MARK 5 - Tupuri Bible

Yeso nii sõõre wo go ne jobo ti

¹ Blam sen, á raw wo age faale maarog ma Galile, ɓi sir jar Jerasen wo.

² Yeso wo ɗiigi le go ɓi daagen mokay, ni tuuseŋ jobo raw kalge le go yoo tipaale wo, raw caa pel ɓe. Bloo sen de sõõ ti,

³ á naa yoo tipaale wo. Jobo bay de kããge ma saʼge ɓe wa, hay bo de receʼe.

⁴ Á ɓoɗ gyam ne hẽne, saɗ doo ɓe de receʼe ɓaale pur debaŋ, de sen ɓuy, se hrag gyamn go, car receʼn go lay. Ama jobo bay de kããge ma bagge ɓe wa.

⁵ Tum, de ceeg, de suŋ, á raŋ yoo tipaalen wo, ti húulìn wo ngar jage, krig see ɓe de húulì.

⁶ Á raw ko Yeso le hãã caw, raw caa pel ɓe le de ɗee raw leʼ monɗra pel ɓe,

⁷ á raw ɗe Yeso de gẽẽge kloŋ ga : Re mayse ti yoo naa la, Wel Baa ma ciŋ no. Ndi kam mo de ɗúu Baa, joŋ bon ɓi wa ɗa la.

⁸ Á wãã sen werga Yeso ɗe sõõn ga sõõn mo kal go, mo men bloon go.

⁹ Yeso raw wii bloon ga : Ɗúu ɓo gahãyne? Á raw ferge ne hẽn ga : Ɗúu ɓi ga ngaɓa, werga wùr puri.

¹⁰ Á raw wo kam Yeso debaŋ ga á mo nii saara wo go see sir sen la hãã wa.

¹¹ Gaduuru yaŋ wo koɗge ti jeŋ húulì ni ngaɓa tiʼ i.

¹² Sõõren raw wo kam Yeso ga : Laa wùr wo se gaduurun wo, maga wùr mo wo laa ge ɓil ɓaara.

¹³ Yeso raw men faage ne hara lay. Sõõren raw wo laage le go, raw wo laage ɓil gaduurun wo, gaduurun wo ɓuy nen ndar ɓoge, á raw wo hoo temge le ciŋ ti húulìn laage go nen maaroge, hã wo bii go nen maarogn ni ɓuy.

¹⁴ Jar ma koɗ ragen raw wo maʼ ɗeere wo riŋgi ɓi leege de progren wo. Jar raw age ko re sen lay.

¹⁵ Á raw wo age ɓiŋ Yeso, ko bloo maga hay de sõõre ti ngaɓa, de hayle de õõbe ti yeʼ de daʼ see ɓe. Hẽẽne raw joŋ rage debaŋ.

¹⁶ Jar maga hay ko wo re sen, raw wo fer blam wããre maga joŋ bloo wo de gaduurun ne hara.

¹⁷ Blam sen, á raw wo joŋ kam kam ne Yeso ga á mo men sir saaran go.

¹⁸ Yeso de ɗii daagen mokay, bloo maga hay de sõõre tin raw wiigi ɓe ga á mo men se woge wer ɓe lay.

¹⁹ Yeso laa hã faage ne hẽn gà ama á raw riŋgi ɓe ga : Fer liŋ ɓiŋ jar ɓon wo, riŋ ra de wããre maga Waŋkluu joŋ mo de ɓe mono wer koge decoo maga á ko decoo ɓo mo ɓuy no.

²⁰ Bloon kal rawge, raw sii wããre maga Yeso joŋ ne de ɓe go ne jar ma ɓi sir Dekapol wo. Jar ɓuy raw wo ngrisgi ti wããre se no.

May ma Jayrus wo de wãy ma duʼ õõbe Yeso no

²¹ Yeso fer cegaɗge go faale maarog ma Galile. Jar raw wo tayge le ɓiŋ ɓe ngaɓa debaŋ, á raw ooge ti jeŋ bii no.

