ซือมียา อาฌัยํ 2 - ซูรัจ ปือมือเลา นะ ตูฮัด

ลาฆู เตด ตือตู ปาซัน ลาฆู ตูโรจ ฮาตี นะ ตะอาซิก

¹ กู มือเลา เดะ ฮาตี จะ “มาแรฮ เลอ_ มาแรฮ บรามัย ลีฮัจ เออ_ กือนา รามัย บรี ปือนอฮ เดะ ฮาตี เลอ.” ตาปี ลีฮัจ เลอ_ ลาฆู อีนี โปด_ เตด ตือตู ฌูฆา.

² กู มือเลา ปาซัน ลาฆู บือฆือละ จะ “ลัฮบือบือลัฮ.” มือเลา ปาซัน ลาฆู รามัย จะ “นะ บือเลฮ นามา?”

³ กู บือฮีมัจ ลีฮัจ จะ_ นะ บูวัจ กะฮามี บรี ญาวา นะ ซือนัง ฌางัน อาระ อางุน. ตาปี ฮาตี อาดา ตูโญะ กะ กู_ ฌางัน ลาฆู ปานัย อากัน. กู ปือฆัก ตาฮัด ลาฆู บูดอ ตาโรฮ กะฮามี_ ฌู กู นะ ลีฮัจ บือเลฮ จะ_ อาดา ลาฆู นามา นะ บาฌิ_ บีดา บรี โกะ อูมัจ ซือมียา บูวัจ_ เดะ บาวัฮ ลาแงะ_ ตือดะ ฌู ฮาบิฮ อูมอยํ นู เตด บาญะ อารี นะ กูญา.

⁴ กู บูวัจ ลาฆู บือกรือฌา บือซัยํ โตระ. กู บือเลฮ บูวัจ รูมัฮ บาญะ บีฌี_ บูวัจ กือโบด บูวัฮ อางุน บาญะ ตือปัจ_ บีดา ญาวา ตะอาซิก.

⁵ กู ตานัม กือโบด ปูโฮด บูวัฮ_ ตานัม ปูโฮด กายู บรี ลีโนฮ_ บาญะ ตือปัจ_ ตานัม ปูโฮด กายู อาดา บูวัฮ บาญะ ฌือแนฮ_ เดะ ตือปัจ อีตู.

⁶ กู บูวัจ ลูนัก อาเย บาญะ บีดา ญาวา ตะอาซิก_ บีดา นะ ซูโรฮ อาเย เดะ ลูนัก อีตู จือลอย โกะ ปูโฮด กายู นู ตืองัฮ บือตูโมฮ บือฆาจะ.

⁷ กู บือลี ปราโซฮ กีลากี นีบีนี_ อาดา ปราโซฮ นู ดูโดะ เดะ อาปี เดะ รูมัฮ นะ กู. ลือเบฮ เดะ อีตู_ กู อาดา กาวัด ลือมู_ กาวัด แบะ_ กาวัด กาเมก ฌาดี นะ กู_ บาญะ เดะ โกะ ซือมียา นู ดูโดะ เดะ นังฆรี เยรูซาเลม ดูลู เดะ กู.

⁸ กู ปือมุน โกะ ปีระ ฌางัน มัซ ตาโรฮ ฌูฆา_ ปือมุน โกะ ซือบารัก บรือฆา นู บือฆูนา ฌางัน ราฌา_ บือฆูนา ฌางัน โกะ นังฆรี ซือมูฮา. กู อาดา ซือมียา มือญาญี_ กีลากี นีบีนี_ บีดา ญาวา นะ กู_ ฌางัน บีนี มูดา นู ฌาดี ลาฆู ซูกา ฮาตี นะ โกะ กีลากี.

⁹ กะฆีเตอ กู ฌาดี บือซัยํ_ ลือเบฮ เดะ โกะ ซือมียา นู ดือละ ดูโดะ ดูลู เดะ กู_ เดะ นังฆรี เยรูซาเลม. ลาฆู ปานัย อากัน นะ กู_ อาดา ดูโดะ ลือกัจ ฌางัน กู ฌูฆา.

