี นังฆรี ตะอารัฮ_ นู ปี บือกาเซฮ ฌางัน บาตู ฌางัน ปูโฮด กายู.

¹⁰ มีเซ ลาฆู กะฆีนี ซือมูฮา_ ยูดา_ อาดี ราดารา นู บูวัจ กือบลากัก โปด_ เตด บือเลฮ อาเลฮ มาแรฮ ซารี กู_ ปือนอฮ เดะ ฮาตี_ ตาปี วัจบูวัจ ปาเระ มาแรฮ.” ตูฮัด บือซัยํ เดะ อาตัซ มือเลา กะฆีนี เลอ.

¹¹ กะฆีเตอ ตูฮัด บือซัยํ เดะ อาตัซ มือเลา ฌางัน กู จะ “อิซราเอน นู ฮาตี เตด ซูโงฮ_ ปลีฮัจ จะ_ อาดา ลาฆู ซาลัฮ ดีกิ ลือเบฮ เดะ ยูดา_ นู บูวัจ ลาฆู กือบลากัก.

¹² กือนา ปี มือญาเระ ปือมือเลา อีนี โซะ ตารา_ มือเลา จะ “อิซราเอน_ นู ฮาตี เตด ซูโงฮ เออ_ บาลิ มาแรฮ เลอ ตูฮัด บือซัยํ เดะ อาตัซ มือเลา กะฆีนี เลอ กู นะ เตด ตีญุง ลีฮัจ เกา ฌางัน ลาฆู บืออีเซด ซาเบะ กู ซายัก กือฌะ กือมัซ ตูฮัด มือเลา กะฆีนี เลอ กู นะ เตด บืออีเซด ปี ซือลาลู.

¹³ อาซัน ซาโงะ ลาฆู ซาลัฮ นะ เกา_ จะ เกา บือเลฮ บูวัจ กือบลากัก กะ ตูฮัด บือซัยํ เดะ อาตัซ_ ตูฮัด นะ เกา ซือมาตา ปี อาเมด ฮาตี โกะ ตูฮัด นู อาซิก_ เดะ บาวัฮ ปูโฮด กายู ฮีเฌา_ ราตา ปูโฮด. เกา เตด มือนีงัย กะ ซือวารา นะ กู ตูฮัด บือซัยํ เดะ อาตัซ มือเลา กะฆีนี เลอ.

¹⁴ ตูฮัด บือซัยํ เดะ อาตัซ มือเลา จะ_ โกะ อานะ จูจู นู ฮาตี เตด ซูโงฮ เออ_ บาลิ มาแรฮ เลอ ซาเบะ กู ฌาดี ตกเก นะ กาเญา. กู นะ ซาโมจ กาเญา_ ดาตัก เดะ นังฆรี ซืออูรัก_ ดาตัก เดะ บือแนฮ ดูวา อูรัก กู นะ บาวา กาเญา มาแรฮ รอจ กะ ซีโยน.”

¹⁵ “กู นะ บรี กะ กาเญา_ โกะ ซือมียา ปือบือลา กาเมก_ ซือมียา นู กู กือนา เดะ ฮาตี นะ กู_ ซือมียา นู นะ ปือบือลา กาเญา ฌางัน ลาฆู ปานัย_ ลาฆู มาโซะ เดะ ฮาตี.

¹⁶ กาลา ลูมอฮ กาเญา บือตามัฮ บาญะ เดะ นังฆรี_ อีตู เดะ วะตู อีตู” ตูฮัด บือซัยํ เดะ อาตัซ มือเลา กะฆีนี จะ “กูญา นะ เตด มือเลา ปูลัก จะ ‘ปือตี บือฌาญี บือตือตู นะ ตูฮัด บือซัยํ เดะ อาตัซ.’ ลาฆู อีตู นะ เตด บือฌาดี เดะ ฮาตี_ ฮอย ซาปา มือเลา ปาซัน ซือบารัก อีตู_ ฮอย ซาปา ฌิราซา กะ ญา. กูญา นะ เตด บูวัจ ปูลัก ดัฮ เลอ.

¹⁷ เดะ กาลา อีตู_ นะ บลาโลก นังฆรี เยรูซาเลม จะ_ ฌาดี ตือปัจ ดูโดะ ฌาดี ราฌา_ นะ ตูฮัด บือซัยํ เดะ อาตัซ. โกะ ลูมอฮ บักซา ซือมูฮา_ นะ ปาคัจ บือมุน มาโซะ มาแรฮ_ กะ นังฆรี เยรูซาเลม_ กรานา ปือนามา นะ ตูฮัด บือซัยํ เดะ อาตัซ. กูญา นะ เตด ตือฆัยํ ฮาตี_ ตูโรจ กะ ฮาตี นู ฌาฮัจ นะ ตะอาซิก ปูลัก ดัฮ.

