2 จรือตา 2 - ซูรัจ ปือมือเลา นะ ตูฮัด

ลาฆู ซียะ บูวัจ รูมัฮ มือญือมัฮ

¹ โซะ ซาโลมอน_ ญา ตือตู ฮาตี นู นะ บูวัจ รูมัฮ มือญือมัฮ บีดา ปือนามา นะ ตูฮัด บือซัยํ เดะ อาตัซ_ บูวัจ รูมัฮ นะ ราฌา บีดา ญาวา ตะอาซิก ฌูฆา.

² ซาโลมอน ญา ตือตู ดัฮ_ นะ บรี กะ ซือมียา ตูโฌฮ ละซา (70,000) อูรัก_ ฌาดี ซือมียา บราโกจ โกะ ซือบารัก_ บรี กะ ซือมียา ลาปัด ละซา (80,000) อูรัก_ ฌาดี ซือมียา ปาฮัจ บาตู เดะ โซะ อาตัซ บูเกะ_ ซือมียา ตีฆา รีบู นัม ราตุซ (3,600) อูรัก_ ฌาดี ซือมียา ตูงู ฮัจลีฮัจ กูญา อีตู.

³ ซาโลมอน ญา ฆาแรฮ ซูรัจ_ อาตัจ บรี กะ ฮีราม_ ราฌา นะ นังฆรี ทัยระ จะ_ “เกา บือเลฮ บือกรือฌา ฮาตี รือมัก_ ฌางัน ดาวิด_ ปะ เดะ กู_ ฌาดี จะ_ บือเลฮ อาตัจ กายู รู ซีดา บรี กะ ญา_ บีดา นะ บูวัจ รูมัฮ_ บรี ญา ดูโดะ. มีตา บรี เกา บูวัจ กะ กู ฌางัน ฮาตี รือมัก_ ซือรูปา กะฆีเตอ เลอ.

⁴ วะตู อีนี_ กู ฆามะ นะ บูวัจ รูมัฮ มือญือมัฮ_ บีดา ปือนามา นะ ตูฮัด บือซัยํ เดะ อาตัซ_ ตูฮัด นะ กู_ นู กู นะ อาเกะ ซรัฮ บรี กะ ญา_ บีดา นะ บือเลฮ ตูนู โกะ กือมียัน_ ฌาดี ซือบารัก บือบาวู_ โซะ ฮือลด มูคา นะ ตูฮัด_ บีดา นะ ตืองะ ตือโปก โรตี_ มือญือมัฮ ปี ซือลาลู_ บีดา นะ ตูนู มือญือมัฮ โกะ บือนาตัก_ วะตู ปาฆี ฌางัน วะตู ปะฮือญา_ เดะ อารี บราดู บือกรือฌา_ โซะ อารี บูลัด ญาแญะ_ เดะ อารี บรามัย นะ ตูฮัด บือซัยํ เดะ อาตัซ_ ตูฮัด นะ กามี_ นู ฌาดี ลาฆู ฮูโกบ บีดา ลูมอฮ อิซราเอน ปี ซือลาลู.

⁵ รูมัฮ นะ ตูฮัด_ นู กู นะ บูวัจ เตอ_ ญา บือซัยํ โตระ_ กรานา ตูฮัด นะ กามี_ ญา บือซัยํ โตระ ลือเบฮ เดะ โกะ บราลา ซือมูฮา.

⁶ ตาปี ซาปา เลอ นู นะ บูวัจ รูมัฮ มือญือมัฮ บีดา ตูฮัด บือเลฮ? ลาแงะ ฌางัน ลาแงะ นู ตีงี โตระ_ นะ อาดา ซาโมจ บรี ตูฮัด ดูโดะ_ ฮอย เตด บือเลฮ. กู ฌาดี ซาปา เลอ_ นู นะ บูวัจ รูมัฮ บีดา ตูฮัด_ ลือเบฮ เดะ บรี ฌาดี ตือปัจ ตูนู โกะ กือมียัน บือบาวู_ มือญือมัฮ โซะ ฮือลด มูคา นะ ตูฮัด?