¹⁰ บารัก นามา นู มาตา นะ กู บือคานะ นะ ลีฮัจ_ กู โปด นะ เตด บูนี. กู เตด บือเลฮ บลารัก ฮาตี_ เดะ ลาฆู บรามัย ราตา ฌือแนฮ_ ซาเบะ ฮาตี นะ กู ดาปัจ ลาฆู ซูกา ฮาตี เดะ ลาฆู บือกรือฌา โตระ นะ กู. นี เลอ_ ฌาดี บาฮาเฆด เดะ ลาฆู บือกรือฌา โตระ นะ กู.

¹¹ กะฆีเตอ_ กู อาเลฮ มาแรฮ ลีฮัจ_ โกะ บือนา นู ตางัน นะ กู บูวัจ_ ลาฆู บือกรือฌา โตระ นู กู บือเลฮ กรือฌา_ ฌางัน ลาฆู รือมัย เตอ_ ลีฮัจ เลอ_ ราตา ฌือแนฮ โปด เตด ตือตู_ ฌาดี จะ_ ดูโดะ มากัด ซา อาเงน_ ฮอย เตด บือเลฮ ลาฆู บาฌิ นามา_ เดะ บาวัฮ มาตา อารี.

ตูฮัด บรี ลาฆู ปานัย อากัน ฌางัน ลาฆู ซูกา ฮาตี_ กะ ซือมียา นู กือนา เดะ ฮาตี นะ ญา

¹² กะฆีเตอ_ กู อาเลฮ มาแรฮ บือฮีมัจ_ ลาฆู ปานัย อากัน_ ลาฆู ลัฮบือบือลัฮ_ ฌางัน ลาฆู บูดอ. ซาเบะ ซือมียา นู มาแรฮ เดะ บลากัก ราฌา_ นะ บูวัจ นามา บือเลฮ ซือตืองัฮ? กูญา โปด_ บูวัจ ลาฆู นู โกะ ซือมียา บูวัจ ลามา ดัฮ.

¹³ กู ลีฮัจ จะ_ ลาฆู ปานัย อากัน บาฌิ เดะ ลาฆู บูดอ_ ซือรูปา กะ ลาฆู จรัฮ บาฌิ เดะ ลาฆู กือลับ.

¹⁴ ซือมียา นู ปานัย อากัน นะ ตาฮู จะ_ นะ บือฌาลัด ปี ฌาลัด ดีฮา_ ตาปี ซือมียา บูดอ บือฌาลัด เดะ ลาฆู กือลับ. มีเซ กะฆีเตอ โปด_ กู อาดา ลีฮัจ จะ_ โฆรฮ ซา อีตู บือฌาดี เดะ กูญา ซือมูฮา.

¹⁵ กู มือเลา เดะ ฮาตี จะ_ “โฆรฮ นามา นู บือฌาดี เดะ ซือมียา บูดอ_ ญา นะ บือฌาดี เดะ กู เลอ. กะฆีเตอ กู นะ อาดา ลาฆู ปานัย อากัน บาญะ บูวัจ นามา เลอ?” กะฆีเตอ กู บรีงัจ จะ_ ลาฆู อีนี ฌาดี ลาฆู เตด ตือตู ฌูฆา.

¹⁶ ซาเบะ ฮอย ซาปา นะ จับ โกะ ซือมียา ปานัย อากัน_ บือกะ ซือมียา บูดอ. ซาเบะ กาลา รอจ วะตู กะ โซะ ฮือลด โปด_ ลูปา ฮาบิฮ ดัฮ. ซือมียา ปานัย อากัน โปด_ มาตี ซือรูปา ซือมียา บูดอ.

¹⁷ กะฆีเตอ_ กู บือชี กะ ญาวา นะ กู_ ซาเบะ จะ_ ลาฆู บือกรือฌา นู นะ บูวัจ เดะ บาวัฮ มาตา_ อารี บูวัจ ลาฆู ซูซัฮ ปายัฮ กะ กู. ซาเบะ จะ_ ราตา ฌือแนฮ โปด_ เตด ตือตู_ ฌาดี จะ_ ดูโดะ มากัด ซา อาเงน ฮอย นามา.

