MARK 3 - Tupuri Bible

Bloo ma doo de húulí

¹ Blam sen Yeso fer kalge ɓi tiŋ tosgen pa. Jobo yaŋ ni, doo ɓe go de húulí.

² Jar ma tiŋman ni raw wo lagge cegeɗge ɓe ga á bir doon yaŋ go wur Saban yawla, ni saara mo kii wããre ne hẽn ti.

³ Yeso raw riŋ bloo ma doo de húulín ga : Ur go ciŋ, oo go pel jar deŋ ɓuy.

⁴ Blam sen á raw riŋ rage ga : jag liŋgi de wii naa gahãy ɓa? Ga joŋ de el wur Saban yaw, noga joŋ diŋ ɓlagge? Ga pẽẽ jobo yaw, noga ʼwarn go? Ama á laa wo fer wããre ne hẽn gà.

⁵ Yeso raw ko rage ɓuy, ɓil ɓe raw sõõge ti ɓaara, raw rage nen ɓil ɓe debaŋ wer ɗiggi ɓaara ma de ɓlagge no. Á raw riŋ bloon ga : Yaʼ doo ɓo le. Bloo raw yaʼ doo ɓe le, doo ɓe bir go de ele.

⁶ Farisiyẽẽ raw wo laage go siigi, raw wo rawge ɓoʼ faare ti yoo ɓaara de jar ma wer Herodn wo ga saara mo ʼwar Yeso go.

Jar ngaɓa debaŋ a wo see Yeso

⁷ Yeso raw age de jar ma wer ɓen wo nen jag maarog ma Galile. Jar raw wo maŋ blam ɓe debaŋ pa. Jar sen a wo le ɓi sir Galile de Jude,

⁸ Jerusalem, ɓi sir Idume, de sir ma faale Jurdẽẽ wo, de sir ma ɓiŋ ɓi leege Tir wo de Sidoŋ. Ngaɓa sen raw wo age ɓiŋ Yeso, werga á laa wo wããre fẽẽre maga á de joŋ rage mono.

⁹ Yeso raw riŋ jar ma wer ɓen wo ga : Kiɗ we daage le me, ndi raw go, ngaɓan mo cwẽɗ wo ndi wa.

¹⁰ Á raw pẽɗ jar cege wo go debaŋ, wersen jar cege raw wo leʼ tem ge le see ɓe debaŋ maga saara wo duɗ see ɓe.

¹¹ Jar ma de sõõre tin wo wo ko Yeso mokay, á raw wo leɗ monɗra ne hẽn pele, raw wo ngar jag ga : Ndo diŋ Wel Baa, ndo diŋ Wel Baa.

¹² Yeso raw ruu rage, raw far jag ɓaara go ga á mo ɓoɗ wo wer se go wa.

Yeso hoo jar peele ɓe hwal ti ɓoge

¹³ Blam sen Yeso raw ɗiigi ciŋ ti húulì, raw ɗe jar maga ɓil ɓe da ra le see ɓe, á raw wo age see ɓe lay.

¹⁴ Á raw hoo jar peele ɓe yoo ɓaara hwal ti ɓoge, á far ra maga á mo lag wo ɓiŋ se, se lag ra ma siɗ wããre Baa,

¹⁵ á raw hã egre ma niɗ sõõre wo go ne hara lay.

¹⁶ Ɗúu jar maga á hoo ra lam taʼ no, Simoŋ (Yeso kaŋ ɗúu hẽn ga Piyer.)

¹⁷ Jag wo de wegeman ɓe Jaŋ, jar ni Sebede wo (Yeso kaŋ ɗúu ɓaara ga : Bwanerje, wer ɓe ga weere ma de maŋ car ge põõ Baa),

¹⁸ Aŋdre, Filip, Bartelemi, Matiye, Toma, Jag jee ni Alfe, Tade, Simoŋ wel ma de oo le ti jar sir ɓe ngiŋ no,

¹⁹ wo de Judas Iskariyod, je maga kaŋ taw Yeso go ne jar hee ɓen wo mono.

Kawre Yeso wo ga saara wo baa Yeso le liŋ

²⁰ Yeso raw ferge le liŋ. Jar fer tayge le ni ngaɓa pa, Yeso wo de jar ma wer ɓen laa wo daʼ nen ma rege seŋ gà so doo ngaɓa no.

²¹ Kawre Yeso wo wo laa sen mokay, á raw wo laa ge le go ga saara wo baage ɓe. Á hay ɗig wo ɓaaran ga á loɗ go.

Yeso wo de Belsebul

²² Jar ma ndar wer wããre Baa a wo le Jerusalem raw wo riŋ kããra ga : Á de Belsebul ti (diŋ Manhúulí). Jar ma la wãã wo ga : Je ma hã egre sen ne hẽn ma niɗ sõõre wo go diŋ waŋ sõõren sen wo.

²³ Yeso raw ɗe rage le, raw riŋ rage de jagjõõ ga : Manhúulí niɗ see ɓe niɗ gi la?

²⁴ Hayga jar ma ɓi sir waŋ po yaŋ wo leɗ kããra no, sir waŋ sen ɓlag go.

²⁵ Hayga jar po wo liŋ ni ɓaara leɗ wo kããra we de see ɓaara no, tiŋ sen taw ge go.

²⁶ Day hayga Manhúulí leʼ see ɓe we de see ɓe, jar ma ti ɓen yaŋ wo de car ɓil lay no, egre ɓe joŋ gà so, á taw go.

²⁷ Jobo kal liŋ ni je ma de egre de daŋ ge ɓe horge fẽẽre ɓe mono, á baŋ go taŋgu baŋ baŋ, kal frum tiŋ ɓen kway.

²⁸ Kidolgi ndi de riŋ nday, Baa men ɗig re ɓlagge yaŋ mbe go ne jar wo ti, men ɗig re ɓlagge maga á wãɗn wo mo ɓuy yaŋ go ne hara ti.

²⁹ Ama je maga ɗar Nenterse ma bay ɗag we no, Baa men ɗig re ɓlagge ɓen go ne hẽn ti gà hase, werga á joŋ diŋ ɓlagge maga taw go gà.

³⁰ Yeso wãã ne hara doosen, diŋ wer maga á wãã wo ga : Á de sõõ ma de hãã ti mono.

Hẽẽre Yeso wo de man ɓe

³¹ Day man Yeso wo de hẽẽre ɓen raw wo nduugi, raw wo lagge le go siigi, raw wo ɓoʼ jobo wo ɗe ge ɓe.

³² Jar de lagge ɓiŋ Yeso ni debaŋ, jar raw riŋgi ɓe ga : Coʼ sug ɓo, man ɓo wo de hẽẽre ɓon yaŋ wo le siigi wii moge.

³³ Á raw riŋ rage ga : Man ɓi wo de hẽẽre ɓin diŋ wose wo ne?

³⁴ Á raw raŋ nen ti jar ma ɓiŋ ɓen wo ɓuy, raw wãã ge ga : Ko we nen ɓay, man ɓi wo de hẽẽre ɓi wo mo lag no.

³⁵ Je maga yaŋ joŋ joŋre maga Baa dan no, je sen diŋ man ɓi, wo de wegeman ɓi, maygeman ɓi wo lay.