เอเฟซัด 2 - ซูรัจ ปือมือเลา นะ ตูฮัด

ตูฮัด บูวัจ บรี ซือมียา ปือจายา_ ฮีโดะ บือซามา ฌางัน เยซู คริด

¹ ตาปี กาเญา เลอ_ มีเซ จะ กาเญา อาดา ซือรูปา มาตี ดัฮ_ เดะ ลาฆู บูวัจ กือลือเบฮ_ บูวัจ ดูซา_ ตาปี ตูฮัด บูวัจ บรี ฮีโดะ ดัฮ.

² ดูลู_ กาเญา บูวัจ ดูซา อีตู_ ตูโรจ กะ ฮาดัจ โซะ ดือนียา อีนี_ ตูโรจ กะ กือปาลา ฌิด นู มือฆัฮ_ เดะ โซะ อาตัซ. ญา เตอ_ ฌาดี ฮาตู_ นู ฮูโกบ ลูมอฮ ซือมียา_ นู เตด ตูโรจ กะ ตูฮัด.

³ กาลา อีตู_ กีตา ซือมูฮา ดูโดะ บือซามา ฌางัน ลูมอฮ กูญา_ ลาดัจ ตูโรจ กะ ฮาตี นู เตด บือฆูนา นะ ญาวา ตะอาซิก_ ลาดัจ ตูโรจ กะ บือนา นู ญาวา นะ กีตา ซูกา_ นู กีตา อีงัจ เดะ ฮาตี. ซือรูปา โกะ ซือมียา ฆีลาฆี เตอ_ กีตา ฌาดี ซือมียา นู ปาโตจ นะ กือนา ตูฮัด มูซัยํ โตระ.

⁴ ตาปี ตูฮัด เดะ อาตัซ_ นู ตือจีฮัด ปือนอฮ เดะ ฮาตี เตอ_ ญา ซายัก กีตา บาญะ ตือลาลู.

⁵ มีเซ จะ กีตา อาดา ซือรูปา มาตี ดัฮ_ เดะ ลาฆู บือดูซา_ ตาปี ญา บูวัจ บรี กีตา ฮีโดะ_ บือซามา ฌางัน เยซู คริด ดัฮ. กรานา นู ญา ฮาลัย บรี ซือลามัจ เตอ เลอ_ บูวัจ บรี กาเญา ฮีโดะ ลือปัซ บาฌิ ดัฮ.

⁶ กะฆีเตอ_ ญา อาเกะ กีตา_ บือซามา ฌางัน เยซู คริด ดัฮ_ บรี กีตา ดูโดะ บือซามา ฌางัน ญา_ เดะ โซะ อาตัซ ลาแงะ.

⁷ กะฆีเตอ เลอ_ เดะ ฮาดัจ โซะ ฮือลด_ ตูฮัด เดะ อาตัซ นะ บรี ลีฮัจ_ นู ญา ฮาลัย บรี ซือลามัจ บาญะ ตือลาลู เตอ_ นู ญา อาดา ฮาตี บาฌิ ซูโงฮ ฌางัน กีตา_ ซาเบะ กีตา ลือกัจ บือซามา ฌางัน เยซู คริด.

⁸ กรานา นู ตูฮัด ฮาลัย บรี ซือลามัจ เตอ_ บูวัจ บรี กาเญา ฮีโดะ ลือปัซ บาฌิ ดัฮ_ ซาเบะ กาเญา ปือจายา. บูกัด กาเญา ตะอาซิก บูวัจ_ ตาปี ตูฮัด เดะ อาตัซ_ ญา ฮาลัย บรี ดัฮ.

⁹ นู กาเญา ฮีโดะ ลือปัซ บาฌิ ดัฮ_ บูกัด กรานา ปือบูวัจ นะ กาเญา_ ตีเมา บรี ซือมียา ดีฮา นะ มือโอจ กะ ญาวา ตะอาซิก.

¹⁰ กรานา กีตา ฌาดี ปือบูวัจ นะ ตูฮัด เดะ อาตัซ เลอ. ญา บือฌาดี กีตา ดัฮ_ บรี กีตา นะ ลือกัจ บือซามา ฌางัน เยซู คริด_ นะ ตูโรจ กะ ลาฆู นู บาฌิ_ นู ญา ซียะ ดูลู ดัฮ_ บรี กีตา นะ บูวัจ ตูโรจ.

ตูฮัด บูวัจ บรี ลูมอฮ บักซา อิซราเอน_ ฌางัน ลูมอฮ บักซา อาซิก_ บาฌิ บือซามา

¹¹ กะฆีเตอ_ กาเญา กือนา บรีงัจ เลอ. ดูลู_ กาเญา ฌาดี ซือมียา บักซา อาซิก โซะ ญาวา. ลูมอฮ บักซา อิซราเอน นู ซาโมจ ลาฆู กรัจ_ นู บูวัจ เดะ ญาวา ฌางัน ตางัน ซือมียา เตอ_ กูญา มือฌัฮ กาเญา นู ฌาดี ลูมอฮ บักซา อาซิก นู เตด ซาโมจ ลาฆู กรัจ ดัฮ.

