SOFONI 1 - Tupuri Bible

¹ Wããre maga Manwur wããn ne Sofoni je ni Kusi, je ni Gedaliya, je ni Amariya, je ni Esekiyas ti kal mani Josiyas je ni Amoŋ waŋ sir Judan mono.

Manwur caa ge kiida tamsiri

² Ndi caa ge wer fẽẽre ma ciŋ ti sir la wo go ɓuy. Kay diŋ jag Manwuri.

³ Ndi caa ge wer jar tabay wo de nàyre wo go. Ndi caa ge wer dweere ma ciŋ wo de cẽẽ ma nen maarog Wo go de fẽẽre ma mbar ɓaale jarn wo de jar ɓlaggen wo. Ndi caa ge wer jar téebeere wo go ciŋ ti sir la. Kay diŋ jag Manwuri.

Manwur a ge de re ne Juda wo de Jerusalem ti

⁴ Ndi maŋ ge doo ɓi yaŋ ciŋ see sir Juda wo de jar ma ɓi leege Jerusalem wo. Ndi taw ge te sõõ Baal maga gwaʼ wo yaŋ go ti ngel lam go De ɗúu jar cor ge ɓen wo de jar siɗ jag ne hẽn wo.

⁵ Jar se maga leɗ wo monɗra ciŋ ti tiŋ ne fẽẽre ma nen ngel ma ciŋ wo, Leɗ wo monɗra day haʼ wo de Manwuri, Ni paga saara de haʼge de waŋ ɓaara lay mono,

⁶ Jar se maga hay mbuɗ wo faale go ne Manwuri, Bay wo kiɗ Manwur wa, day bay wo wii jag ɓe ti mo po wa lay mono.

⁷ Lag we seɗem pel Waŋkluu Manwuri! Werga wur mani Manwurn go de kosge, Manwur go de ʼwũy siigi jag ɓe no, Á go de fãã jar maga se de ɗe rage mono.

⁸ Ane ti wur siigi jag mani Manwurn mono, Ndi ur gi de waŋren wo de weere waŋren wo, De jar maga her wo õõbe ma waare wo ti mo ɓuy.

⁹ Ti wur sen mono, ndi ur gi yaŋ de wosela ɓuy Maga yor wo go ne diŋdiŋ jag tiŋn ti mo ɓuy, De jar maga bag wo tiŋ mani je wãã re ɓaaran go de debaycõõre wo de hram mono.

¹⁰ Kay diŋ jag Manwuri : Ti wur sen mono, à laa ge roo yaŋ le jag faage cẽẽn wo. À ʼwad ge war yaŋ ɓi leege ma defay no, Re ma kluu caa ge húulì ma lublubn wo yaŋ.

¹¹ Hrag we roo, nday jar ma Maktes no! Werga, jar ma ti sir Kanaan wo go de yeege ɓuy, Day à caa wer jar maga solay de raw egre ɓaara wo we go.

¹² Ti wur sen mono, ndi kiɗ gi Jerusalem go de lampa wo, Ndi ur gi yaŋ de jar maga wo mbaara de hulgi ne jããre ɓaaran wo ti tiʼ tiʼ i, Day wãã wo le ga : Manwur bay joŋge de el wa lay bay joŋge de ɓlagge wa lay mono.

¹³ À ɓlag ge horog ɓaaran wo go, Tiŋ ɓaaran joŋ ge wo yaŋ go nen lawge. Á bor ge wo tiŋ wo yaŋ day saara lag ge ɓil ɓaara gà. Á peɗ ge wo tlalum yaŋ day saara jo ge yii ɓen ge gà.

Wur mani Manwur no

¹⁴ Wur ma kluu mani Manwurn go de kosge, a go de kosge. Á le go mbaŋ ma age. Blumrin laan wo mokay raw wo mbaara jaw war tuu tuu.

¹⁵ Wur sen diŋ wur baage põõ, diŋ wur re wo de coocoo, Diŋ wur frumgi wo de ɓlagge fẽẽre wo. Wur ma de suŋgu wo de ngel suŋ. Wur caage swaare ciŋ wo de sãy ma debaŋ.

¹⁶ Á diŋ naw maga à ʼwad ge cõõ wo de war ne ɓi leege ma de kor tin wo ti, Ne ngel gor ngel ma de gẽẽren wo ti.

¹⁷ Ndi kol ge jar tabay wo yaŋ go nen lawge, day saara see ge yaŋ go doo jar rẽwre wo nono Werga a hay joŋ wo ɓlagge see Manwuri. Cíi ɓaara kaa ge yaŋ go doo ɓurgi nono. Này ɓaara dus gi yaŋ go doo jããre nono.

¹⁸ Solay ɓaara noga boo biŋni ɓaaran kãã ge wo ma yãã rage go draʼ Ti wur baage põõ mani Manwurn gà. Tamsir ɓuy roɗ ge yaŋ go wer hun ɓe ma de tuu no, Werga a joŋn ge diŋ gaɓri ma kluu ti wur maga a taw ge jar ma ti tamsir wo go ɓuy mono.