⁷ ซาเบะ กะฆีเตอ_ วะตู อีนี มีตา อาตัจ มาแรฮ กะ กู_ ซืออูรัก นู ปานัย บือกรือฌา มัซ ฌางัน ปีระ_ โกะ มัซ ซือวะซา_ โกะ บือซี_ ปานัย เดะ ลาฆู โกะ กาเยด ซี แนบปริง_ ซี มีรัฮ ฮีตับ_ ฌางัน ซี ฮีเฌา_ ญา ปานัย เดะ ลาฆู จูแตก โกะ ซือบารัก_ บีดา ญา นะ บือเลฮ ดูโดะ ฌางัน โกะ ตูกัก นู ปานัย_ นู อาดา ดูโดะ ฌางัน กู_ เดะ นังฆรี ยูดา_ เดะ นังฆรี เยรูซาเลม_ ซือมียา นู ดาวิด_ ปะ เดะ กู_ ญา บือเลฮ ซียะ ตาโรฮ ดัฮ.

⁸ มีตา บรี เกา อาตัจ บรี กะ กู ฌูฆา_ โกะ กายู รู ซีดา_ ฌางัน กายู รู ดาโวด ตีฆา ลามัยํ_ ฌางัน กายู มีรัฮ ซา ฌือแนฮ_ เดะ นังฆรี เลบานอน. กรานา กู ตาฮู จะ_ โกะ ลูมอฮ ปราโซฮ นะ เกา_ กูญา ตาฮู ลาฆู กรัจ กายู เดะ นังฆรี เลบานอน. ลีฮัจ เลอ_ โกะ ปราโซฮ นะ กู_ นะ อาดา ดูโดะ ฌางัน โกะ ปราโซฮ นะ เกา_

⁹ บีดา นะ ซียะ กายู กะ กู_ บรี บาญะ_ ซาเบะ จะ_ รูมัฮ มือญือมัฮ นู กู นะ บูวัจ อีนี เตอ_ ญา บือซัยํ โตระ_ ปือและ ซูโงฮ เลอ.

¹⁰ ลีฮัจ เลอ_ โกะ ลูมอฮ ปราโซฮ นะ เกา_ นู นะ ปรูโตฮ โกะ ปูโฮด กายู เตอ_ กู นะ อาเกะ บรี กะ กูญา_ ฌาดี บรัซ ซาลี นู กาจะ ดัฮ_ ดูวา กรือลิ (2,000,000) กีโล_ บรัซ บาลี ดูวา กรือลิ (2,000,000) กีโล_ อาระ อางุน ปัจ อูรัจ (400,000) ลิด_ ฌางัน มีญะ ปัจ อูรัจ (400,000) ลิด.”

¹¹ กะฆีเตอ_ ฮีราม_ ราฌา นังฆรี ทัยระ_ ญา ตีกัฮ ฌาดี ซูรัจ_ นู ญา อาตัจ ปี กะ ซาโลมอน_ จะ_ “กรานา ตูฮัด บือซัยํ เดะ อาตัซ_ ญา ซายัก กะ ลูมอฮ ซือมียา นะ ญา_ กะฆีเตอ ญา บูวัจ บรี เกา ฌาดี ราฌา บือซัยํ_ เดะ อาตัซ ลูมอฮ กูญา.”

¹² ฮีราม ญา ตีกัฮ ปูลัก จะ_ “ซือลามัจ เลอ_ ตูฮัด บือซัยํ เดะ อาตัซ_ ตูฮัด นะ ลูมอฮ อิซราเอน_ นู บือเลฮ บือฌาดี ลาแงะ ฌางัน ดือนียา_ นู บือเลฮ บรี นานะ นู ปานัย อากัน ซืออูรัก_ กะ ราฌา ดาวิด_ ปือนอฮ ฌางัน ลาฆู ปานัย อากัน_ ลาฆู มาโซะ เดะ ฮาตี_ ญา นู นะ บูวัจ รูมัฮ อาเกะ มือญือมัฮ กะ ตูฮัด บือซัยํ เดะ อาตัซ_ ฌางัน รูมัฮ นะ ราฌา_ บีดา ญาวา ตะอาซิก.

