2 Tɛsalɔnɛ́ka 2 - Hɛtɔnyɛ́ Hiɔ́sɔ

Bɔkɔa ɔbɔ́á bɔ́ ŋɔ bɛ́kɛaka ubusíə́ ɔbɔ́á Isə́lúkú a ndáhiana

¹ Á bənísə́, ɔwɔŋgɔkɔnɔ nɛndahíáná nɛ́ yəsúə́ Isə́lúkú á Yə́susu Kilísitusu na níə́súə́ nɛtɔana ɔ ɔwayɛ́ ɛmɛ́ŋɛ́, tɔ ndɔ bənú lɛna ɔwá,

² ábá mɔndɔ a ná bənú lɛ́na ɔwá, hinó hɛ́ Isə́lúkú hɛ́ ná ndáfámá, hɛtányɛ́ hɛ́ lɛ fáhá ɔ uwənú ɔkátɛa, nɔ lɛ kɔlɔma, ata a ná bənú lɛ́na ɔwá yɛ́ɛ́yɛ́ ɛtambá yɛ́ nɔ́ húlínə na Huɛlɛ́, ata ɔ bɛ́báásɛ́á mbá ata bəsú tɔ ná bənú tílə́kínə, nɔ lɛ lumínə.

³ Mɔndɔ a lɛ bənú nímbə́ ata ɔ́ uníə́níə́ nindínə́, ɔ taká, bɔ́ɛ́yɛ́ buɔsɛ́ bɔ́ sɔ́ ŋɔ ndafámá ubusíə́ ɔbɔ́á bɛndɔ bəəŋí bá Huɛlɛ́ bɛsaŋɔna, ubusíə́ ɔbɔ́á mubəniə a fámálána, wɛ́ɛ́yɛ́ ɔwá Huɛlɛ́ a ŋɔ ə́mbinə ɔ hiwə.

⁴ Wɛ́ɛ́yɛ́ mubəniə a ŋɔ hɔalɛna, a sɛ́á a ná yatɛ́ yikimə yáyɛ́ná ɔyɛ́á bɛndɔ bá ndɔ lúbúnə, bá siəkínə́ tɔ́na ɛ́sɛ́á huɛlɛ́, a ŋɔ laa tɔ́na ɔwá a ná tiísi yɛ Huɛlɛ́ yayɛna, a ŋɔ kətúə́nə ɔ Tɛ́mbɛlɛ yɛ Huɛlɛ́ bɛ́múɛ́tɛ́, á bɛ́láá ɔwá wɛɛ́ya a lɛ́á Huɛlɛ́.

⁵ Mɛ ka bənú bɛ́ɛ́yɛ́ bɛkɔa lakɛna ɔ ikúílí ɔyɛ́á mɛ ná báá na bənú, nɔ ndɔ bɛɛ́ta bɛ́kɔ́lɔmɔna tɔ́ná əə́?

⁶ Isíŋáka nɔ ndɔ manya yatɛ́ ɔyɛ́á yɛ́ ná wɛ́ɛ́yɛ́ mubəniə halɛ́na ɔwá a lɛ ndafama, a ŋɔ fámálana ɔ ikúílí ɔyɛ́á Huɛlɛ́ a ná tínímíə́.

⁷ Ɔ́ niɔŋɔ́, wɛ́ɛ́yɛ́ ɔwá a lɛ́á bítímə́tɔ́, ɔwá a lɛ ndɔ hikiə a sɛ́á bá Huɛlɛ́ ɔ́ŋgɔ́kɔ, a lɛ ɔ buolí. Yɛ́ báka ɔbánɔ́ ɔwá, wɛ́ɛ́yɛ́ ɔwá a ná mubəniə halɛ́na, bá wɛɛ́ya bákɛ́á ɔkɛaka ɔwá, yáyɛ́á ɛnɔ́mɛ yɛ́ bíkúnə.

⁸ Nɔ́yɛ́, mubəniə a ŋɔ fámálana, Isə́lúkú á Yə́susu a ŋɔ wɛɛ́ya ɔ́nɔ na mulúkúlúku wɔ́ wə́yíə́ munuə, a ŋɔ wɛɛ́ya nímə́siə ɔ tɔ́mbákɛna na ɛsakɛsakɛ yɛ́ nɛ́áyɛ́á nɛndahíáná.

