MISE 2 - Tupuri Bible

Re ti jar debaycõõren wo

¹ Re ti jar ma ɗig debaycõõren wo ga ʼwũy wo ɓlagge Le go ti ɗeere ɓaara hãã mono. Ngel tee le go mokay saara leʼ joŋge ɓe tuu Werga egre ɓaara de kããge ma joŋge ɓe.

² Nen ɓaara slag ti payre wo day saara yãɗ ra, Ti tiŋ wo day saara horge ra go. A joŋ wo bon wel biŋnin wo de tiŋ mani ɓe no, Joŋ wo bon je twarn wo de fẽẽre ɓen wo.

³ Diŋ wersen Manwur wãã so ga : Ko we ga ndi de ɗig re po ti wer jar sen wo. Nday naa ge ti ɓay go gà lay, nday hoo ge ti ɓay go ciŋ de maga nday leʼ ge seele mo gà lay werga á diŋ wur re.

⁴ Ti wur sen mono, à ʼwad ge mbaa yaŋ de ɓay, À ʼwad ge siŋ lawge yaŋ, day à wãɗ ge yaŋ ga : À frum naa we go ɓuy! Á hã nen fen mani jar ɓin wo go ne jar po wo! Koɗa la, á yããn go doo ɓi! Á ɓes payre naan wo go ne jar ma ti graŋ wo mo ɗala!

⁵ Diŋ doo kay no so no ndo daʼge jobo yoo tayge jar mani Manwurn wo deŋ ɗaw jag saale ma ngaɓ pay ne jar gà so.

Re ti jar giŋ jar wãɗ wããre Baan wo

⁶ Á wãɗ ge wo yaŋ ga : Bag keɗeg keɗeg ɓo se deŋn ne wùr wa! Daga jobo mo wãã jag loɗge ma doosen no kay wa! Ɗargen baa wo nà wara la gà!

⁷ Mayse faɗ tiŋ mani Israyeln go la? Manwur nà ig hoo ɓil nen ɓaara gà yawla? A joŋ mbe tum nà doosen no yawla? Ndi wãã wããre ɓin wo nà bay ma kaŋ je ma de deelen ti doŋ wa yawla?

⁸ Ɓaa mbe le tuu à de caa hee de jar mani ɓin wo. Nday ndar õõbe ma kluuri wo go ne jar maga fer wo le jag jaw go de yõõ ti ti.

⁹ Nday niɗ naare mani jar ɓin wo go see tiŋ ɓaara maga saara da ra mono. Nday yãã togoɗge maga ndi hay hãn ne weere ɓaaran wo ma tum go.

¹⁰ Hoo we go ciŋ, raw we so! Werga, sir ma taʼ la bay diŋ ngel iggi wa. Wer maga á go de demge mono, Se kaŋ ge bon yaŋ ne jar ti, diŋ bon ma debaŋ

¹¹ Jobo a we wãɗ wããre ma nen leege noga car geteʼ ga : Ndi da ndalge de ɓay ti yii wo de fẽẽre ma taɗ jar wo no, Je ma doosen no kay diŋ je maga nen age sii wããre ne jar sen wo lam so no.

Manwur fer ge tay jar ɓen wo no

¹² Kidolgi ndi fer ge yaŋ le tay ti Jakob wo le ɓuy. Kidolgi ndi fer yaŋ le domoʼ ti ɓay nday jar Israyel maga nday gwaʼ ge mono. Ndi fer yaŋ le tay rage doo sããre ma ɓi glaŋ po wo boŋ nono. Ngarge jag ɓaara raw ge ma je tabay yaŋ go ciŋ.

¹³ Je ma far laɓ go ne hara peln de kalge pel ɓaara. Á laa wo ti ywaale, laa wo jag tiŋ day laa wo go. Waŋ ɓaaran de seege pel ɓaara, Manwur diŋ je ma ti ɓaara no.