²² Jobo yoo waŋre ma wãã re tiŋ ma tosgen wo, à ɗen ga Jayrus raw age, raw ko Yeso, raw leʼ monɗra pel ɓe,

²³ raw joŋ kam kam ne hẽn ga : May ɓi ma klee go de huugi, a le kaŋ doo ɓo ne hẽn ti ga á mo pẽẽ go, mo hay tenene.

²⁴ Yeso raw kaŋ ti wer ɓe, jar raw wo naage wer ɓe ɓuy, cwẽɗ wo ne ɓaŋla lay ɓaŋla lay.

²⁵ Wãy po yaŋ ni de gayge go doo yuu way wer kiŋgi hwal ti ɓoge.

²⁶ Á gay go doo woge see dogtor wo debaŋ, ray solay go ne hẽn doo ɓuy lay. De sen ɓuy, se bay joŋge ɗawa wa, cege ɓen yaʼ ciŋ ni daŋ ma taŋgun yaw.

²⁷ Day á raw laa wããre Yeso, raw age le yoo ngaɓan nen faale ɓe, raw duʼ õõbe ɓe no.

²⁸ Á wii de ɓil ɓe ga : Hayga ndi duʼ mbi õõbe ɓen we tawa, ni ndi pẽẽ yaŋ go.

²⁹ Way ɓen raw hooge go tuuseŋ lay, á raw koge ga cege sen men se we go.

³⁰ Ni tuuseŋ, Yeso raw koge ga egre po kal we le go see se. Á raw ngiɗ nen ɓe wo ne ngaɓan ti, raw riŋ rage ga : Wose duʼ õõbe ɓin lam ɓa?

³¹ Jar ma wer ɓen raw wo riŋgi ɓe ga : Ndo de koge ga ngaɓan de srog moge mo deŋ, ndo fer wiigi pa ga wose duʼ mo la la jag ẽẽ ne?

³² Ama Yeso raw raŋ nen go ti ɓe ɓuy ko je maga joŋ re sen mono.

³³ Wãy raw daɗge de hẽẽne werga á de ko fen maga se joŋ see ɓe mono. Á raw age leʼ monɗra pel Yeso, raw siɗ wer wããre maga se duʼn ti ɓe go ne hẽn ɓuy.

³⁴ Yeso raw ɗege ɓe ga : May ɓi no, hãge see ɓo ne ndin pẽẽ ndo we go. See mbo de woore so, cege sen fer joŋ moge gà so.

³⁵ Yeso de wããge doosen deŋ ɗa, jar soole raw wo age le liŋ ni Jayrus wiigi ɓe ga : May ɓon go de húulí. Gay Waŋ wa so.

³⁶ Wããre sen wo leʼge ne Yeso sug mokay, á raw riŋ Jayrus ga : Joŋ hẽẽne wa hase, hã mbo see ɓo ne Baa tawa.

³⁷ Yeso laa men jobo wo maŋ blam ɓe gà say diŋ Piyer, Jag wo de hẽn ɓe Jaŋ.

³⁸ Á raw wo nduugi liŋ ni Jayrus, Yeso wo daʼ jar glumgi, de roo, de ngarge jag debaŋ deŋ.

³⁹ Á raw kalge tiŋma, raw wii rage ga : Ɓa nday ɓayn glum glum de roo le ɓa? Mayn bay de húulí wa, á leʼ diŋ naa.

⁴⁰ Á raw wo fegge ti ɓe. Á raw nii rage le go siigi ɓuy, raw hoo pan mayn wo de man may no, de jar ma wer ɓen wo, raw wo laage ɓi tiŋ maga mayn de ɓoʼge ni mono.

⁴¹ Á raw maŋ doo mayn go ciŋ, raw ɗege ɓe ga : Talita kumi, wer ɓe ga : May tigli, ndi de riŋ ndo, ur go ciŋ.

⁴² May tiglin raw urgi go ciŋ tuuseŋ, kal rawge seege. (Kiŋgi mayn go hwal ti ɓoge.) Jarn wo wo koge doosen mokay, hẽẽne raw joŋ rage debaŋ.

⁴³ Ama Yeso raw wii rage go pah ga : Sii we re sen go ne jar wa, blam sen á raw wii rage ga : Hã we rege ne hẽne.