⁹ Ɛnáká mubəniə á ndáfámá, Sátana a ŋɔ wɛɛ́ya injiŋə índiə yɛ bɛkɔa ɔkɛa, a ŋɔ məndínə́ məkimə má bisə́mə́tə́ na bihə́nə́síníə́ bɛ́ bɛkɔa bɛ́ mənímbə́nə́ kɛaka.

¹⁰ A ŋɔ məndínə́ məkimə má bɔbɛ́á bɛ́kɛakɛna ɔkɛaka ɔwá, a bááyɛ́ nímbə́kə́ ɔbá bá lɛ́á ɔ ɛnɔ́mɛ yɛ́ bunímə́. Bá ŋɔ nímínə bɔkɔasɛ́á bá sa taká káha, bá sa mɛɛ́ta hikiə ɔyɛ́á yɛ́ ná báá ɔwá yɛ́ bəə́bu nuəkə́níə́.

¹¹ Ɔ́ ɛ́lɔ́áyɛ́ nɔ́yɛ́, Huɛlɛ́ a ndɔ bəə́bu injiŋə índiə ɔyɛ́á yɛ́ ŋɔ bəə́bu nímə́siə, yɛ́ ŋɔ kɛaka ɔwá bá lumínə á bɛkanja.

¹² Nɔ́yɛ́, Huɛlɛ́ a ŋɔ bááyɛ́ bəkimə sɔ́kɔ́tɛa ɔbá bá sa taká luminə, bá ná bɛ́ɔ́lɔ́kɔ́kɛ́na ɔ bɔbɛ́á.

Huɛlɛ́ a ka bənú tɛ́fa ɔkɛaka ɔwá a bənú núə́kə́níə́

¹³ Á bənísə́ ɔbá Isə́lúkú a ndɔ hikiə, tɔ ndɔ əsú Huɛlɛ́ mohóloniə uhíə́niniə ɔ ikúílí tɛ́á ɛlɔ́áyɛ́ ənú ɛ́sɛ́á tɔ ná hɔ́ánána ɔ nɔ́yɛ́ ɔkɛa bɔkɔasɛ́á, ɔ nɛbalɛ́ná nɛ́ misí, a ka bənú tɛ́fa ɔkɛaka ɔwá a bənú núə́kə́níə́, ɔ tɔ́mbákɛna na Umbúínyi Mɔnaŋanaŋa ɔwá wɔ́ lɛ́á uwənú mɛlɛ́má nuúmə́, ɔwá wɔ́ ndɔ bənú kɛndana, á bənú núə́kə́níə́ tɔ́na bɔkɔasɛ́á, nɔ ndɔ lumininə ɔ taká.

¹⁴ Ɔ́ ɛlɔ́áyɛ́ nɔ́yɛ́ Huɛlɛ́ a ná bənú ɛ́lɛ́ákɛ́na ɔ tɔ́mbákɛna na Imbə́nú Yɛɛsɛ ɔyɛ́á tɔ ná bənú nɔ́ŋɔ́nákɛ́na. A ka siəkə ɔwá nɔ fínə́ ɔ tuúmə tɔ́ yəsúə́ Isə́lúkú á Yə́susu Kilísitusu.

¹⁵ Nɔ́yɛ́, á bənísə́, nɔ́ tiŋímínə, nɔ́ bilə́líə́ tə́tə́níə́ ɔbɛ́á tɔ ná bənú hɔ́kɛ́na na bɛtambá mbá ata ɔ Mətilə.

¹⁶ Yəsúə́ isə́lúkú á Yə́susu Kilísitusu na Huɛlɛ́ ɔ yəsúə́ Isə́ ɔwá a ndɔ bəsú hikiə, ɔ tɔ́mbákɛna na yáyɛ́á iwə́mɛɛ́lɔ ɛlɔ́áyɛ́ əsú, á yə́súə́ mɛlɛ́má buhuhə bɔ́ ikúílíə́kimə índíə́, á kɛ́áka ɔwá tɔ́ ɛ́mɛ́nɛ́na ɔ ukusənə yatɛ́ ɔyɛ́á tɔ ndɔ táta.

¹⁷ Bá yə́núə́ mɛlɛ́má makɛ́nda índíə́, bá bənú iŋgínə́ índíə́ yɛ buɛsɛ ɔkɛa bikúílí bikimə na bɛtambá bɛɛsɛ ufə́mə́ləniə.