NEHEMI 2 - Tupuri Bible

Nehemi daʼ faage ma woge Juda

¹ Nen few Nisan nen kiŋgi ma de doo ɓog maga waŋ Artagserses de ma joŋ waŋ mono, yii hay pel ɓi taʼa, ndi raw maŋ yii no, ndi raw hãge ɓe ne waŋ. Ndi hay wo ti boŋ pel waŋ de lawge doosen no gà hase.

² Waŋ day riŋ me ga : Wer mayse ga nen ɓo de swĩdgi la? Ndo bay po de cegè wa lay, á joŋ nà diŋ re po le de cee moge ɓil so lay no.

³ Ndi kal ferge ne waŋ ga : Daga waŋ mo hay mbe ciŋ caw tum! De maga ɓi leege maga tipaale pããre ɓi wo le ni go de mbuggi day jag tiŋ ɓen wo go de roɗge de wùu lay mono, nen ɓi swĩd gà nà swĩdgi la?

⁴ Waŋ day riŋ ndi ga : Ndo wii cwãy nà diŋ mayse mo so la? Ndi raw tos Baa ma ciŋ no,

⁵ day ndi raw ferge ne waŋ ga : Hayga á coo we jag waŋ, day wejõõ ɓon coo we jag ɓo lay no, ɓoʼ me wo ti sir Juda, wo ɓi leege maga tipaale pããre ɓi wo wo ni mono, nen maga ndi fer booge ɓe.

⁶ Waŋ maga wãy ɓen hay ti jeŋ ɓe ni kal riŋ mege so ga : Raŋge ɓon maŋ ge naw nà gãyla? Day ndo fer ge le nà hunla? Se raw coge jag waŋ ma men ndi rawge, day ndi raw ngaɓ naw ne hẽne.

⁷ Blam ɓe ndi raw riŋ waŋ ga : Hayga á coo we jag waŋ no, daga à mo hã kefder wo ne ndi doo ne jar wãã re progre maga wo wo go faale maarog ma de pããgen mono, nen maga á mo men wo ndi woge hãã wo go ti prog ma Juda no,

⁸ à mo hã kefder wo ne Asaf je gor ti yooway mani waŋ no, nen maga á mo hã koo ne ndi ma herge jag tiŋ ma de egre ma ti jeŋ tiŋ Baa no, ma herge ti kor ma ti ɓi leegen wo de tiŋ maga ndi wo ge hayge ɓil ɓe mono. Waŋ raw hã rage ne ndi werga doo ma de el mani Baa ɓin hay kayge wer ɓi.

⁹ Ndi raw woge see jar wãã re progre maga wo wo go faale maarog ma de pããgen mono day ndi hã leeder mani waŋn wo ne hara. Waŋ hay laa jar kluuri sooden wo de jar piiri wo kaŋ mege.

¹⁰ Saŋbalad je Horoŋ wo de Tobiya je Amoŋ wejõõ ɓen wo wo laa re sen mokay ɓil ɓaara raw cee rage debaŋ ti maga jobo a le ma woo jar Israyel wo mono.

Nehemi a go Jerusalem

¹¹ Ndi raw age Jerusalem, ndi kal joŋ naw ni swaʼa.

¹² Blam ɓe ndi raw urgi go ciŋ de suŋ de jar wer mbage, bay riŋ jobo de fen maga Baa ɓin hay wãã me jiili ga ndi mo joŋn see Jerusalem mono. Horog ma de balge po hay bay doo ɓi ni wa, diŋ này maga ndi hay ɗidgi ɓe mo tawa tuu.

¹³ Ndi raw kalge go de suŋ ti jag tiŋ ma ti Por no, de kaŋ ti ɓi ne gedel Barkag no, ne jag tiŋ Rumgi no, de ko kor ma ti Jerusalem maga go de nduɗ ywaale wo de jag tiŋ ɓe maga wo go de roɗge de wùu mono.

¹⁴ Ndi raw heege ti jeŋ jag tiŋ Gedel no, ti jeŋ mangloŋ mani waŋ no ndi la daʼ ngel kalge de này maga ndi hay de ɗiigi ɓe mo gà.

¹⁵ Ndi kii go de suŋ ni ɓil pyew no, ndi kal er kor no. Ndi raw kalge le nen liŋ ti jag tiŋ ma ti Por no, day ndi fer le nà doo kay no so no.

¹⁶ Jar cag kiida ma ɓi leege hay ko wo bà ga ndi hay le nà genla, noga ndi hay joŋge nà mayla gà hase. Bà de sen ni ndi hay bay de wãã mopo ne jar Jwif wo, ne jar siɗ jagn wo, ne jar kluurin wo, ne jar cag kiidan wo de te jar maga hay wo de joŋre po doo wo meʼ draʼ wa ɗa.

¹⁷ Ndi day riŋ ra so ga : Nday yaŋ de ko re maga naa nen ɓe mono! Jerusalem go de mbuggi day wùu go de roɗ jag tiŋ ɓen wo! A we le, naa fer boo kor ma ti Jerusalem no, ni naa joŋ ge nen sõõre gà so.

¹⁸ Ndi raw sii maga doo ma de el mani Baa ɓin hay kay wer ɓi nà kayge la ne hara, ndi sii wããre maga waŋ hay wãã ra me ne hara lay. Saara day ga : Naa hoo go ciŋ day naa boo we! Day saara raw teŋ nen see ɓaara ma lagge ti wããre se ma de el maga saara ɗign mono.

¹⁹ Saŋbalad je Horoŋ no, Tobiya je Amoŋ wejõõ ɓen wo de Gesem je Arab wo wo laage ɓe mokay raw wo fegge ti wùri, ɓoʼ wo foo wùr go. Saara gana : Nday joŋ nà mayse la? Nday joŋ ti graŋ go see waŋ yawla?

²⁰ Ndi raw ferge ne hara doo kay nono gana : Baa ma ciŋn kay yaŋ mbe maga wùr mo sii ti. Wùr weere jõõre ɓen wùr hoo ge go ciŋ day wùr boon ge yaŋ. Ama nday ma ɓay nen mo ɓay, daʼge ɓay noga ɗiggi ɓay po bay ti Jerusalem meʼ wa hase.