SOFONI 3 - Tupuri Bible

Re ti Jerusalem

¹ Re ti ɓi leege ma ti graŋ ma de glubgi Day go de baa ɓil de jar joŋ bon kããran wo mono!

² Á bay laa jag jobo wa hase, bay dage ga liŋ se wa lay. Á bay kaŋ ɗiggi ɓe ti Manwur wa, bay yaʼ see ɓe see Baa ɓen wa.

³ Minisdir ma ɓil ɓen wo doo mingir maga wo ti roo tiʼ nono. Jar car kiida ɓen wo doo way-baa ma de law ga daʼ wo mo ma lorge de jag toŋ gà nono.

⁴ Jar ndar nen wããre ɓen wo diŋ jar ma bay blam wo. Jar lag cogob wo. Jar siɗ jag ɓen ɓoʼ wo foo fẽẽre ma bay ɗagn wo go, Sog wo jag liŋgin go wer de girgiri.

⁵ Ane Manwur ma keɗedn mbe ɓi leege ni, Á bay dĩɗ faage ɓen wa. Tum de jag toŋ se kaŋ mbe nen jar go ti mo ma de deele no. De sen ɓuy sõõre bay mbe joŋ je dĩɗ faagen wa.

⁶ Ndi hay taw wer jar po wo go ɓuy, Ndi hay mbug ngel gor ngel ɓaaran wo go, Ndi hay ɓlag faage ɓaaran wo go, jobo bay heege ni wa so. À frum ɓi leege ɓaaran wo go : Je tabay bay ɓil ɓaara wa, jar bay de tiŋ ni wa so lay.

⁷ Ndi hay ɗig so gana : Ndo hay joŋ hẽẽne ɓi we, Ndo hay yãã we ga liŋ mbe ndo no, Ndi de ɓlag ngel hayle ɓon go gà. Ama ndi kol go ma urgi de ɓe. Day bà mbe de sen ɓuy, jar ma ɓil ɓon hoo wo go ciŋ de jag toŋ mbuhu, Ma joŋge diŋ ɓlagge ti fen maga saara joŋ mo ɓuy no.

⁸ Kay diŋ jag Manwuri : Wer se no, gor we ndi ti wur maga ndi ur gi go ciŋ ti re ɓay mono. Werga ndi go de bag jag ɓe ɓil ɓi ga ndi tay wer jar wo le, Ndi tay sir waŋre wo le see ɓi ma bug baage põõ ɓin ne hara ti go de ɓil sõõge ɓi ma debaŋn ɓuy, werga wùu hun ɓin roɗ ge sirn go ɓuy.

Manwur coo ge wer jar wo yaŋ

⁹ Day ge mo so no, ndi fãã ge jag wer jar wo yaŋ go Nen maga a mo ɗe wo ɗúu Manwur ɓuy, mo Mo joŋ wo peele ne hẽn de tay jag boŋ.

¹⁰ Jar ɓi ma goŋ ndin wo de jar ɓi maga wo wo go de dusgi Á ge wo yaŋ le de mo ma hãge ne ndin le faale maarog ma de pããge ma Etiyopin wo le hãã.

Jar Israyel maga gwaʼ ge wo mono

¹¹ Ti wur sen mono, sõõre joŋ ndo ge ti joŋre ɓo Maga ndo hay joŋ ra mo ɓuy de ɓlagge gà so hase. Á joŋ ge ndo ti debaycõõre ɓo maga ndo hay joŋ ra see ɓi mo gà has lay. Werga, ndi nii gi jar ma ɓil ɓo maga keɗ wo see ɓaara de farge ti ciŋ wo yaŋ go, Day ndo men ge keɗ see ɓo yaŋ go ciŋ ti húulì ɓi ma bay ɗag no.

¹² Ndi men ge ɓil ɓo ni nà diŋ jar maga fer wo ti see ɓaara gesiŋ, Diŋ maga wo de hugli ga day yoŋ ge wo ɓaaran wer ɗúu mani Manwurn mono.

¹³ Jar Israyel maga gwaʼ ge wo dĩɗ ge wo faage ɓaaran gà so. Á car ge wo geteʼ gà so, day à daʼ ge hila po le jag ɓaara gà so lay. Sen nà de maga a daʼ ge wo ngel koɗge ɓaara wo we de ngel iggi ɓaara mono. Day jobo ma duɗ rage joŋ ge gà so has lay.

Baa fer yaŋ ʼwũy Jerusalem

¹⁴ Jag ɓo mo caa mbe feg so, may ma Siyoŋ no! ʼWad we mbay war de fruygi so nday jar Israyel no! Fruy mbo so, feg mbo le go ɓil ɓo tem so, Ndo may ma Jerusalem no!

¹⁵ Manwur maŋ jag reen wo we go mo ti, Á haw nen je hee ɓon we wo go. Manwuri, waŋ ma Israyeln yaŋ ɓil ɓo, Ndo bay maga ndo joŋ hẽẽne re po ga caa ge mo wa so hase.

¹⁶ Ti wur sen mono, à wii gi jar Jerusalem wo yaŋ ga : Joŋ we hẽẽne wa so! Siyoŋ, daga doo ɓo mo hrag wo mo go wa so!

¹⁷ Manwuri, Baa ɓon yaŋ ɓil ɓo diŋ blum durgi ma yãɗ jar no. Ɓil ɓe joŋ ge yaŋ go feh feh nà diŋ wer ɓo. Á fer ge go baʼ wer dage maga se da ndo mono. Jag ɓe caa ge feg go debaŋ nà diŋ wer ɓo.

¹⁸ Ndi fer ge yaŋ yãã jar maga wo nen lawge ga wo wo go hãã see fruygi fewn wo mono, Jar se maga hay wo wo go de tiŋ hãã hãã see ɓo, Day sõõre de kaŋge ne hara ti doo fen põõre no mono.

¹⁹ Ko ga ti wur sen ndi joŋ ge jar ma hã lawge ne ndon wo yaŋ go de gùri. Ndi yãã ge je maga leŋ yaŋ go day ndi fer ge yaŋ le haw nen maga à hay niin wo go mono. Ndi joŋ ge yaŋ ga à mo kee ra jage, Ɗúu ɓaara mo ra go ti tamsir maga a wo le nen sõõre ni mo ɓuy no.

²⁰ Ti wur sen mono, ndi fer ge nday yaŋ le. Sen joŋ ge nà diŋ wur maga ndi tayge ti ɓay le mono. Werga ndi joŋ ge yaŋ ga ɗúu ɓay mo ra, Day à mo kee nday jag go yoo jar ma ti tamsir wo. Sen nà de maga ndi fer ge jar ɓay maga wo wo go de hooge ti daŋgay Wo le de nen ɓay tiʼ mono. Wããn diŋ Manwuri.