เยเรมียา 2 - ซูรัจ ปือมือเลา นะ ตูฮัดตูฮัด ญา บลาโลก อิซราเอน บรี บราเลฮ ฮาตี 1 ปือมือเลา นะ ตูฮัด บือซัยํ เดะ อาตัซ มาแรฮ รอจ กะ กู จะ 2 “กือนา ปี มือญาเระ_ บรี ลูมอฮ นังฆรี เยรูซาเลม นะ ดืองัยํ_ จะ “ตูฮัด บือซัยํ เดะ อาตัซ มือเลา กะฆีนี จะ กู อาดา จับ นู เกา ซายัก กือฌะ กือมัซ กะ กู_ เดะ วะตู เกา ฌาดี ราดารา ฌาดี จะ_ ลาฆู ซายัก นะ เกา_ กาลา เกา บือตูนัง ดัฮ. เกา ตูโรจ กู มาแรฮ_ เดะ ตือปัจ ตานัฮ ตูโฮยํ นู ลือฆา เดะ ตือปัจ นู เตด บือเลฮ ปรุยๆ ปูโฮด นามา. 3 อิซราเอน เตอ_ ฌาดี กือโบด นู จรัฮ บาฌิ นะ ตูฮัด บือซัยํ เดะ อาตัซ ฌาดี โกะ บูวัฮ ลามูลา นะ ญา. ราตา ซือมียา นู บือเลฮ มากัด บูวัฮ เตอ โปด_ ซาลัฮ ลาฆู ฌาฮัจ มาแรฮ รอจ กะ กูญา. ตูฮัด มือเลา กะฆีนี เลอ.” 4 โอ บือแนฮ นะ ยาโกบ_ เออ_ ราตา บือแนฮ นะ อิซราเอน เออ_ กือนา มือนีงัย กะ ปือมือเลา นะ ตูฮัด บือซัยํ เดะ อาตัซ_ 5 ตูฮัด มือเลา กะฆีนี จะ “โกะ บีลาแก นะ กาเญา ดาปัจ ลาฆู ซาลัฮ นามา เดะ กู เลอ บูวัจ บรี กูญา ฌาโวฮ เดะ กู ตูโรจ กะ ลาฆู นู ฮอย รือฆา_ บรี อีซี กูญา ฌาดี ซือบารัก นู ฮอย รือฆา? 6 กูญา เตด บือเลฮ มือเลา จะ ‘ตูฮัด บือซัยํ เดะ อาตัซ_ ญา ดูโดะ ปัจ ดีฮา ญา นู บาวา กีตา_ ญาแญะ มาแรฮ ดาตัก เดะ นังฆรี อียิบ ญา นู บาวา กีตา เดะ ตือปัจ ตานัฮ ตูโฮยํ นู ลือฆา เดะ ตือกอซ ตานัฮ ตูโฮยํ_ อาดา ลูบัก ตลาฆา เดะ ตือกอซ นู ฮอย อาเย_ อาดา ลาฆู กือลับ ฮีตับ เดะ ตือปัจ ตานัฮ นู ฮอย ซาปา ลาลู ปี บือเลฮ ฮอย อูมัจ ซือมียา ดูโดะ เดะ ตือปัจ อีตู?’ 7 กู บาวา กาเญา มาโซะ มาแรฮ เดะ นังฆรี นู อาดา กือโบด_ อาดา บือนัก บีดา นะ มากัด บูวัฮ_ ฌางัน โกะ ซือบารัก นู ฌิบาฌิ. ตาปี กาลา มาโซะ มาแรฮ_ กาเญา บูวัจ บรี นังฆรี นะ กู ตะอารัฮ ดัฮ บูวัจ บรี ปือซากา นะ กู_ ฌาดี ซือบารัก นู กือนา บือชี. 8 โกะ ซามี โปด_ เตด บือเลฮ มือเลา จะ_ ‘ตูฮัด บือซัยํ เดะ อาตัซ ญา ดูโดะ ปัจ ดีฮา?’ โกะ ซือมียา อีตู นู ปานัย ลาฆู ปือมือเลา ฮูโกบ_ เตด กราลา กู โกะ ซือมียา ปือบือลา โปด_ บูวัจ ลาฆู กือบลากัก กะ กู ลูมอฮ ซือมียา ตูโดฮ ปือมือเลา เตอ_ ตูโดฮ ตูโรจ กะ บราลา บาอัน ตูโรจ กะ ลาฆู นู เตด ฌาดี นามา.” 9 ตูฮัด บือซัยํ เดะ อาตัซ มือเลา จะ “ซาเบะ กะฆีเตอ กู อาดา อาดู กาเญา กู อาดา อาดู โกะ จูจู นะ กาเญา. 