¹² บรีงัจ เลอ_ เดะ วะตู อีตู_ กาเญา ดูโดะ ซือรูปา กาเญา ฮอย เยซู คริด_ ดูโดะ โซะ ลูวัยํ เดะ ลูมอฮ ซือมียา บักซา อิซราเอน ดัฮ เตอ_ ฮอย บาฮาเฆด เดะ ลาฆู นู ตูฮัด บรี ปือมือเลา บือปาคัจ บือตือตู ฌางัน กูญา ดัฮ. กาเญา ดูโดะ เดะ ดือนียา_ ฮอย ตือปัจ นะ จาดัก กะ ลาฆู นู บาฌิ นามา โปด_ ฮอย ตูฮัด ดัฮ.

¹³ ตาปี กาเญา นู ดูลู ดูโดะ ฌาโวฮ เดะ ตูฮัด ดัฮ_ กาลา อีนี_ นู กาเญา มาโซะ บือซามา ฌางัน เยซู คริด เตอ_ กาเญา มาโซะ มาแรฮ ดาปิก ดัฮ_ ซาเบะ เยซู ญา มาตี_ ดารัฮ มือนีแลฮ ดัฮ.

¹⁴ กรานา ญา เลอ_ นู บูวัจ บรี กีตา ดูโดะ ซือนัง ซือลามัจ ดัฮ. นู ดูวา บือลัฮ ซาเกะ ฮาตี บือซามา-ซามา_ ฌาดี ซือรูปา อาดา ดีนิง_ นู กือตัก เดะ ตืองัฮ. ตาปี นู เยซู มาตี โซะ ญาวา ดัฮ_ ญา บูวัจ บรี กีตา ดูวา บือลัฮ_ ฌาดี ซา ดัฮ_ บูวัจ บรี ดีนิง อีตู รูโตฮ ฮาบิฮ เลอ.

¹⁵ ปือมือเลา ฮูโกบ นะ ตูฮัด ฌางัน โกะ ปือมือซัด มาจับๆ นะ ญา เตอ_ เยซู บูวัจ บรี ฮาบิฮ ดัฮ_ เตด ฌาดี นามา. ญา บูวัจ กะฆีเตอ_ กรานา นะ บูวัจ บรี นู ดูวา บือลัฮ อีนี_ ฌาดี ซา ซือมียา นู บารู_ ลือกัจ บือซามา ฌางัน ญา. ฌาดี จะ_ ญา บูวัจ บรี กูญา ซือนัง บือซามา เลอ.

¹⁶ นู ญา มาตี เดะ กายู ปลีตัก เตอ_ ญา บูวัจ บรี ดูวา บือลัฮ อีนี_ บือซามา บาฌิ_ ฌาดี ซา ญาวา ดัฮ_ บูวัจ บรี บาฌิ ฌางัน ตูฮัด เดะ อาตัซ ดัฮ. กะฆีเตอ_ ญา บูวัจ บรี ลาฆู ซาเกะ ฮาตี บือซามา อีตู_ บูวัก ฮาบิฮ ดัฮ.

¹⁷ กะฆีเตอ_ เยซู คริด มาแรฮ มือญาเระ บรีตา นู บาฌิ_ บือตาฮู กะ กาเญา นู ฌาโวฮ เดะ ตูฮัด_ บือตาฮู กะ ลูมอฮ กูญา นู ดาปิก ฌูฆา_ จะ_ นะ ดูโดะ ซือนัง ซือลามัจ บือเลฮ เลอ.

¹⁸ ซาเบะ ญา บูวัจ บรี กีตา ดูวา บือลัฮ_ นะ มาโซะ รอจ กะ อาโปก เดะ อาตัซ_ บือกะ ซา ซือมืองัจ นะ ตูฮัด อีตู_ บาวา กีตา.

¹⁹ กรานา ลาฆู อีตู_ วะตู อีนี_ กาเญา เตด ฌาดี ซือมียา บักซา ลูวัยํ_ บักซา อาซิก ลาฆี_ ตาปี กาเญา ฌาดี ลูมอฮ ซือมียา ซา บักซา_ บือซามา ฌางัน โกะ ซือมียา นะ ตูฮัด_ ฌาดี ลูมอฮ อานะ กือมอน นะ ตูฮัด เดะ อาตัซ.

²⁰ กาเญา ฌาดี ซือรูปา รูมัฮ_ นู อาเกะ ดัฮ_ นู อาดา ลูมอฮ ปือญูโรฮ นะ ตูฮัด_ ฌางัน ลูมอฮ ซือมียา ตูโดฮ ลาฆู นะ ตูฮัด ฌาดี จาวัก รูโซะ. อาดา เยซู คริด ตะอาซิก_ ฌาดี จาวัก ซรี เลอ.

²¹ นู โกะ ซือบารัก ซือมูฮา นะ รูมัฮ อีตู ลือกัจ บือซามา ฌางัน เยซู เตอ_ ญา กือนา บือฮูโบก บรี บาฌิ ดัฮ_ ตืองัฮ ฌาดี รูมัฮ นู บือซัยํ_ ฌาดี บาลัย นู ซรัฮ บรี กะ ตูฮัด ดัฮ.

²² นู กาเญา ลือกัจ บือซามา ฌางัน เยซู เตอ_ กาเญา ฌูฆา_ ตืองัฮ กือนา บอฮ บือซามา_ บรี ฌาดี บาลัย นะ ตูฮัด เดะ อาตัซ_ นู อาดา ซือมืองัจ นะ ตูฮัด ดูโดะ.