2 เทซะโลนิกา 2 - ซูรัจ ปือมือเลา นะ ตูฮัดซือมียา นู บือดูซา โตระ_ นะ มาแรฮ ปลีฮัจ 1 ดีบราดี เออ_ ปาซัน ลาฆู นู เยซู คริด_ ตูฮัด นะ กีตา_ นะ มาแรฮ ปูลัก เตอ_ นู กีตา นะ บือมุน บือซามา ฌางัน ญา เตอ_ กามี มีตา เดะ กาเญา กือมัซๆ จะ_ 2 ฌางัน บรี กาเญา มูดัฮ นะ ฆาโดฮ ฮาตี_ นะ ตือกือฌุจ_ กรานา ปือมือเลา นู มืองากู จะ_ “อารี นะ ตูฮัด ญา รอจ ดัฮ”. มีเซ จะ ฌาดี ลาฆู มือเลา ตูโดฮ เตอ_ ฌาดี ปือมือเลา มือญาเระ_ ฌาดี ซูรัจ โปด_ นู ซือมียา อีงัจ จะ_ ฌาดี ปือมือเลา นะ กามี เตอ_ ฌางัน ปือจายา เลอ. 3 ฌางัน บรี ซาปา มือเลา ปือมือเลา นามา_ นู ตีปู กาเญา. กรานา อารี นะ ตูฮัด นะ มาแรฮ_ ตาปี ดูลู เดะ อารี นะ ตูฮัด อีตู นะ มาแรฮ_ อาดา ซา วะตู_ นู โกะ ซือมียา บาญะ นะ ตีงัน ตูฮัด บูวัก_ นะ บือลาวัด ฌางัน ญา. วะตู อีตู_ ซือมียา นู บือดูซา โตระ อีตู_ นะ มาแรฮ ปลีฮัจ_ ฌาดี ซือมียา นู นะ กือนา ฌาฮานัม ซูโงฮ. 4 ญา เตอ_ นะ บือลาวัด_ นะ ตืองะ ญาวา ตะอาซิก_ บรี ฌาดี บือซัยํ เดะ นามาๆ โปด_ นู โกะ ลูมอฮ ซือมียา อีงัจ ฌาดี ตูฮัด นะ กูญา_ นู กูญา มือญือมัฮ เตอ. ญา นะ มาโซะ กะ บาลัย นะ ตูฮัด นะ ดูโดะ ปัจ อีตู_ นะ มืองากู จะ_ ญา เลอ_ ฌาดี ตูฮัด เดะ อาตัซ. 5 กาลา กู อาดา บือซามา ฌางัน กาเญา_ กู มือญาเระ ลาฆู อีตู กะ กาเญา ดัฮ. กาเญา จับ เตด บือเลฮ เฆอ? 6 กาเญา ตาฮู จะ_ เดะ วะตู อีนี_ อาดา ลาฆู นามา_ นู ซือกัจ ซือมียา อีตู. ตาปี ตานา รอจ วะตู ดัฮ_ ซือมียา นู บือดูซา โตระ ซีงี_ นะ มาแรฮ ปลีฮัจ. 7 ซาเบะ จะ_ ฮาตู ซีตัด ญา ตืองัฮ จูรี บือกรือฌา_ บรี ซือมียา บาญะ บือลาวัด ฌางัน ตูฮัด. ตาปี ซือมียา นู ซือกัจ อีตู_ ญา นะ ซือกัจ ลาฆี_ รอจ กะ วะตู นู ญา กือนา อาเมด บือปี ดัฮ. 8 วะตู อีตู เลอ_ ซือมียา นู บือดูซา โตระ อีตู ซีงี_ นะ มาแรฮ ปลีฮัจ. ตูฮัด เยซู นะ มาแรฮ ปลีฮัจ_ ญา นะ รือฆู อาเงน เดะ มูโลจ_ กือปุฮ ซือมียา อีตู_ ปี ฮาบิฮ บูวัก ดัฮ_ ญา นะ ปลีฮัจ นู บือซรี บือซายา_ นะ โปรฮ ซือมียา อีตู บรี ฌาฮานัม ฮาบิฮ ดัฮ. 9 กาลา ซือมียา บือดูซา โตระ นะ มาแรฮ เตอ_ ปือบูวัจ นะ ญา นะ ฌาดี ลาฆู บือกรือฌา