10 กือนา ลากัฮ ปี กะ ซรือบัก ปูเลา ซัยปรัด_ ตีญุง ลีฮัจ ซูโรฮ ซือมียา ปี กะ นังฆรี เกดาระ_ บือฮีมัจ บรี บาฌิ ลีฮัจ จะ_ ดือละ อาดา ลาฆู กะฆีนี ซือตืองัฮ เฆอ? 11 อาดา ลูมอฮ บักซา ดีฮา_ ดือละ รีบัย ตูฮัด นะ ญา มีเซ จะ ตูฮัด อีตู_ เตด ฌาดี ตูฮัด ซูโงฮ? ตาปี โกะ ลูมอฮ ซือมียา นะ กู_ บือเลฮ อาเมด ลาฆู บือซรี นะ กูญา รีบัย ฌางัน ซือบารัก นู รูฆี ดัฮ.” 12 ตูฮัด บือซัยํ เดะ อาตัซ มือเลา จะ “โกะ ลาแงะ เออ กือนา ตือกือฌุจ กรานา ลาฆู อีนี_ กือนา ตาโกจ โตระ_ กือนา บือนาซา ฮาบิฮ เลอ 13 ซาเบะ จะ ลูมอฮ ซือมียา นะ กู_ บือเลฮ บูวัจ ลาฆู ฌาฮัจ_ ดูวา ฌือแนฮ. กูญา บือเลฮ ตีงัน กู ดัฮ นู ฌาดี มาตา อาเย ซือบุยํ_ นู อาดา อาเย บรี ฮีโดะ บารู กูญา ปาฮัจ กูบัก ตาโรฮ อาเย_ บีดา ญาวา ตะอาซิก ฌาดี กูบัก ปือจัฮ_ นู กานัก อาเย เตด บือเลฮ. 14 “อิซราเอน ฌาดี ฮามา เฆอ? เฆอ จะ_ ฌาดี ปราโซฮ นู บือฌาดี มาแรฮ เดะ รูมัฮ? ซาเบะ นามา กูญา ปี ฌาดี ซือบารัก ซามุน? 15 โกะ ซีงา มูดา มือรียัน ซรือบู กะ กูญา ญา มือรียัน ซือวารา บูริ โตระ บูวัจ บรี ตือปัจ ตานัฮ นะ กูญา กือนา ตีงัน ฮอย นามา โกะ นังฆรี นะ กูญา โปด_ กือนา ตูนู_ ฮอย ซือมียา ดูโดะ เลอ. 16 ลือเบฮ เดะ อีตู ปูลัก_ ลูมอฮ ซือมียา นังฆรี เมมฟิด_ ฌางัน นังฆรี ทาปานเฮด บือเลฮ กูโกยํ ปาลา นะ เกา ดัฮ. 17 เกา บาวา ลาฆู อีนี มาแรฮ บอฮ เดะ ญาวา นะ เกา ตะอาซิก_ บูกัด เฆอ? เดะ ลาฆู ตีงัน ตูฮัด บือซัยํ เดะ อาตัซ ตูฮัด นะ เกา กาลา ตูฮัด ญา บาวา เกา ตูโรจ กะ ฌาลัด บูกัด เฆอ 18 กะฆีเตอ เกา บือเลฮ นามา เดะ ลาฆู ตูโรด ปี กะ นังฆรี อียิบ บีดา โอะ อาเย เดะ ซูงัย นัยละ? เฆอ จะ เกา_ บือเลฮ นามา เดะ ลาฆู ตูโรด ปี กะ นังฆรี อาซีเรีย บีดา โอะ อาเย เดะ ซูงัย ยูเฟรติด? 19 ลาฆู ฌาฮัจ นะ เกา_ นะ กาเตาะ อาฌัยํ เกา ตะอาซิก ลาฆู เตด รือมัก นะ เกา_ นะ อูจะ กะ เกา. เกา กือนา ตาฮู ลีฮัจ เลอ จะ_ ญา ฌาดี ลาฆู ฌาฮัจ_ ฌางัน ลาฆู บือนาซา ฮาตี นู ตีงัน ตูฮัด บือซัยํ เดะ อาตัซ_ ตูฮัด นะ เกา เกา เตด บรีงัจ ตาโกจ เดะ กู ลาลู เลอ.” ตูฮัด บือซัยํ เดะ อาตัซ_ ตูฮัด นู มือฆัฮ_ ญา มือเลา กะฆีนี เลอ. 20 “ซาเบะ จะ_ ลามา ดัฮ_ เกา บือปาตัฮ ปืองานัยํ นะ เกา ราตัย อีกัจ เดะ ญาวา นะ เกา_ ตืออูฆัยํ ดัฮ เกา บือเลฮ มือเลา จะ ‘กู นะ เตด บือกรือฌา บรี.’ ซาเบะ เกา บือเลฮ ฆูแลก_ อูซิ ลาฆู บือกาเซฮ เดะ อาตัซ บูเกะ ตีงี_ ราตา ตือปัจ บาวัฮ ปูโฮด กายู ดาโวด ฮีเฌา_ ราตา ปูโฮด. 21 ตาปี กู บือเลฮ ตานัม เกา_ ฌาดี อากัยํ ปูโฮด บูวัฮ อางุน นู บาฌิ ฌาดี บือแนฮ นู ซูโงฮ ฮาปา. กะฆีเตอ บูวัจ นามา เกา ตะอารัฮ โตระ ฌู ฌาดี บือกะ อากัยํ ฮูตัด?” 22 ตูฮัด บือซัยํ เดะ อาตัซ มือเลา จะ “มีเซ จะ เกา บาโซฮ ญาวา ฌางัน อาเย กรอจ ซูโรฮ ซาโบด บาญะ ตาปี บือกัซ บือซีมอยํ_ ลาฆู ซาลัฮ นะ เกา โปด_ กู อาดา บือฆารี ดัฮ. 23 เกา นะ มือเลา บือเลฮ กะฮามี จะ ‘กู ฮอย ลาฆู ตะอารัฮ กู เตด บือเลฮ ตูโรจ โกะ บราลา บาอัน’? กือนา ตีญุง ลีฮัจ ลาฆู นะ เกา_ เดะ จือลัฮ บูเกะ เลอ กือนา บือฮีมัจ เลอ จะ_ เกา บือเลฮ บูวัจ นามา ซือรูปา อูตัย ราดารา_ บรานี ดูโดะ เตด ซืองะ 24 ซือรูปา บือกะ กูดา ฮูตัด บาซา ดือมิ_ นู ดือละ ดูโดะ เดะ ตือปัจ ตานัฮ ตูโฮยํ นู ลือฆา บือเลฮ อีซะ อาเงน บือญาวา_ ฌางัน ลาฆู ลาปัยํ โตระ นะ ญา. ซาปา นะ บลารัก ลาฆู ฆาละ นะ ญา บือเลฮ? ราตา ซือมียา นู มือโซะ ซารี ญา_ นะ เตด ฆาโดฮ รือมัย กาลา รอจ บูลัด นู ตือตู นะ ญา_ นะ ดาปัจ ญา เลอ. 25 ฌาฆา เลอ_ ฌางัน บรี กากี นะ เกา ปูตุซ ปะตาปะ ฌางัน บรี เกา ตูโฮยํ ลีเฮ_ อาดา ดาฆา. ตาปี เกา มือเลา จะ ‘ฮอย ลาฆู จาดัก ดัฮ ซาเบะ กู บือเลฮ ซายัก กะ ตูฮัด อาซิก กู นะ ตูโรจ ปี กะ กูญา.’ 26 “ซือรูปา บือกะ อูรัก ปือญูรี นู กือนา รีฆะ_ อาดา ลาฆู จือและ กะฮามี บือแนฮ บักซา นะ อิซราเอน โปด_ นะ จือและ กะฆีเตอ อีซี กูญา_ โกะ ราฌา_ โกะ ตกเก โกะ ซามี_ ฌางัน โกะ ซือมียา ตูโดฮ ปือมือเลา นะ กูญา 27 ซือมียา นู มือเลา กะ ปูโฮด กายู จะ ‘เกา ฌาดี อาโปก นะ กู’ มือเลา กะ บาตู ลีบัย จะ ‘เกา บือโปรจ กู มาแรฮ.’ ซาเบะ กูญา บือเลฮ อาเลฮ บลากัก บรี กะ กู บูกัด อาเลฮ มูคา มาแรฮ กะ กู. ตาปี กาลา รอจ วะตู ซูซัฮ กูญา มือเลา จะ ‘มีตา บีกัซ เลอ_ ตูโลก กามี บรี ลือปัซ.’ 28 ตาปี โกะ ตูฮัด นะ เกา_ ดูโดะ ปัจ ดีฮา เลอ นู ฌาดี ตูฮัด นู เกา บูวัจ_ บีดา เกา ตะอาซิก? ดัฮ กูญา ตูโลก เกา บรี ลือปัซ บือเลฮ โปด_ บรี กูญา บีกัซ ตูโลก เลอ กาลา รอจ วะตู ซูซัฮ นะ เกา. ยูดา เออ_ เกา อาดา นังฆรี บาญะ ตารา ดีฮา เกา โปด_ อาดา ตูฮัด บาญะ ตารา อีตู.” 