Kalge ɓil kefder seno
Sofoni maga yer kefder sen la diŋ je ni Kusi, moo Eskiyas maga jar ɗig ga diŋ waŋ no (1.1; 2 Waŋ 18.1). Ɗúu Sofoni de jag Hebre ga Sefaniya, wer ɓe ga Manwur hul doo we ne jar ti noga Manwur oo we ti jare.
Sofoni hay naa nen wããre ɓen ti sir Juda ti kal mani Josiyas je ni Amon, waŋ Juda, nen kiŋgi ma 609—604 go Taŋgu Biŋgi Yeso. Le go taŋgu sen mono, jar Asiri hay caa wo go see sir Juda sen nà de kal maga Manase wo de wel ɓe Amoŋ hay wo joŋ waŋ mono : Waŋre se ɓogn la hay joŋ wo diŋ fen ma de ɓlagge nen Manwur sagsag tuu (2 Waŋ 21.1-9, 19-22). Doo kay no so no, jar Juda wo ɓuy raw wo hã see ɓaara go goŋ wer sõõre mani jar dehãy ma honla wo ɓuy (1.4-5), bay wo hẽẽ Manwur meʼ wa so has ɓuy (1.6). Koɗge ɓaara, seele ɓaara wo de joŋre ɓaara kol wo go doo jar dehãy wo nono (1.8,9). Blam húulí Manase wo de Amoŋ mono, Josiyas kol ti waŋ day fer ʼwũy faage goŋge Manwur ti sir Juda wer wããre maga Hulda wãy ma ndar nen wããre Baan wo de Sofoni wãɗn wo mono (2 Waŋ 22—23).
Hm wããre mani Sofonin diŋ Wur mani Manwur no (1.2—2.3) de ngaɓge de (Amos 1; Jow. 2.1-14). Wur sen diŋ wur maga Manwur a ge de re ne jar Juda wo de ɓi leege Jerusalem wo ti wer maga a tob wo Manwur go, kol wo go cor sõõre wo mono. Daŋ ge go ti wur sen diŋ jar ma mbag maga fer wo ti see ɓaara gesiŋ pel Manwur mo tawa no (2.1-3). Wur mani Manwur a ge de re ne wer jar dehãy wo ti ɓuy lay : Ma nen wur bolawn wo (2.4-7), ma nen wur botoŋn wo (2.8-11), ma ɓaŋ wãybann wo (2.12), ma ɓaŋ gloŋhweden wo (2.13-15). Ane Manwur a ge nà ma joŋ bon jar tawa gà ama wer ɓil de el ɓe no, se cooge jiili jar dehãy wo yaŋ. Debaŋ yoo ɓaara tob ge wo sõõren wo yaŋ go day mbuɗ wo nen ɓaara yaŋ wo ti Manwuri day joŋ ge wo peele yaŋ ne hẽne, wosela le ɓil sir ɓe (3.9-10). De sen ni Manwur joŋ ge yaŋ ti holaŋ jar Israyel wo ma kay rage, ma yãã rage go, day saara fruy gi ɓil ɓe yaŋ go (3.12-20).