นะ กือปาลา ฮาตู ซีตัด_ อาดา ฌางัน โกะ ปือนานา ซีดี_ นู มือฆัฮ_ นู ปือและ โตระ เตอ_ นู ฌาดี ลาฆู มืออูปัย ซือมูฮา. 10 ญา เตอ_ นะ บูวัจ ลาฆู ฌาฮัจ บาญะ_ นะ มืออูปัย ลูมอฮ ซือมียา_ นู นะ ฌาฮานัม_ ซาเบะ กูญา เตด ซูกา ลาฆู นู ซูโงฮ_ ตีเมา นะ ซาโมจ ลาฆู อีตู_ นู นะ ตูโลก กูญา บรี ฮีโดะ ลือปัซ บาฌิ. 11 นู ฌาดี กะฆีเตอ_ ซาเบะ ตูฮัด เดะ อาตัซ เตอ_ ญา บูวัจ ลาฆู มือฆัฮ_ บรี กูญา นะ ตูโรจ ฌาลัด นู ซือซัจ ซูโงฮ_ นะ ปือจายา กะ ลาฆู มืออูปัย อีตู. 12 กะฆีเตอ เลอ_ ลูมอฮ ซือมียา_ นู เตด ปือจายา กะ ลาฆู นู ซูโงฮ เตอ_ นู ซูกา ฮาตี นะ ตูโรจ กะ ลาฆู นู ฌาฮัจ เตอ_ กูญา ซือมูฮา นะ กือนา กรัจ ฮูโกบ_ บรี ฮาบิฮ เลอ. ลูมอฮ ซือมียา นู ตูฮัด ปีเลฮ ดัฮ_ บรี ลือปัซ บาฌิ 13 เออ_ โกะ ดีบราดี นู ตูฮัด ซายัก ดัฮ เตอ_ กามี กือนา บรี ซือลามัจ กะ ตูฮัด เดะ อาตัซ_ กรานา กาเญา_ ซือลาลู. กรานา_ ตะเดะ ลามูลา นูตู_ ญา ปีเลฮ กาเญา ดัฮ_ ญา บูวัจ บรี ซือมืองัจ นะ ญา ตืองะ กาเญา ดัฮ_ บรี ฌาดี ซือมียา จรัฮ บาฌิ นะ ญา_ บูวัจ บรี กาเญา ปือจายา กะ ลาฆู นู ซูโงฮ เตอ_ บีดา นะ บรี กาเญา นะ ฮีโดะ ลือปัซ บาฌิ. 14 กาลา กามี ปี มือญาเระ บรีตา นู บาฌิ กะ กาเญา เตอ_ ญา ปาเงน กาเญา_ บรี รอจ กะ ลาฆู ฮีโดะ อีนี ดัฮ_ นะ บรี กาเญา บือเลฮ บาฮาเฆด ฌางัน เยซู คริด_ ตูฮัด นะ กีตา_ เดะ นู บือซรี บือซายา นะ ญา. 15 กะฆีเตอ เลอ_ ดีบราดี เออ_ บรี กาเญา บือดีรี ตือตู_ ตูโรจ กะ ลาฆู นู กามี กีเรบ กะ กาเญา ดัฮ_ เตด จะ ปือมือเลา นู กามี มือญาเระ ดัฮ_ เฆอ จะ ปือมือเลา เดะ ซูรัจ นู กามี ฆาแรฮ โปด_ กือนา ตูโรจ เลอ. 16 กะฆีเตอ_ กามี บือซาโวจ กะ เยซู คริด ตะอาซิก_ นู ฌาดี ตูฮัด นะ กีตา เตอ_ บือซาโวจ กะ ตูฮัด เดะ อาตัซ_ อาโปก นะ กีตา_ ญา เลอ_ นู ซายัก กีตา ดัฮ_ นู ฮาลัย บรี ซือลามัจ กะ กีตา_ นู ปูโฌะ ฮาตี นะ กีตา ซือลาลู_ นู บูวัจ บรี กีตา จาดัก นะ ดาปัจ บือนา นู บาฌิ เตอ. 17 กามี มีตา บรี ตูฮัด นะ ปูโฌะ ฮาตี นะ กาเญา_ นะ บรี กาเญา อาดา ฮาตี กือฌะ กือมัซ_ บรี กาเญา นะ บูวัจ ลาฆู บาฌิ_ นะ มือเลา ปือมือเลา บาฌิ_ ซือลาลู. |