MARK 15 - Tupuri Bible

Yeso pel Pilad

¹ De jag toŋ ni tuu, waŋre jar ma siɗ jagn raw wo tay ti see ɓaara de jar kluuri jar Jwif wo de jar ma ndar wer wããre Baa wo de jar kluuri ma cag wããren wo ɓuy, ɓoʼ ti wããre. Á raw wo baŋ Yeso, a wo de ɓe ne Pilad.

² Pilad raw wiigi ɓe ga : Ɓa ndo mbo diŋ waŋ jar Jwifn wo ge? Yeso raw ferge ne hẽn ga : Á mbe doo maga ndo wããn mbo nono.

³ Waŋre ma siɗ jagn raw wo car wããre ne Yeso see debaŋ.

⁴ Pilad raw wiigi ɓe tigriŋ pa ga : Ɓa ndo fer wããre go ni gà has ge? Ndo yaŋ mbo laa wããre maga á car wo mo see mo deŋ no?

⁵ Ama Yeso laa fer wããre go ni gà has hase, hãã re sen kol go ngris Pilad debaŋ.

Á ɓoʼ wo wããre ne Yeso ti ga ʼwarn go

⁶ Ti few Pag tum, Pilad ɓoɗ je ma ti daŋgay maga ngaɓan dan wo ga ɓoʼ sen le go, se ɓoɗ go ne hara boŋ boŋ.

⁷ Paga jobo yaŋ ni, à ɗen ga Barabas, de ɓoʼge ti daŋgay de jar maga day wo yãã jag jar kluurin wo gà jar sen hay ii wo jobo ti wur maga á hay hoo wo ciŋ durgi de jar kluuri sirn wo mono.

⁸ Ngaɓan raw wo ɗiigi wo ni Pilad, raw wo wiigi ɓe ti re maga à joŋ ne ne hara tum mono.

⁹ Pilad raw fer wããre ne hara ga : Nday da ga ndi mo ɓoʼ waŋ jar Jwifn wo go we?

¹⁰ Werga Pilad go de koge ga waŋre ma siɗ jagn hã wo Yeso go ne se diŋ doo huni.

¹¹ Ama waŋre ma siɗ jagn raw wo riŋ ngaɓan ga á mo wii wo ga Pilad mo ɓoʼ le go ne saara diŋ Barabas.

¹² Pilad raw riŋ ngaɓan tigriŋ pa ga : Nday da ga ndi mo joŋ mayse de je maga nday ɗen ga waŋ jar Jwif mo ne?

¹³ Á raw wo fer wããre ne hẽn kloŋ ga : Ɓaln go ti koo. Ɓaln go ti koo.

¹⁴ Pilad raw wii rage ga : Á joŋ diŋ re mayse no maʼ la? Á raw wo ngar jag de egre ɓaara ɓuy ga : Ɓaln go ti koo. Ɓaln go ti koo.

¹⁵ Pilad raw joŋ re maga ɓil ngaɓan mo joŋ go fehe, á raw ɓoʼ Barabas le go ne hara, blam sen á raw wããge ga jwag Yeso, raw hãge ɓe go ga á mo ɓaln go ti koo.

Soode feg wo ti Yeso

¹⁶ Sooden raw wo age de Yeso ɓi tiŋ mani waŋ no, sooden wo ɓuy raw wo yiŋ ti ɓe go cwẽẽ.

¹⁷ Á raw wo laa õõbe ma desẽẽ ne Yeso ti, raw wo tãã klaŋ hõõre, kaŋ wo ne hẽn ti.

¹⁸ Blam sen wosela ɓuy raw hee jag ne hẽn ga : Wùr hee jag mo Waŋ jar Jwif.

¹⁹ Á raw wo mbar ge ɓe de graw ti, tuf wo sããre ne hẽn nene, raw wo lag kõyõgre gesiŋ pel ɓe bag bii ɓe doo ga saara de togoɗge ɓe nono.

²⁰ De maga á mbuɗ wo foo ɓe go mbuɗ mono, á raw wo naa õõbe ma desẽẽn go ne hẽn ti, fer wo le lag õõbe ma ɓen wo ne hẽn ti. Blam sen saara raw wo laage go de ɓe siigi ma woge ɓalge ɓe ti koo.

A ɓal Yeso go ti koo so

²¹ Bloo je Siren po, à ɗen ga Simoŋ, diŋ pan Aleksaŋder wo de Rufus, hay le ɓi pay ɓe, raw heege see ɓaara ni. Sooden raw wo bagge ɓe de waŋ ga á mo maŋ koo maga à de woge ɓal Yeso go ti ɓe wo.

²² Á raw wo woge de Yeso ti ngel maga à ɗen ga Golgota, wer ɓe ga ngel Hm Ti.

²³ Á raw wo hã yii ne hẽn de tay nen de saŋgu maga à ɗen ga mir, Yeso laa dage ɓe gà.

²⁴ Blam sen á raw wo ɓalge ɓe go ti koo no, raw wo ɓes õõbe ɓen go de naage wãywáale ma koge ga wose ren yoo saara la.

²⁵ De maga á wo de ɓalge ɓe go ti koo ma ɓal jarn mo lag, wur hay de moɗay bii piiri.