29 ตูฮัด บือซัยํ เดะ อาตัซ มือเลา กะฆีนี จะ “กาเญา นะ มาแรฮ บือตือฆัฮ ฌางัน กู บูวัจ นามา? กาเญา บือเลฮ บูวัจ กือบลากัก กะ กู_ ฮาบิฮ ราตา อูรัก ดัฮ. 30 นู กู รือเปะ กาเตาะ โกะ อานะ จูจู นะ กาเญา ดัฮ_ เตด ฌาดี นามา กูญา โปด เตด ซาโมจ ลาฆู อาฌัยํ ปือดัก นะ กาเญา ตะอาซิก_ บือเลฮ ตือลัด ซือมียา ตูโดฮ ปือมือเลา นะ กาเญา ซือรูปา บือกะ ซีงา นู บูวัจ บรี ฌาฮานัม. 31 โกะ ซือมียา ฮาดัจ อีนี เออ_ กือนา บรีงัจ บือฮีมัจ ลีฮัจ กะ ปือมือเลา นะ ตูฮัด บือซัยํ เดะ อาตัซ กู ฌาดี ซือรูปา ตือปัจ ตานัฮ ตูโฮยํ นู ลือฆา_ กะ อิซราเอน เฆอ? เฆอ จะ_ ซือรูปา นังฆรี นู กือลับ ฮีตับ? บูวัจ นามา โกะ ลูมอฮ ซือมียา นะ กู มือเลา จะ ‘กามี ลือปัซ ดัฮ กามี นะ เตด ปี ซารี เกา ปูลัก’? 32 ราดารา นะ ลูปา โกะ ซือบารัก ปากัย นะ ญา บือเลฮ เฆอ? เจาเซา นะ ลูปา กาเยด นะ ญา บือเลฮ เฆอ? ตาปี โกะ ลูมอฮ ซือมียา นะ กู บือเลฮ ลูปา กะ กู ฌาดี วะตู บราปา อารี โปด_ กีรา เตด ตือตู ดัฮ. 33 “เกา ปานัย ซารี ฌาลัด ปี ดาปัจ ลาฆู ซายัก กะฆีเตอ โปด_ เกา อาดา อาฌัยํ ฌาลัด นะ เกา_ บรี กะ นีบีนี ฌาฮัจ. 34 เดะ บีดิก กาเยด บาฌู นะ เกา นะ ลีฮัจ บือฆารี ดารัฮ_ นะ ซือมียา ฮาฌะ นู ฮอย ลาฆู ซาลัฮ มีเซ เกา เตด บือเลฮ รีฆะ กูญา_ กาลา บูวัจ ลาฆู มือญูรี. ตาปี มีเซ จะ นะ อาดา ลาฆู แนฮฌือแนฮ อีนี 35 เกา โปด_ อาดา มือเลา จะ ‘กู ฮอย ลาฆู ซาลัฮ ลาลู ซูโงฮ เลอ_ ลาฆู มูซัยํ นะ ตูฮัด บือเลฮ อาเลฮ ปาเระ เดะ กู ดัฮ.’ ลีฮัจ เลอ_ กู นะ บาวา เกา ปี กะ ลาฆู กรัจ ฮูโกบ ซาเบะ เกา บือเลฮ มือเลา จะ ‘กู เตด บือเลฮ บูวัจ ดูซา.’ 36 บูวัจ นามา เกา บือฌาลัด อูซิ ปี มาแรฮ_ เตด อีงัจ บรี บาฌิ เลอ บือกะ รีบัย ฌาลัด นะ เกา ปี ซือรูโลยํ เลอ? นังฆรี อียิบ นะ บูวัจ บรี เกา อาดา จือและ มาตา ซือรูปา นังฆรี อาซีเรีย บือเลฮ บูวัจ บรี เกา จือและ ดัฮ เตอ. 37 กะฆีเตอ ฌูฆา_ เกา นะ ตรือเบะ มาแรฮ เดะ ตือปัจ อีตู อาดา ฌางัน ตางัน ปือฆัก เดะ ปาลา ซาเบะ ตูฮัด บือซัยํ เดะ อาตัซ_ ญา กีปัซ กูญา อีตู_ นู เกา ตือตู ฮาตี เตอ เกา นะ เตด กายา ปี ซือรูโลยํ_ กรานา กูญา. |