¹³ “วะตู อีนี_ กู บือเลฮ อาตัจ ตูกัก บือกรือฌา_ นู ปือนอฮ ฌางัน ลาฆู มาโซะ เดะ ฮาตี_ ฌาดี ฮูราม-อับบี

¹⁴ นานะ กีลากี นะ นีบีนี ปาลัฮ ดาน_ นู ปะ เดะ ญา_ ฌาดี ลูมอฮ ซือมียา นังฆรี ทัยระ. ญา ปานัย เดะ ลาฆู บือกรือฌา_ โกะ บารัก นู ฌาดี มัซ_ โกะ ปีระ_ โกะ มัซ ซือวะซา_ โกะ บือซี_ โกะ บาตู อีตัด_ โกะ กายู. ญา อาดา ฌาดี ตูกัก ฌาเฮะ กาเยด ซี แนบปริง_ ซี ฮีเฌา_ โกะ กาเยด ซี มีรัฮ ฮีตับ_ ฌางัน กาเยด ลูลู ลือมัฮ. ญา อาดา บือกรือฌา ฌาดี ซือมียา จูแตก โกะ ซือบารัก_ ราตา ฌือแนฮ_ ญา บูวัจ ตูโรจ บือกะ จูตอ กะฮามี_ นู นะ บรี กะ ญา บูวัจ. ญา นะ กรือฌา บือซามา ฌางัน โกะ ตูกัก นะ เกา_ ฌาดี จะ_ ตูกัก นู ปานัย_ นะ ดาวิด_ ปะ เดะ เกา_ นู ฌาดี กือปาลา นะ กู เลอ.

¹⁵ ซาเบะ กะฆีเตอ_ ลาฆู โกะ บรัซ ซาลี_ บรัซ บาลี_ มีญะ_ ฌางัน อาระ อางุน_ นู เกา บือเลฮ มือเลา_ โอ กือปาลา นะ กู เออ_ บรี กะ เกา อาตัจ กะ ลูมอฮ นะ กู นู ฌาดี ปราโซฮ นะ เกา เลอ.

¹⁶ ลูมอฮ กามี_ นะ กรัจ กายู_ บือกะ นู เกา บือคานะ นะ อาเมด_ เดะ นังฆรี เลบานอน. กามี นะ บาวา มาแรฮ อาตัจ กะ เกา_ เดะ ราเกะ_ ฌาลัด ลาโวจ_ รอจ กะ นังฆรี ยาฟา_ บีดา เกา นะ บือเลฮ บาวา ญาแญะ ปี กะ นังฆรี เยรูซาเลม.”

¹⁷ กะฆีเตอ ซาโลมอน_ ญา บีลัก โกะ ซือมียา บักซา อาซิก ซือมูฮา_ นู อาดา ดูโดะ เดะ นังฆรี อิซราเอน_ ลือปัซ เดะ นู ดาวิด_ ปะ เดะ ญา_ บือเลฮ บีลัก ดูลู ดัฮ. อาดา ซือมียา ซืออูรัจ ลีมา ละซา ตีฆา รีบู นัม ราตุซ (153,600) อูรัก.

¹⁸ ญา ซูโรฮ บรี กะ ซือมียา ตูโฌฮ ละซา (70,000) อูรัก_ ฌาดี ซือมียา บราโกจ บารัก_ ลาปัด ละซา (80,000) อูรัก_ ฌาดี ซือมียา ปาฮัจ บาตู เดะ อาตัซ บูเกะ_ ตีฆา รีบู นัม ราตุซ (3,600) อูรัก_ ฌาดี ซือมียา ฮัจลีฮัจ_ นู นะ ปรือกัด โกะ ลูมอฮ ซือมียา บรี บือกรือฌา.