²⁶ Á raw wo yer wããre maga á baan wo ti ɓe go ciŋ ga : Bloo sen la diŋ Waŋ jar Jwif wo.

²⁷ Á raw wo ɓal jar leɗ faage wo ti jeŋ Yeso ni ɓog lay, boŋ ti ɓaŋ war ɓe, lan ti ɓaŋ gùr ɓe lay. [

²⁸ Re sen raw leʼ ge go ti jag wããre maga hay go de yerge mono. Yergen de wãã ge ga : Á go de kee ge yoo jar joŋ ɓlagge wo.]

²⁹ Jar maga her wo ti faage ni, glad wo ti ɓaara, ɗar wo Yeso ga : Ndo bloo je se maga mbug tiŋ Baan go, fer boo ma tigriŋ nen síilí swaʼ no,

³⁰ yãã see ɓo go de see ɓo sog ne. Ɗii le go gesiŋ men koo ma ɓal jarn le go sog ne.

³¹ Blam sen, waŋre jar ma siɗ jagn wo de jar ma ndar wer wããre Baa feg wo ti ɓe doosen no lay, wãɗ wo ga : A yãɗ jar ma baa po wo go, day ɓen á kãã ma yãã see ɓe go de see ɓe gà ane?

³² Daga Kris, Waŋ jar Israyel, mo ɗii le go gesiŋ mo men koo ma ɓal jarn le go so! Á ɗii we le go, ni wùr hã ɓil wùr go ne hẽne. Jar maga wo de ɓalge ti jeŋ ɓe la, ɗarn wo lay.

Yeso huu go so

³³ Wur wo joŋ ge ɗeger mono, suŋgu raw ɓoʼge go ti sir krub ɓuy, hãã wo dayge go de wur maga fǐiri ma de law wo go de kos age go liŋ mono.

³⁴ De wur sen mono, Yeso raw ngar jag go jag ciŋ kloŋ ga : Eloyi, Eloyi, lamma sabagtani. Wer ɓe ga : Baa ɓi no, Baa ɓi no, ndo tob me go le la?

³⁵ Jar po yoo jar maga hay wo ni, raw wo laa wããre sen mokay, kal wo wããge ga : Coʼ we sug ɓay ɗa, á de ɗe Eli.

³⁶ Boŋ yoo ɓaara raw ur ɗee hee fen kor hãn nen feneger, raw ɓeʼ ge ɓe jag graw, raw coŋ ge ɓe wo ne Yeso ga á mo jo ne, jar raw wo wãã ge ga : Men we eŋ ɗa. Naa kon we ɗa, ti ga Eli nduu yaŋ le budgi ɓe go jag koo layblaʼ no.

³⁷ Yeso raw ngar jag de hãã debaŋ, blam sen egre ɓe raw hooge go.

³⁸ Õõbe maga hay de caa nen tiŋ Baan raw ngar ɓil go ɓoge, le ciŋ kaʼ hãã go gesiŋ taʼa.

³⁹ Je kluu sooden hay de oole pel Yeso, á wo koge ga Yeso hoo egre we go mokay, á raw wãã ge ga : Kidolgi bloo sen hay diŋ Wel Baa mbe.

⁴⁰ Naare po hay yaŋ wo ko nen le go wer day lag lay. Mari ma Magdala, Mari man Jag ma klee wo de Joses, la diŋ Salome wo yoo ɓaara ni lay.

⁴¹ Á hay maŋ wo blam Yeso le, joŋ peele ne hẽn le Galile. Naare po ma tigriŋ wo ngaɓa maga á hay ɗii wo le de kããra Jerusalem wo ni pa.

À ɓoʼ Yeso ɓi tuu so

⁴² Wur wo go coŋge mono, wur se de lawn diŋ wur maga jar ʼwũy wo see ɓaara go, taŋgu maga wur iggin tĩĩ wer mono,

⁴³ Josef ma Arimate raw age. Á hay diŋ je ma yoo jar ɓoɗ faare wããre ma yoo jar Jwif wo, jar hoo sug ti ɓe lay. Á hay gor wur twaywaŋ mani Baan lay. Á raw coɓ nen see ɓe coɓ, raw woge see Pilad wii húulí Yeso.

⁴⁴ Pilad raw ngelge debaŋ ti maga á wo laage ga Yeso huu we go yaw mono. Á raw ɗe je kluu sooden wo le, raw wiigi ɓe ga Yeso huu go nà keɓaa hãã yawla.

⁴⁵ Blam maga je kluu sooden wo ferge ne hẽn ga á huu we go mokay, á raw hã faage ne Josef ga á mo maŋ mbe húulí Yeso.

⁴⁶ Josef raw yee õõbe ma depuy, raw naa húulí Yeso le go gesiŋ jag koo ma ɓal jar no, raw kuugi ɓe de õõbe ma depuy no, raw ɓoʼ ge ɓe ɓi tuu húulí maga de cloʼge ti húulì. Blam sen á raw legad húulì ma kluu le ma tẽg jag tuu no.

⁴⁷ Mari ma Magdala wo de Mari man Joses wo le de lagge lag ko ngel maga à ɓoʼn ni mo lay.