¹⁸ กู บือชี ลาฆู บือกรือฌา โตระ ซือมูฮา นะ กู_ นู กู กรือฌา โตระ เดะ บาวัฮ มาตา อารี_ ซาเบะ จะ_ กู ฆาโดฮ ตีงัน ลาฆู อีตู_ บรี กะ ซือมียา นู มาแรฮ เดะ บลากัก กู.

¹⁹ กะฆีเตอ_ ซาปา นะ ปี ตาฮู จะ_ ซือมียา อีตู นะ ฌาดี ซือมียา ปานัย อากัน เฆอ จะ ซือมียา บูดอ. ตาปี กูญา โปด_ นะ ปือบือลา ลาฆู กรือฌา โตระ นะ กู_ นู กู กรือฌา โตระ ดัฮ_ นู กู ซูโรฮ ลาฆู ปานัย อากัน นะ กู บูวัจ เดะ บาวัฮ มาตา อารี. อีนี โปด_ เตด ตือตู ฌูฆา.

²⁰ กู อูโนยํ_ ซือบะ ฮาตี ซูโงฮ_ ปาซัน กรือฌา โตระ ซือมูฮา นะ กู_ นู กู กรือฌา โตระ_ มาแรฮ เดะ บาวัฮ มาตา อารี.

²¹ กรานา จะ_ อาดา ซือมียา นู กรือฌา โตระ ฌางัน ลาฆู ปานัย อากัน_ ลาฆู ตาฮู ซูโงฮ_ ฌางัน ลาฆู ปานัย_ ตาปี ตีงัน บาฮาเฆด นะ ญา_ บรี กะ ซือมียา อาซิก_ นู เตด บือเลฮ กรือฌา โตระ บีดา ลาฆู อีตู เลอ. นี เลอ_ ฌาดี ลาฆู เตด ตือตู ฌูฆา_ ญา ฌาฮัจ ซูโงฮ.

²² ซาเบะ จะ_ อูมัจ ซือมียา บือเลฮ นามา_ เดะ ลาฆู กรือฌา โตระ ซือมูฮา_ ลาฆู มืองูตัย นู กูญา ฆาโดฮ กรือฌา โตระ_ เดะ บาวัฮ มาตา อารี เลอ?

²³ กรานา จะ_ อารี ตาโฮด ซือมูฮา นะ กูญา_ อาดา ซา ลาฆู ซูซัฮ ปายัฮ_ ลาฆู กรือฌา นะ กูญา โปด_ บูวัจ บรี กูญา รือมัย. รอจ กะ วะตู มาลับ_ ฮาตี นะ กูญา โปด_ เตด บราดู ซืองะ. นี เลอ_ ฌาดี ลาฆู เตด ตือตู ฌูฆา.

²⁴ โซะ อูมัจ ซือมียา เตอ_ ฮอย นามา บาฌิ เดะ ลาฆู นะ มากัด_ นะ โอะ_ นะ ซารี ลาฆู ซูกา ฮาตี เดะ ลาฆู กรือฌา โตระ นะ กูญา. นี เลอ กู ลีฮัจ จะ_ ฌาดี ลาฆู มาแรฮ ดาตัก เดะ ตางัน นะ ตูฮัด.

²⁵ กรานา จะ_ ดัฮ เตด ดูโดะ ฌางัน ตูฮัด ดัฮ_ ซาปา นะ มากัด บือเลฮ เลอ_ เฆอ จะ_ ซาปา นะ อาดา ลาฆู ซูกา ฮาตี บือเลฮ?

²⁶ ซาเบะ จะ_ ตูฮัด บรี ลาฆู ปานัย อากัน_ ลาฆู บรี ตาฮู_ ลาฆู ซูกา ฮาตี_ กะ ซือมียา นู กือนา เดะ ฮาตี นะ ตูฮัด. ตาปี โซะ ซือมียา บือดูซา_ ตูฮัด บรี ลาฆู กรือฌา_ นู ฆาโดฮ กือตับ_ ฆาโดฮ ปือมุน_ บีดา บรี กะ ซือมียา นู กือนา เดะ ฮาตี นะ ตูฮัด. นี เลอ_ ฌาดี ลาฆู เตด ตือตู ฌูฆา_ ฌาดี จะ_ ดูโดะ มากัด ซา อาเงน ฮอย นามา เลอ.