¹⁸ เดะ วะตู อีตู_ บือแนฮ นะ ยูดา_ นะ บือฌาลัด มาแรฮ บือซามา ฌางัน บือแนฮ นะ อิซราเอน_ กูญา กือดูวา นะ มาโซะ บือซามา_ มาแรฮ ดาตัก เดะ นังฆรี โซะ ตารา_ มาแรฮ กะ นังฆรี นู กู ซรัฮ บรี กะ โกะ บีลาแก นะ กาเญา_ บรี ฌาดี ปือซากา.

¹⁹ “กู นี_ บรีงัจ จะ กู นะ ตืองะ เกา_ เดะ ซามา ตืองัฮ โกะ นานะ นะ กู กะฮามี เลอ บรี นังฆรี นู เกา บือคานะ กะ เกา บรี ฌาดี ปือซากา นู บือฆาจะ โตระ_ เดะ ลูมอฮ บักซา ซือมูฮา. กู บรีงัจ ปูลัก จะ_ เกา นะ บลาโลก กู จะ ‘อาโปก เดะ กู’ นะ เตด อาเลฮ ปี เดะ ฌาลัด ตูโรจ กู.

²⁰ ตาปี บือแนฮ อิซราเอน เออ_ ซูโงฮ เลอ_ กาเญา บูวัจ กือบลากัก กะ กู ซือรูปา บือกะ บีนี บูวัจ กือบลากัก ตีงัน ลากี นะ ญา.” ตูฮัด บือซัยํ เดะ อาตัซ_ ญา มือเลา กะฆีนี เลอ.

²¹ กูญา ดืองัยํ ซือวารา_ มาแรฮ ดาตัก เดะ ตือปัจ ตีงี โตระ ฌาดี ซือวารา มือนาแงฮ_ ซือวารา ปูโฌะ มีตา_ นะ โกะ นานะ ซือมูฮา นะ อิซราเอน ซาเบะ กูญา บูวัจ ฌาลัด นะ กูญา บรี ปีเกาะ ดัฮ กูญา ลูปา กะ ตูฮัด บือซัยํ เดะ อาตัซ_ ตูฮัด นะ กูญา เลอ.

²² “โกะ นานะ นู ฮาตี เตด ซูโงฮ เออ_ กือนา บาลิ มาแรฮ เลอ กู นะ ปือบือลา ลาฆู เตด ซูโงฮ นะ กาเญา_ บรี ซือนัง.” “นี เลอ_ กามี มาแรฮ ซารี เกา ดัฮ ซาเบะ เกา ฌาดี ตูฮัด บือซัยํ เดะ อาตัซ_ ตูฮัด นะ กามี.

²³ โงฮซูโงฮ_ ตือบิก บูเกะ ฌาดี ซือบารัก นู มืออูปัย ลาฆู มาโบะ บรามัย เดะ อาตัซ บูเกะ โปด_ กะฆีเตอ ฌูฆา. โงฮซูโงฮ เลอ_ ลาฆู ลือปัซ บาฌิ นะ อิซราเอน เตอ อาดา เดะ ตูฮัด บือซัยํ เดะ อาตัซ_ ตูฮัด นะ กามี.

²⁴ “ตาปี จะ_ ตะเดะ กามี อาดา ฌาดี มูดา ลาฆี_ ลาฆู นู บูวัจ บรี จือและ เตอ_ บือเลฮ ฆีเฆะ มากัด_ โกะ ซือบารัก ซือมูฮา_ นู โกะ บีลาแก นะ กามี บือเลฮ กรือฌา บีดา บือเลฮ_ ฌาดี กาวัด ลือมู_ กาวัด กาเมก_ นานะ กีลากี_ นานะ นีบีนี นะ กูญา.

²⁵ บรี กามี ตีโนะ เดะ ลาฆู จือและ นะ กามี_ บรี ลาฆู จือและ มาตา ตูโดก กามี ตาโรฮ_ ซาเบะ กามี บือเลฮ บูวัจ ดูซา กะ ตูฮัด บือซัยํ เดะ อาตัซ_ ตูฮัด นะ กามี. อีซี กามี_ ฌางัน โกะ บีลาแก นะ กามี_ ตะเดะ กามี อาดา มูดา ลาฆี_ ฌู รอจ กะ อารี อีนี_ กามี เตด บือเลฮ มือนีงัย_ กะ ซือวารา นะ ตูฮัด บือซัยํ เดะ อาตัซ_ ตูฮัด นะ กามี เลอ.”